ಪರೀಕ್ಷೆ ಬರೆಯಬೇಕಿದ್ದವಳು ಬಾರದ ಲೋಕಕ್ಕೆ ಹೋದಳು

ಪುತ್ತೂರು: ಪರೀಕ್ಷೆಯ ಗಡಿಬಿಡಿಯಲ್ಲಿದ್ದ ಎಂಜಿನಿಯರಿಂಗ್‌ ವಿದ್ಯಾರ್ಥಿನಿಯೊಬ್ಬರು ಅಪಘಾತದಲ್ಲಿ ದಾರುಣವಾಗಿ ಮೃತಪಟ್ಟ ಘಟನೆ ಬುಧವಾರ ಬೆಳಗ್ಗೆ 7 ಗಂಟೆ ಸುಮಾರಿಗೆ ದರ್ಬೆ ಸಮೀಪ ಸಂಭವಿಸಿದೆ.

ಮೂಲತಃ ವಿಟ್ಲ ನಿವಾಸಿಯಾಗಿರುವ ಉದ್ಯಮಿ ಹಸೈನಾರ್‌ ಹಾಜಿ ಅವರ ಪುತ್ರಿ ಮರಿಯಮ್‌ ಸಮ್‌ರೀನಾ (19) ಮೃತಪಟ್ಟವರು. ಅಡ್ಯಾರ್‌ ಸಹ್ಯಾದ್ರಿ ಕಾಲೇಜಿನಲ್ಲಿ ಎಂಜಿನಿಯರಿಂಗ್‌ ಪದವಿಯ ಪ್ರಥಮ ವರ್ಷದ ವಿದ್ಯಾರ್ಥಿನಿಯಾಗಿದ್ದ ಅವರು ಕೂರ್ನಡ್ಕದಲ್ಲಿ ವಾಸವಿದ್ದರು. ದರ್ಬೆ ಸಂತ ವಿಕ್ಟರ್ನಲ್ಲಿ ಪ್ರೌಢಶಿಕ್ಷಣ, ಫಿಲೋಮಿನಾ ಕಾಲೇಜಿನಲ್ಲಿ ಪಿಯುಸಿ ವ್ಯಾಸಂಗ ಮಾಡಿದ್ದರು. ಎಂಜಿನಿಯರಿಂಗ್‌ ಶಿಕ್ಷಣಕ್ಕಾಗಿ ಸಹ್ಯಾದ್ರಿ ಕಾಲೇಜಿಗೆ ಸೇರಿದ್ದರು.

ಬುಧವಾರ ಕಾಲೇಜಿನಲ್ಲಿ ಪರೀಕ್ಷೆ ನಡೆಯಲಿದ್ದ ಕಾರಣ ಸಮ್‌ರೀನಾ  ತರಾತುರಿಯಲ್ಲಿ ಮನೆಯಿಂದ ಹೊರಟಿದ್ದಾರೆ. ನಿತ್ಯ ಕೂರ್ನಡ್ಕದ ತನ್ನ ಮನೆಯಿಂದ ಪುತ್ತೂರಿನ ವರೆಗೆ ಆ್ಯಕ್ಟಿವಾ ಹೊಂಡಾ ವಾಹನದಲ್ಲಿ ಬರುತ್ತಿದ್ದ ಸಮ್‌ರೀನಾ , ಅಲ್ಲಿಂದ ಸಾರಿಗೆ ಸಂಸ್ಥೆ ಬಸ್‌ನಲ್ಲಿ ಪ್ರಯಾಣಿಸುತ್ತಿದ್ದರು. ಬುಧವಾರ 6.50ರ ಸುಮಾರಿಗೆ ಮನೆಯಿಂದ ಹೊರಟಿದ್ದು, 7 ಗಂಟೆ ಸುಮಾರಿಗೆ ದರ್ಬೆ ಸಮೀಪ ರಸ್ತೆಯ ಡಿವೈಡರ್‌ಗೆ ಆ್ಯಕ್ಟಿವಾ ಢಿಕ್ಕಿ ಹೊಡೆದಿದೆ. ಗಂಭೀರ ಗಾಯಗೊಂಡ ಆಕೆಯನ್ನು ಪುತ್ತೂರಿನ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಬಳಿಕ ಪುತ್ತೂರಿನ ಸರಕಾರಿ ಆಸ್ಪತ್ರೆಗೆ ಕರೆದೊಯ್ಯುವ ಮಾರ್ಗಮಧ್ಯೆ 9.30ರ ಸುಮಾರಿಗೆ ಕೊನೆಯುಸಿರೆಳೆದಿದ್ದಾರೆ. ಪುತ್ತೂರು ಸರಕಾರಿ ಆಸ್ಪತ್ರೆಯಲ್ಲಿ ಮರಣೋತ್ತರ ಪರೀಕ್ಷೆ ನಡೆಸಲಾಗಿದೆ.

