ಆಸ್ಟ್ರೇಲಿಯನ್‌ ಓಪನ್‌: ಶರಪೋವಾಗೆ ವೈಲ್ಡ್‌ಕಾರ್ಡ್‌

ಮೆಲ್ಬರ್ನ್: ಐದು ಗ್ರ್ಯಾನ್‌ಸ್ಲಾಮ್‌ ಪ್ರಶಸ್ತಿಗಳ ವಿಜೇತೆ ಮರಿಯಾ ಶರಪೋವಾ ಅವರಿಗೆ ವರ್ಷಾರಂಭದ ಆಸ್ಟ್ರೇಲಿಯನ್‌ ಓಪನ್‌ ಟೆನಿಸ್‌ ಪಂದ್ಯಾವಳಿಯಲ್ಲಿ ವೈಲ್ಡ್‌ ಕಾರ್ಡ್‌ ಪ್ರವೇಶ ಲಭಿಸಿದೆ. ಇದರಿಂದ 16ನೇ ಸಲ “ಮೆಲ್ಬರ್ನ್ ಪಾರ್ಕ್‌’ನಲ್ಲಿ ಆಡುವ ಅವಕಾಶ ಅವರಿಗೆ ಎದುರಾಗಿದೆ.

32ರ ಹರೆಯದ ಶರಪೋವಾ ಇಲ್ಲಿ 2008ರಷ್ಟು ಹಿಂದೆ ಚಾಂಪಿಯನ್‌ ಆಗಿದ್ದರು. ಕಳೆದ ವರ್ಷ ಗಾಯಾಳಾದ ಕಾರಣ ಸ್ಪರ್ಧಾತ್ಮಕ ಟೆನಿಸ್‌ನಿಂದ ಬಹುತೇಕ ದೂರವೇ ಉಳಿದಿದ್ದರು. ಹೀಗಾಗಿ ಅವರ ರ್‍ಯಾಂಕಿಂಗ್‌ 147ಕ್ಕೆ ಕುಸಿಯಿತು. ಇದರಿಂದ ಶರಪೋವಾಗೆ ಆಸ್ಟ್ರೇಲಿಯನ್‌ ಓಪನ್‌ ಟೂರ್ನಿಯ ನೇರ ಪ್ರವೇಶದ ಅವಕಾಶ ತಪ್ಪಿತು.

ವರ್ಷಾರಂಭದ “ಬ್ರಿಸ್ಬೇನ್‌ ಇಂಟರ್‌ನ್ಯಾಶನಲ್‌’ ಕೂಟದ ಮೊದಲ ಸುತ್ತಿನಲ್ಲೇ ಹೊರಬಿದ್ದ ಆಘಾತದಲ್ಲಿದ್ದ ಶರಪೋವಾಗೆ ಈ ವೈಲ್ಡ್‌ಕಾರ್ಡ್‌ ಪ್ರವೇಶ ಖುಷಿ ಕೊಟ್ಟಿದೆ.