ಬಡವರಿಗಾಗಿ ಸರಳ ಗೃಹ: ಮೋದಿ

ನವದೆಹಲಿ: “ಸ್ವಂತ ಮನೆ ಹೊಂದುವುದು ಪ್ರತಿಯೊಬ್ಬರ ಕನಸು. ಆ ಕನಸನ್ನು ಕೇಂದ್ರ ಸರ್ಕಾರ, ಸರಳ ಗೃಹ ಯೋಜನೆ ಮೂಲಕ ಸಾಕಾರಗೊಳಿಸಿದೆ’ ಎಂದು ಪ್ರಧಾನಿ ನರೇಂದ್ರ ಮೋದಿ ತಿಳಿಸಿದ್ದಾರೆ.

“ಸರಳ ಗೃಹ ಯೋಜನೆ’ಗೆ ವಿಡಿಯೊ ಕಾನ್ಫರೆನ್ಸ್‌ ಮೂಲಕ ಶುಕ್ರವಾರ ಶಂಕುಸ್ಥಾಪನೆ ನೆರವೇರಿಸಿದ ಪ್ರಧಾನಿ, “ಶ್ರಮಪಟ್ಟು ದುಡಿಯುವ ಶ್ರೀಸಾಮಾನ್ಯನಿಗೆ ಸ್ವಂತ ಮನೆ ನಿರ್ಮಿಸುವ ಕುರಿತು 6 ವರ್ಷಗಳಿಂದಲೇ ಯೋಜನೆ ಸಿದ್ಧಪಡಿಸಿದ್ದೆವು’ ಎಂದು ತಿಳಿಸಿದ್ದಾರೆ.

12 ತಿಂಗಳಲ್ಲಿ ಸಾವಿರ ಮನೆ!: “ಕೇವಲ 12 ತಿಂಗಳಲ್ಲಿ 1 ಸಾವಿರ ಮನೆ ನಿರ್ಮಿಸುವ ಯೋಜನೆ ನಮ್ಮ ಮುಂದಿದೆ. ಈ ಪ್ರಕಾರ, ಪ್ರತಿದಿನ 2.5ರಿಂದ 3 ಮನೆಗಳ ಕಾಮಗಾರಿ ಪೂರ್ಣಗೊಳ್ಳಲಿದೆ. ಮುಂದಿನ ವರ್ಷದ ಗಣರಾಜ್ಯೋತ್ಸವದೊಳಗೆ ಯೋಜನೆ ಪೂರ್ಣಗೊಳ್ಳುವ ಗುರಿ ಇಟ್ಟುಕೊಂಡಿದ್ದೇವೆ’ ಎಂದು ತಿಳಿಸಿದರು.

“ದೇಶದ 12 ನಗರಗಳಲ್ಲಿ ಸಾವಿರ ಮನೆಗಳು ತಲೆಯೆತ್ತಲಿವೆ. ಈ 6 ಯೋಜನೆಗಳೂ ದೇಶದಲ್ಲಿನ ಗೃಹನಿರ್ಮಾಣಕ್ಕೆ ದಿಕ್ಸೂಚಿಯಾಗಲಿವೆ. ಬಡ ಮತ್ತು ಮಧ್ಯಮ ವರ್ಗದವರಿಗೆ ಮನೆ ನಿರ್ಮಿಸಿಕೊಡುವುದೇ ಸರ್ಕಾರದ ಮುಖ್ಯ ಉದ್ದೇಶವಾಗಿದೆ’ ಎಂದು ವಿವರಿಸಿದರು.