ಎಂಟರ ಸುತ್ತಿಗೆ ಹಾಲೆಪ್‌, ಎಲಿನಾ ಸ್ವಿಟೋಲಿನಾ

ದೋಹಾ: ಅಗ್ರ ಶ್ರೇಯಾಂಕದ ರೊಮೇನಿಯನ್‌ ಆಟಗಾರ್ತಿ ಸಿಮೋನಾ ಹಾಲೆಪ್‌ ಮತ್ತು ಉಕ್ರೇನಿನ ಎಲಿನಾ ಸ್ವಿಟೋಲಿನಾ “ಕತಾರ್‌ ಓಪನ್‌’ ಕೂಟದ ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸಿದ್ದಾರೆ. 

ಬುಧವಾರ ರಾತ್ರಿ ನಡೆದ ಪಂದ್ಯದಲ್ಲಿ ಸಿಮೋನಾ ಹಾಲೆಪ್‌ ಉಕ್ರೇನಿನ ಲೆಸಿಯಾ ಸುರೆಂಕೊ ವಿರುದ್ಧ 6-2, 6-3 ನೇರ ಸೆಟ್‌ಗಳಿಂದ ಸುಲಭ ಜಯ ದಾಖಲಿಸಿದರು. ಸುರೆಂಕೊ ವಿರುದ್ಧ 6-0 ಗೆಲುವಿನ ದಾಖಲೆ ಹೊಂದಿರುವ ಹಾಲೆಪ್‌ ಎರಡೂ ಸೆಟ್‌ಗಳಲ್ಲಿ ಅಮೋಘ ಆಟವಾಡಿದರು. ಕ್ವಾರ್ಟರ್‌ ಫೈನಲ್‌ನಲ್ಲಿ ಹಾಲೆಪ್‌ 9ನೇ ಶ್ರೇಯಾಂಕದ ಜರ್ಮನ್‌ ಆಟಗಾರ್ತಿ ಜೂಲಿಯಾ ಜಾರ್ಜ್‌ಸ್‌ ಅವರನ್ನು ಎದುರಿಸಲಿದ್ದಾರೆ. ಜೂಲಿಯಾ 6-1, 6-7 (5), 6-4 ಅಂತರದಿಂದ ಅಮೆರಿಕದ ಅಲಿಸನ್‌ ರಿಸ್ಕೆ ವಿರುದ್ಧ ಗೆದ್ದು ಬಂದರು.

ಸ್ವಿಟೋಲಿನಾಗೆ ಸುಲಭ ಜಯ
4ನೇ ಶ್ರೇಯಾಂಕಿತೆ ಎಲಿನಾ ಸ್ವಿಟೋಲಿನಾ ಲಾತ್ವಿಯಾದ ಜೆಲೆನಾ ಒಸ್ಟಾಪೆಂಕೊ ಅವರನ್ನು 6-4, 6-4 ನೇರ ಸೆಟ್‌ಗಳಿಂದ ಸೋಲಿಸಿ ಕ್ವಾರ್ಟರ್‌ ಫೈನಲ್‌ಗೆ ಲಗ್ಗೆಯಿಟ್ಟರು. ಸ್ವಿಟೋಲಿನಾ ವಿರುದ್ಧ ಅನುಭವಿಸಿದ ಹಿಂದಿನೆರಡು ಸೋಲುಗಳಿಗೆ ಸೇಡು ತೀರಿಸಿಕೊಳ್ಳುವ ಇರಾದೆಯಲ್ಲಿದ್ದ ಒಸ್ಟಾಪೆಂಕೊ ಅವರಿಗೆ ಈ ಕೂಟದಲ್ಲಿಯೂ ಮೇಲುಗೈ ಸಾಧಿಸಲು ಸಾಧ್ಯವಾಗಲಿಲ್ಲ. ಸ್ವಿಟೋಲಿನಾ ಜೆಕ್‌ ಗಣರಾಜ್ಯದ ಅರ್ಹತಾ ಆಟಗಾರ್ತಿ ಕ್ಯಾರೋಲಿನಾ ಮುಖೋವಾ ವಿರುದ್ಧ ಆಡಲಿದ್ದಾರೆ.

 ಗಾಯಾಳು ಪ್ಲಿಸ್ಕೋವಾ ಹೊರಕ್ಕೆ
ಜೆಕ್‌ ಗಣರಾಜ್ಯದ ಕ್ಯಾರೋಲಿನ್‌ ಪ್ಲಿಸ್ಕೋವಾ ಅನಾರೋಗ್ಯದಿಂದಾಗಿ ಈ ಕೂಟದಿಂದ ಹಿಂದೆ ಸರಿದಿದ್ದಾರೆ. ಪ್ಲಿಸ್ಕೋವಾ, ಡ್ರಾ ಪ್ರಕಟವಾದ ಬಳಿಕ ಕೂಟದಿಂದ ನಿರ್ಗಮಿಸುತ್ತಿರುವ 5ನೇ ಆಟಗಾರ್ತಿ. ಇದಕ್ಕೂ ಮುನ್ನ ಡೆನ್ಮಾರ್ಕ್‌ ನ ಕ್ಯಾರೋಲಿನ್‌ ವೋಜ್ನಿಯಾಕಿ, ಫ್ರಾನ್ಸ್‌ ನ ಕ್ಯಾರೋಲಿನ್‌ ಗಾರ್ಸಿಯಾ ಕೂಡ ಕೂಟದಿಂದ ಹೊರನಡೆದಿದ್ದರು.