ಅಪಘಾತದ ರಭಸಕ್ಕೆ ಸಮ್‌ರೀನಾ ಆ್ಯಕ್ಟಿವಾದಿಂದ ಬಿದ್ದು ಸಮೀಪದಲ್ಲೇ ಇದ್ದ ಅಶ್ವತ್ಥ ಮರದ ಕಟ್ಟೆಗೆ ತಲೆ ಬಡಿದು ತೀವ್ರವಾಗಿ ಗಾಯಗೊಂಡಿದ್ದರು. ರಸ್ತೆಯ ಅಂಚಿನಲ್ಲಿ ಮರಳು ಇದ್ದ ಕಾರಣ ದ್ವಿಚಕ್ರ  ವಾಹನ ಸ್ಕಿಡ್‌ ಆಗಿರಬಹುದೆಂದು ಸ್ಥಳೀಯರು ಹೇಳಿದ್ದಾರೆ.

ಜ್ವರ ಕಾರಣವಾಯ್ತೇ?
ಮರಿಯಮ್‌ ಸಮ್‌ರೀನಾ ಮಂಗಳವಾರದಿಂದ ಜ್ವರದಿಂದ ಬಳಲುತ್ತಿದ್ದರು. ಆದರೂ ಪರೀಕ್ಷೆಗೆ ಹಾಜರಾಗಲು ನಿರ್ಧರಿಸಿದ್ದರು. ಬುಧವಾರ ಬೆಳಗ್ಗೆಯೂ ಜ್ವರವಿದ್ದ ಕಾರಣ ತಾಯಿ ಬೇಡವೆಂದರೂ ಕೇಳದೆ, ಆಹಾರವನ್ನು ತಿನ್ನದೆ ಔಷಧ ಸೇವಿಸಿ, ಆ್ಯಕ್ಟಿವಾ ಹತ್ತಿದ್ದಾರೆ. ಪರೀಕ್ಷೆ ಗಡಿಬಿಡಿ ಬೇರೆ ಇದ್ದ ಕಾರಣ ಆಕೆ ಬಳಲಿ ಅಪಘಾತಕ್ಕೆ ಒಳಗಾಗಿರಬೇಕು ಎಂದು ಶಂಕಿಸಲಾಗಿದೆ. ಇದೇ ವೇಳೆ, ಅಪಘಾತ ಸಂಭವಿಸಿ ಸುಮಾರು 20 ನಿಮಿಷ ಸಮ್‌ರೀನಾ ರಸ್ತೆಯಲ್ಲೇ ಬಿದ್ದಿದ್ದರು. ತತ್‌ಕ್ಷಣವೇ ಆಸ್ಪತ್ರೆಗೆ ಸೇರಿಸಿದ್ದರೆ ಬದುಕುವ ಸಾಧ್ಯತೆ ಇತ್ತು ಎನ್ನುವ ವಾಟ್ಸ್‌ಆ್ಯಪ್‌ ಸಂದೇಶವೂ ಹರಿದಾಡಿದೆ.

ಪ್ರಕರಣ ದಾಖಲು
ಪುತ್ತೂರು ನಗರ ಸಂಚಾರಿ ಠಾಣೆಯಲ್ಲಿ ಐಪಿಸಿ ಕಲಂ 279, 304 (ಎ) ಅಡಿ ದೂರು ದಾಖಲಿಸಲಾಗಿದೆ. ಮರಿಯಮ್ಮ ಅವರ ಮಾವ ಹಸೈನಾರ್‌ ಕೆ. ಠಾಣೆಗೆ ದೂರು ನೀಡಿದ್ದಾರೆ.

ಅಂತ್ಯಸಂಸ್ಕಾರ
ಪುತ್ತೂರು ಸರಕಾರಿ ಆಸ್ಪತ್ರೆಯಲ್ಲಿ ಮರಣೋತ್ತರ ಪರೀಕ್ಷೆ ನಡೆಸಿದ ಬಳಿಕ, ಬಪ್ಪಳಿಗೆ ಮದ್ರಸದಲ್ಲಿ ಅಂತಿಮ ಕ್ರಿಯೆಗಳನ್ನು ನಡೆಸಲಾಯಿತು. ಬಳಿಕ ಮೃತದೇಹವನ್ನು ಬನ್ನೂರಿನಲ್ಲಿರುವ ತಾಯಿಮನೆಗೆ ತಂದು, ಅಂತಿಮ ದರ್ಶನಕ್ಕೆ ಇಡಲಾಯಿತು. ವಿಟ್ಲ ಕೇಂದ್ರ ಜುಮ್ಮಾ ಮಸೀದಿಯ ಕಬರಸ್ಥಾನದಲ್ಲಿ ಮೃತದೇಹವನ್ನು ದಫನ ಮಾಡಲಾಯಿತು

ಹೊಯಿಗೆ ತೆಗೆಸಿ
ಡಿವೈಡರ್‌ನ ಎರಡು ಬದಿಯೂ ರಾಶಿ ಬೀಳುವ ಹೊಯಿಗೆಯನ್ನು ಕನಿಷ್ಠ 15 ದಿನಕ್ಕೊಮ್ಮೆಯಾದರೂ ತೆಗೆಸುವಂತೆ ಸಾರ್ವಜನಿಕರು ಈಗಾಗಲೇ ನಗರಸಭೆಗೆ ಮನವಿ ಮಾಡಿದ್ದಾರೆ. ಈ ಹೊಯಿಗೆ ಮೇಲೆ ದ್ವಿಚಕ್ರ ವಾಹನ ಸಾಗಿದರೆ, ಸ್ಕಿಡ್‌ ಆಗಿ ಪಲ್ಟಿಯಾಗುವ ಸಂಭವವೂ ಇದೆ.