ಕಾಬೂಲ್‌ ಜೈಲಿನ ಬಳಿ ಆತ್ಮಾಹುತಿ ಬಾಂಬರ್‌ ದಾಳಿ; 7 ಬಲಿ, ಐವರಿಗೆ ಗಾಯ

ಕಾಬೂಲ್‌ : ಅಫ್ಘಾನಿಸ್ಥಾನದ ಪೂರ್ವ ಭಾಗದಲ್ಲಿರುವ ದೇಶದ ಅತೀ ದೊಡ್ಡ ಬಂಧೀಖಾನೆಯ ಸಿಬಂದಿಗಳನ್ನು ಒಯ್ಯುತ್ತಿದ್ದ ಬಸ್ಸೊಂದರ ಮೇಲೆ ನಡೆದಿರುವ ಆತ್ಮಾಹುತಿ ಬಾಂಬರ್‌ ದಾಳಿಗೆ ಕನಿಷ್ಠ 7 ಮಂದಿ ಬಲಿಯಾಗಿರುವುದಾಗಿ ಅಧಿಕಾರಿಗಳು ತಿಳಿಸಿದ್ದಾರೆ. 

ಸಮರ ತ್ರಸ್ತ ಅಫ್ಘಾನಿಸ್ಥಾನದಲ್ಲಿ ಉಗ್ರರು ನಡೆಸಿರುವ ತಾಜಾ ಮಾರಣ ಹೋಮ ಇದಾಗಿದೆ.

ಕಾಬೂಲ್‌ ಸಮೀಪ ನಡೆದಿರುವ ಈ ಬ್ಲಾಸ್ಟ್‌ ನಲ್ಲಿ ಐವರು ಗಾಯಗೊಂಡಿರುವುದಾಗಿ ಪೊಲೀಸ್‌ ವಕ್ತಾರ ಬಶೀರ್‌ ಮುಜಾಹಿದ್‌ ತಿಳಿಸಿದ್ದಾರೆ. ಪುಲ್‌ ಎ ಚಾರ್ಖಿ ಎಂಬಲ್ಲಿನ ಬಂಧೀಖಾನೆಯ ಸಿಬಂದಿಗಳನ್ನು ಒಯ್ಯುತ್ತಿದ್ದ ಬಸ್ಸಿಗೆ ನಡೆದುಕೊಂಡು ಹೋಗುತ್ತಿದ್ದ ಆತ್ಮಾಹುತಿ ಬಾಂಬರ್‌ ಢಿಕ್ಕಿಯಾದ ಎಂದು ಒಳಾಡಳಿತ ಸಚಿವ ನಜೀಬ್‌ ದಾನಿಶ್‌ ತಿಳಿಸಿದರು.