ನನಗೆ ಪ್ರಾಣ ಬೆದರಿಕೆ ಇದೆ: ಶಿವಸೇನೆ ಸಂಸದ ದೂರು

ಮುಂಬೈ: ಶಿವಸೇನೆ ಸಂಸದ ಪರ್ಭಾನಿ ಸಂಜಯ್‌ ಜಾಧವ್‌ ತಮಗೆ ಜೀವ ಬೆದರಿಕೆಯಿದ್ದು, ತಮ್ಮ ಸಂಸದ ಸ್ಥಾನಕ್ಕೆ ಕುತ್ತು ತರಲು 2 ಕೋಟಿ ಸುಪಾರಿ ನೀಡಲಾಗಿದೆ ಎಂದು ಆರೋಪಿಸಿ ಬುಧವಾರ ಪೊಲೀಸರಿಗೆ ದೂರು ನೀಡಿದ್ದಾರೆ.

ಸಂಸದರು ಹಲವು ಅಭಿಮಾನಿಗಳೊಂದಿಗೆ ನಾನಾಲ್‌ಪೇಟ್‌ನ ಪೊಲೀಸ್‌ ಠಾಣೆಗೆ ಧಾವಿಸಿ, ದೂರು ಸಲ್ಲಿಸಿದ್ದಾರೆ. “ನನ್ನ ಜೀವಕ್ಕೆ ಮತ್ತು ಸಂಸದ ಸ್ಥಾನಕ್ಕೆ ಕುತ್ತು ತರಲು ಪ್ರಭಾವಿ ವ್ಯಕ್ತಿಯೊಬ್ಬರು ನಾಂದೇಡ್‌ನ‌ ಗ್ಯಾಂಗ್‌ ಒಂದಕ್ಕೆ 2 ಕೋಟಿ ರೂ. ಸುಪಾರಿ ನೀಡಿದ್ದಾರೆ’ ಎಂದು ದೂರಿನಲ್ಲಿ ಆರೋಪಿಸಿದ್ದಾರೆ.

ಪೊಲೀಸರು ತನಿಖೆ ಆರಂಭಿಸಿದ್ದು, ಇಲ್ಲಿಯವರೆಗೆ ಯಾವುದೇ ಆರೋಪಿ ಪತ್ತೆಯಾಗಿಲ್ಲ. ಕೆಲ ದಿನಗಳ ಹಿಂದೆ ಎಪಿಎಂಸಿ ಆಡಳಿತ ಮಂಡಳಿಯಲ್ಲಿ ಎನ್‌ಸಿಪಿಗೆ ಅನಧಿಕೃತವಾಗಿ ಪ್ರಾತಿನಿಧ್ಯ ನೀಡಿರುವುದನ್ನು ವಿರೋಧಿಸಿ ಜಾಧವ್‌ ಸಂಸದ ಸ್ಥಾನಕ್ಕೆ ರಾಜೀನಾಮೆ ಸಲ್ಲಿಸಿದ್ದರು. ಬಳಿಕ ಸಿಎಂ ಉದ್ಧವ್‌ ಠಾಕ್ರೆ ಮನವೊಲಿಸಿದ ನಂತರ ರಾಜೀನಾಮೆ ವಾಪಸು ಪಡೆದಿದ್ದರು. ಸುಪಾರಿ ನೀಡಿದ ಪ್ರಭಾವಿ ವ್ಯಕ್ತಿ ಯಾರು ಎಂಬುದು ದೂರಿನಲ್ಲಿ ಸ್ಪಷ್ಟವಿಲ್ಲ.