ಸಿನಿಮಾಗಳ ಗೆಲುವಿನ ವಿಚಾರದಲ್ಲಿ 2022 ಕನ್ನಡ ಚಿತ್ರರಂಗಕ್ಕೆ ಒಳ್ಳೆಯ ಫ‌ಸಲು ಕೊಟ್ಟ ಸಿನಿಮಾ. ನಿರ್ಮಾಪಕರ ಜೇಬು ತುಂಬುವ ಜೊತೆಗೆ ನಿರ್ದೇಶಕರ ಕನಸು ಈಡೇರಿದ ವರ್ಷ. ಇದರ ಜೊತೆಗೆ ಸ್ಯಾಂಡಲ್‌ವುಡ್‌ ಸಾಮರ್ಥ್ಯ ದೊಡ್ಡ ಮಟ್ಟದಲ್ಲಿ ಜಗತ್ತಿಗೆ ಗೊತ್ತಾದ ವರ್ಷ. ಈ ವರ್ಷ ಹೊಸಬರ ಜೊತೆಗೆ ಸಾಕಷ್ಟು ಸ್ಟಾರ್ ಸಿನಿಮಾಗಳು ಕೂಡಾ ಬಿಡುಗಡೆ ಯಾಗಿ ಮೆಚ್ಚುಗೆ ಪಡೆದವು. ಈಗ ವರ್ಷದ ಕೊನೆಯ ಸ್ಟಾರ್ ಸಿನಿಮಾವಾಗಿ ಯಾವ ಚಿತ್ರ ರಿಲೀಸ್‌ ಆಗುತ್ತದೆ ಎಂಬ ಕುತೂಹಲವಿತ್ತು. ಅದಕ್ಕೆ ಉತ್ತರ “ವೇದ’.
ಶಿವರಾಜ್‌ಕುಮಾರ್‌ ನಟನೆಯ 125ನೇ ಚಿತ್ರ “ವೇದ’ ಈ ವರ್ಷದ ಕೊನೆಯ ಸ್ಟಾರ್ ಸಿನಿಮಾವಾಗಿ ಪ್ರೇಕ್ಷಕರನ್ನು ರಂಜಿಸಲಿದೆ. ಇದು ಶಿವಣ್ಣ ನಟನೆಯ ಜೊತೆಗೆ ನಿರ್ಮಾಣದ ಚಿತ್ರ ಎಂಬುದು ವಿಶೇಷ. ಈ ವರ್ಷ ಬಹುತೇಕ ಸ್ಟಾರ್ ನಟರ ಚಿತ್ರಗಳು ತೆರೆಕಂಡಿವೆ.
ಸುದೀಪ್‌, ಪುನೀತ್‌ ರಾಜ್‌ಕುಮಾರ್‌, ಯಶ್‌, ಗಣೇಶ್‌, ರಕ್ಷಿತ್‌ ಶೆಟ್ಟಿ, ರಿಷಭ್‌ ಶೆಟ್ಟಿ ಸೇರಿದಂತೆ ಅನೇಕ ಸ್ಟಾರ್ ನಟರ ಚಿತ್ರಗಳು ತೆರೆಕಂಡಿವೆ. ಇನ್ನು, ಈ ವರ್ಷ ತೆರೆಕಾಣುತ್ತಿರುವ ಶಿವರಾಜ್‌ಕುಮಾರ್‌ ನಟನೆಯ ಎರಡನೇ ಸಿನಿಮಾ “ವೇದ’. ಈಗಾಗಲೇ “ಬೈರಾಗಿ’ ಚಿತ್ರ ತೆರೆಕಂಡಿದೆ. ಈಗ “ವೇದ’ ತೆರೆಗೆ ಬರುತ್ತಿದೆ.
ಹಾಗೆ ನೋಡಿದರೆ ರಕ್ಷಿತ್‌ ಶೆಟ್ಟಿ ನಟನೆಯ “ಸಪ್ತಸಾಗರದಾಚೆ ಎಲ್ಲೋ’, ಧ್ರುವ ನಟನೆಯ “ಮಾರ್ಟಿನ್‌’, ದರ್ಶನ್‌ ಅವರ “ಕ್ರಾಂತಿ’ ಚಿತ್ರಗಳು ಕೂಡಾ ಈ ವರ್ಷವೇ ತೆರೆಕಾಣಲಿವೆ ಎನ್ನಲಾಗಿತ್ತು. ಆದರೆ, ಆ ಚಿತ್ರಗಳು ಕಾರಣಾಂತರಗಳಿಂದ ಮುಂದೆ ಹೋಗಿವೆ.
ಇದರಾಚೆ ಬೇರೆ ಯಾವ ಸ್ಟಾರ್ ಸಿನಿಮಾಗಳು ಕೂಡಾ ಡಿಸೆಂಬರ್‌ನಲ್ಲಿ ರಿಲೀಸ್‌ ಡೇಟ್‌ ಅನೌನ್ಸ್‌ ಮಾಡದಿರುವ ಕಾರಣ,ಈಗ ವರ್ಷಾಂತ್ಯದ ಸ್ಟಾರ್ ಸಿನಿಮಾವಾಗಿ ಡಿಸೆಂಬರ್‌ 23ರಂದು ತೆರೆಕಾಣಲಿದೆ. ಹರ್ಷ ಈ ಚಿತ್ರದ ನಿರ್ದೇಶಕರು. ಹರ್ಷ ಹಾಗೂ ಶಿವಣ್ಣ ಕಾಂಬಿನೇಶನ್‌ ನ 4ನೇ ಚಿತ್ರ “ವೇದ’ ಎಂಬುದು ಮತ್ತೂಂದು ವಿಶೇಷ.
