ಸೆನ್ಸೆಕ್ಸ್ 550 ಅಂಕ ಕುಸಿತ,11 ಸಾವಿರಕ್ಕಿಂತ ಕೆಳಕ್ಕೆ ಕುಸಿದ ನಿಫ್ಟಿ

ನವದೆಹಲಿ:ಕಚ್ಚಾ ತೈಲದ ಬೆಲೆ ಏರಿಕೆ ಹಾಗೂ ಏಷ್ಯಾ ಮಾರುಕಟ್ಟೆಯ ಕುಸಿತದ ಪರಿಣಾಮ ಮುಂಬೈ ಶೇರು ಪೇಟೆಯ ಸೆನ್ಸೆಕ್ಸ್ ಸೂಚ್ಯಂಕ ಸೋಮವಾರದ ವಹಿವಾಟಿನಲ್ಲಿ 550 ಅಂಕಗಳಷ್ಟು ಭಾರೀ ಕುಸಿತ ಕಂಡಿದ್ದು, ನಿಫ್ಟಿ 11000ಕ್ಕಿಂತ ಕೆಳಗೆ ತಲುಪಿದೆ.

ಜಾಗತಿಕ ವಾಣಿಜ್ಯ ಸಮರ ತೀವ್ರಗೊಳ್ಳುವ ಭೀತಿ, ಡಾಲರ್‌ ಎದುರು ರೂಪಾಯಿಯ ನಿರಂತರ ಕುಸಿತ, ಲಾಭ ನಗದೀಕರಣ, ಏಶ್ಯನ್‌ ಶೇರು ಮಾರುಕಟ್ಟೆಗಳಲ್ಲಿನ ದೌರ್ಬಲ್ಯ ಇವೇ ಮೊದಲಾದ ಕಾರಣಗಳಿಂದಾಗಿ ಮುಂಬಯಿ ಶೇರು ಪೇಟೆ ಇಂದು ತೀವ್ರ ಕುಸಿತಕ್ಕೆ ಗುರಿಯಾಯಿತು.

ಶೇರು ವಹಿವಾಟು ಮಧ್ಯಾಹ್ನದ ಹೊತ್ತಿಗೆ 545.37 ಅಂಕಗಳಷ್ಟು ಕುಸಿತ ಕಂಡು 36,296.23ಕ್ಕೆ ವಹಿವಾಟು ನಿಂತಿದೆ. ಇದೇ ರೀತಿ ರಾಷ್ಟ್ರೀಯ ಶೇರು ಮಾರುಕಟ್ಟೆಯ ನಿಫ್ಟಿ ಸೂಚ್ಯಂಕ 169.49 ಅಂಕಗಳ ನಷ್ಟದೊಂದಿಗೆ ಆರಂಭದ ವಹಿವಾಟನ್ನು 10,973.65 ಅಂಕಗಳ ಮಟ್ಟದಲ್ಲಿದೆ.