ಶೂಟಿಂಗ್‌ ರದ್ದು: ಭಾರತದಿಂದ ಗೇಮ್ಸ್‌ ಬಹಿಷ್ಕಾರ ಪ್ರಸ್ತಾವ

ಹೊಸದಿಲ್ಲಿ: 2022ರ ಬರ್ಮಿಂಗ್‌ಹ್ಯಾಮ್‌ ಕಾಮನ್ವೆಲ್ತ್‌ ಗೇಮ್ಸ್‌ನಿಂದ ಶೂಟಿಂಗ್‌ ಕೈಬಿಟ್ಟಿರುವುದನ್ನು ವಿರೋಧಿಸಿ ಈ ಕೂಟವನ್ನು ಬಹಿಷ್ಕರಿಸಲು ಭಾರತೀಯ ಒಲಿಂಪಿಕ್ಸ್‌ ಸಮಿತಿ (ಐಒಎ) ಪ್ರಸ್ತಾವವೊಂದನ್ನು ಮುಂದಿಟ್ಟಿದೆ. ಇದಕ್ಕೆ ಸರಕಾರದ ಅನುಮತಿಯನ್ನು ಕೇಳಿದೆ.

ಈ ಪ್ರಸ್ತಾವದ ಮೇಲೆ ಚರ್ಚಿಸಲು ತ್ವರಿತವಾಗಿ ಸಭೆಯೊಂದನ್ನು ಕರೆಯುವಂತೆ ಐಒಎ ಅಧ್ಯಕ್ಷ ನರೀಂದರ್‌ ಬಾತ್ರಾ ಅವರು ಕೇಂದ್ರ ಕ್ರೀಡಾ ಸಚಿವ ಕಿರಣ್‌ ರಿಜಿಜು ಅವರಲ್ಲಿ ವಿನಂತಿಸಿಕೊಂಡಿದ್ದಾರೆ. ಮುಂದಿನ ತಿಂಗಳು ರುವಾಂಡದಲ್ಲಿ ನಡೆಯುವ ಕಾಮನ್ವೆಲ್ತ್‌ ಕ್ರೀಡಾ ಒಕ್ಕೂಟದ ಸಾಮಾನ್ಯ ಸಭೆಯನ್ನು ಐಒಎ ಬಹಿಷ್ಕರಿಸಲು ನಿರ್ಧರಿಸಿದ ಒಂದೇ ದಿನದಲ್ಲಿ ಈ ಪ್ರಸ್ತಾ ಮಾಡಲಾಗಿದೆ. ಇದೇ ವೇಳೆ ಕಾಮನ್ವೆಲ್ತ್‌ ಒಕ್ಕೂಟದ ಸ್ಥಳೀಯ ಉಪಾಧ್ಯಕ್ಷ ಹುದ್ದೆಯ ಚುನಾವಣೆಗೆ, ಐಒಎ ಕಾರ್ಯದರ್ಶಿ ರಾಜೀವ್‌ ಮೆಹ್ತಾ ಸಲ್ಲಿಸಿದ್ದ ನಾಮಪತ್ರವನ್ನು ಹಾಗೂ ಕ್ರೀಡಾಸಮಿತಿಗೆ ನಾಮದೇವ್‌ ಶಿರ್ಗಾಂವ್ಕರ್‌ ಸಲ್ಲಿಸಿದ್ದ ನಾಮಪತ್ರವನ್ನೂ ಹಿಂಪಡೆಯಲಾಗಿದೆ.