ಐಎಎಸ್‌ ಅಧಿಕಾರಿ ಶಾಲಿನಿ ರಜನೀಶ್‌ ಕುರಿತು “ಶಾಲಿನಿ ಐ.ಎ.ಎಸ್‌’ ಎಂಬ ಚಿತ್ರವನ್ನು ನಿಖಿಲ್ ಮಂಜು ನಿರ್ದೇಶಿಸುತ್ತಿರುವುದು ಗೊತ್ತಿರುವ ವಿಷಯವೇ. ಹೊಸ ವಿಷಯವೇನೆಂದರೆ, ಈ ಚಿತ್ರದಲ್ಲಿ ಶಾಲಿನಿ ರಜನೀಶ್‌ ಸಹ ನಟಿಸುತ್ತಿರುವುದು. ಎಲ್ಲರಿಗೂ ಗೊತ್ತಿರುವಂತೆ ಚಿತ್ರದಲ್ಲಿ ಶಾಲಿನಿ ಅವರ ಪಾತ್ರವನ್ನು ನಟಿ ಸೋನು ಮಾಡುತ್ತಿದ್ದಾರೆ.
ಹಾಗಿರುವಾಗ ಶಾಲಿನಿ ರಜನೀಶ್‌ ಅವರ ಪಾತ್ರವೇನು ಎಂಬ ಪ್ರಶ್ನೆ ಸಹಜವಾಗಿಯೇ ಬರುತ್ತದೆ. ಚಿತ್ರದ ಆರಂಭದಲ್ಲಿ ಸೋನು ಐಎಎಸ್‌ ಸಂದರ್ಶನಕ್ಕೆ ಹೋದ ಸಂದರ್ಭದಲ್ಲಿ, ಶಾಲಿನಿ ರಜನೀಶ್‌ ಅವರು ಸಂದರ್ಶನ ಮಾಡುತ್ತಾರಂತೆ. ಯಾಕೆ ಐಎಎಸ್‌ ಆಗಬೇಕು ಎಂದು ಪ್ರಶ್ನೆ ಮಾಡುವ ದೃಶ್ಯವನ್ನು ಮನೆಯಲ್ಲೇ ಇತ್ತೀಚೆಗೆ ಚಿತ್ರದ ಚಿತ್ರೀಕರಣ ಮಾಡಲಾಗಿದೆ.
“ಶಾಲಿನಿ ಐಎಎಸ್‌’ ಚಿತ್ರದ ಚಿತ್ರೀಕರಣ ಬೆಂಗಳೂರು ಮತ್ತು ಚಿತ್ರದುರ್ಗದಲ್ಲಿ ಸುಮಾರು 22 ದಿನಗಳ ಕಾಲ ನಡೆದಿದ್ದು, ಇನ್ನು ಎರಡ್ಮೂರು ದಿನಗಳ ಚಿತ್ರೀಕರಣ ನಡೆದರೆ ಚಿತ್ರ ಮುಗಿದಂತೆ. ಈ ಪೈಕಿ ಶಾಲಿನಿ ಅವರ ಜೊತೆಗೆ ಸೋನು ಸುಮಾರು ಐದು ದಿನಗಳ ಕಾಲ ಕಳೆದು, ಅವರನ್ನು ಹತ್ತಿರದಿಂದ ಅರ್ಥ ಮಾಡಿಕೊಂಡರಂತೆ. ಜೊತೆಗೆ ಹಲವು ವಿಷಯಗಳನ್ನು ತಿಳಿದುಕೊಂಡರಂತೆ.
“ಪ್ರತಿ ದಿನ ನೂರಾರು ಜನ ಅವರ ಬಳಿ ತಮ್ಮ ಸಮಸ್ಯೆ ತೆಗೆದುಕೊಂಡು ಬರುತ್ತಾರೆ. ಅದೆಲ್ಲವನ್ನೂ ಅವರು ಬಹಳ ಶಾಂತ ರೀತಿಯಲ್ಲಿ ಬಗೆಹರಿಸುತ್ತಾರೆ. ಹಲವು ಟೆನ್ಶನ್‌ಗಳ ನಡುವೆಯೂ ಅವರು ಶಾಂತವಾಗಿರುತ್ತಾರೆ. ಅಷ್ಟೇ ಅಲ್ಲ, ಹಲವು ಕೆಲಸಗಳನ್ನು ಮಾಡುತ್ತಾರೆ. ನಮಗೆ ಶೂಟಿಂಗ್‌ ಇಲ್ಲ ಎಂದರೆ ವಿರಾಮ ತೆಗೆದುಕೊಳ್ಳುತ್ತೇವೆ.
ಆದರೆ, ಅವರಿಗೆ ವಿರಾಮ ಎನ್ನುವುದೇ ಇಲ್ಲ. ಆದರೂ ಎನರ್ಜಿಟಿಕ್‌ ಆಗಿ, ಫಿಟ್‌ ಆಗಿದ್ದಾರೆ. ನಮ್ಮ ಮೆಸೇಜ್‌ಗಳಿಗೆ ಪ್ರತಿಕ್ರಿಯೆ ನೀಡುತ್ತಾರೆ’ ಎನ್ನುತ್ತಾರೆ ಸೋನು. “ಶಾಲಿನಿ ಐ.ಎ.ಎಸ್‌’ ಚಿತ್ರವನ್ನು ನಿಖಿಲ್ ಮಂಜು ನಿರ್ದೇಶಿಸುತ್ತಿದ್ದು, ಸೋನು ಜೊತೆಗೆ ರೋಜರ್‌ ನಾರಾಯಣ್‌ ಮುಂತಾದವರು ನಟಿಸುತ್ತಿದ್ದಾರೆ.
