ಕೈತೊರೆದು ತೆನೆ ಹೊತ್ತ ಮೈಮುಲ್ ನಿರ್ದೇಶಕಿ ಶಿವಗಾಮಿ

ಹುಣಸೂರು: ತಾಲೂಕಿನಲ್ಲಿ ಶಾಸಕನಾಗಿ ಮತ್ತು ಅಲ್ಪಾವಧಿಯ ಸಚಿವನಾಗಿ ಸಾಕಷ್ಟು ಅಭಿವೃದ್ಧಿ ಕೆಲಸ ಮಾಡಿದ್ದೇನೆ, ಬಡವರ ಕಷ್ಟಗಳಿಗೆ ಸ್ಪಂದಿಸಿದ್ದೇನೆ ಎಂಬ ತೃಪ್ತಿಯಿದೆ ಎಂದು ಶಾಸಕ ಜಿ.ಟಿ.ದೇವೇಗೌಡ ಹೇಳಿದ್ದಾರೆ.

ತಾಲೂಕಿನ ರತ್ನಪುರಿಯಲ್ಲಿ ಮೈಮುಲ್ ನಿರ್ದೇಶಕಿ ಶಿವಗಾಮಿಯವರು ಕಾಂಗ್ರೆಸ್ ತೊರೆದು ಜೆಡಿಎಸ್ ಪಕ್ಷ ಸೇರ್ಪಡೆ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು ಈ ತಾಲೂಕಿಗೆ ಪ್ರಪ್ರಥಮವಾಗಿ ಗ್ರಾಮಾಂತರ ಪ್ರದೇಶಕ್ಕೆ ಪದವಿ ಕಾಲೇಜುಗಳು, ವಿದ್ಯುತ್ಸ್ಟೇಷನ್‌ಗಳು ಹಾಗೂ ಹಾರಂಗಿ ನಾಲೆಯ ಆಧುನಿಕರಣ ಅಲ್ಲದೆ ಬಡವರಿಗೆ ಸೂರು ನೀಡುವ ಕೆಲಸ ನನ್ನ ಅವಧಿಯಲ್ಲಿ ಆಯಿತು. ತಾವು ಸಚಿವರಾಗಿದ್ದ ವೇಳೆ 63 ಸಾವಿರ ಮಂದಿಗೆ ಬಿಪಿಎಲ್ ಕಾಡ್ ಕೊಡಿಸಿದ್ದೆ. ಇನ್ನು ತಮ್ಮ ಅವಧಿಯಲ್ಲಿ ವಿಧವೆಯರು, ಅಂಗವಿಕಲರು, ವೃದ್ಧರಿಗೆ ಹಲವು ಯೋಜನೆಗಳ ಅಡಿಯಲ್ಲಿ ಮನೆ ಬಾಗಿಲಿಗೆ ತೆರಳಿ ಮಾಶಾಸನ ತಲುಪಿಸುವ ಕೆಲಸವನ್ನು ಮಾಡಿದ್ದೇನೆ, ಯಾವುದೇ ಜಾತಿ-ಭೇದ ಮಾಡದೆ ಅಭಿವೃದ್ಧಿಯ ದೃಷ್ಟಿಯಲ್ಲಿ ಕೆಲಸ ಮಾಡಿರುವುದರಿಂದ ತಾಲೂಕಿನ ಜನತೆ ನಮ್ಮ ಕುಟುಂಬವನ್ನು ಮರೆತಿಲ್ಲ. ಈ ಬಾರಿಯ ಚುನಾವಣೆಯಲ್ಲಿ ನನ್ನ ಮಗ ಹರೀಶ್ ಗೌಡನಿಗೆ ನಿಮ್ಮ ಮತ ನೀಡುವ ಮೂಲಕ ಕ್ಷೇತ್ರದ ಅಭಿವೃದ್ದಿಗೆ ನೆರವಾಗಿರೆಂದು ಮನವಿ ಮಾಡಿದರು.

ಈ ವೇಳೆ ಜೆಡಿಎಸ್ ಅಭ್ಯರ್ಥಿ ಜಿ.ಡಿ.ಹರೀಶ್‌ಗೌಡ, ಕೆಎಂಎಫ್ ನಿರ್ದೇಶಕ ಕೆ.ಎಸ್.ಕುಮಾರ್, ಜಿಲ್ಲಾ ಪಂಚಾಯತ್ ಸದಸ್ಯ ಎಂ.ಬಿ.ಸುರೇಂದ್ರ , ಸತೀಶ್ ಪಾಪಣ್ಣ, ಅಸ್ವಾಳ್ ಕೆಂಪೇಗೌಡ, ಬಸುಲಿಂಗಯ್ಯ, ತಾ.ಪಂ.ಮಾಜಿ ಸದಸ್ಯ ಪ್ರಭು, ಗ್ರಾಮ ಪಂಚಾಯತಿ ಸದಸ್ಯರಾದ ರಮೇಶ್, ಆನಂದ್ ಸೇರಿದಂತೆ ಕಾರ್ಯಕರ್ತರು ಉಪಸ್ಥಿತರಿದ್ದರು.