ಯುವಕನ ಮೇಲೆ ಲೈಂಗಿಕ ದೌರ್ಜನ್ಯ

ಬೆಂಗಳೂರು: ಆಟೋ ಚಾಲಕನೊಬ್ಬ ಪ್ರಯಾಣಿಕನ ಮೇಲೆ ಲೈಂಗಿಕ ದೌರ್ಜನ್ಯ ಎಸಗಿರುವ ವಿಲಕ್ಷಣ ಘಟನೆ ನಗರದಲ್ಲಿ ನಡೆದಿದ್ದು, ತಡವಾಗಿ ಬೆಳಕಿಗೆ ಬಂದಿದೆ. ಆರೋಪಿಯನ್ನು ಚೆನ್ನಮ್ಮನಕೆರೆ ಅಚ್ಚುಕಟ್ಟು ಠಾಣೆ ಪೊಲೀಸರು ಬಂಧಿಸಿದ್ದಾರೆ.

ಇಟ್ಟಮಡು ನಿವಾಸಿ ರಾಜೇಶ್‌ ಅಲಿಯಾಸ್‌ ಹುಲಿ (30) ಬಂಧಿತ. ಆರೋಪಿ ಆಟೋ ಚಾಲಕ ರಾಜೇಶ್‌ ಮೇ 23ರ ರಾತ್ರಿ 8 ಗಂಟೆಗೆ ನಾಯಂಡಹಳ್ಳಿ ಬಸ್‌ ನಿಲ್ದಾಣದಲ್ಲಿ ಪ್ರಯಾಣಿಕರಿಗೆ ಕಾಯುತ್ತಿದ್ದ. ಈ ವೇಳೆ 19 ವರ್ಷದ ಯುವಕನೊಬ್ಬ ಬಸವನಗುಡಿಗೆ ಹೋಗಲು ನಾಯಂಡಹಳ್ಳಿಯಿಂದ ರಾಜೇಶನ ಆಟೋ ಹತ್ತಿದ್ದ.

ಯುವಕನನ್ನು ಹತ್ತಿಸಿಕೊಂಡ ಆರೋಪಿ, “ಮಾರ್ಗ ಮಧ್ಯೆ ನನ್ನ ಮನೆ ಇದೆ. ಬಟ್ಟೆ ಬದಲಿಸಿ ಬರುತ್ತೇನೆ’ ಎಂದು ಹೇಳಿದ್ದಾನೆ. ಬಳಿಕ ಮನೆ ಮುಂದೆ ಆಟೋ ನಿಲ್ಲಿಸಿ ಮಹಡಿ ಮೇಲಿದ್ದ ಮನೆಗೆ ಹೋದ ರಾಜೇಶ್‌, ಒಂದೆರಡು ನಿಮಿಷ ಬಿಟ್ಟು ಸಹಾಯ ಬೇಕಿದೆ ಎಂದು ಯುವಕನನ್ನು ಮೇಲಕ್ಕೆ ಕರೆಸಿಕೊಂಡಿದ್ದಾನೆ. ಯುವಕ ಮನೆ ಒಳಗೆ ಬಂದ ಬಳಿಕ ಬಾಗಿಲು ಹಾಕಿಕೊಂಡು ಪ್ರಾಣ ಬೆದರಿಕೆಯೊಡ್ಡಿದ್ದಾನೆ.

ನಂತರ ಬಾಯಿಗೆ ಬಟ್ಟೆ ಕಟ್ಟಿ ಲೈಂಗಿಕ ದೌರ್ಜನ್ಯ ಎಸಗಿದ್ದಾನೆ. ಅಷ್ಟೇ ಅಲ್ಲದೆ, ಈ ಕೃತ್ಯವನ್ನು ವಿಡಿಯೋ ಕೂಡ ಮಾಡಿದ್ದಾನೆ. ಘಟನೆಯನ್ನು ಹೊರಗಡೆ ಬಾಯಿಬಿಟ್ಟರೆ ವಿಡಿಯೋವನ್ನು ಯೂಟ್ಯೂಬ್‌ನಲ್ಲಿ ಹಾಕುವುದಾಗಿ ಬೆದರಿಕೆಯೊಡಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ. ಆರೋಪಿ ವಿರುದ್ಧ ಪ್ರಕರಣ ದಾಖಲಿಸಿ ನ್ಯಾಯಾಲಯದ ಮುಂದೆ ಹಾಜರುಪಡಿಸಿದ ನಂತರ, ನ್ಯಾಯಾಂಗ ವಶಕ್ಕೆ ಒಪ್ಪಿಸಲಾಗಿದೆ.