Holiday; ಸರಣಿ ರಜೆ: ಕರಾವಳಿಯ ದೇಗುಲಗಳಲ್ಲಿ ಭಕ್ತ ಸಂದಣಿ

ಸುಬ್ರಹ್ಮಣ್ಯ/ಧರ್ಮಸ್ಥಳ/ ಕೊಲ್ಲೂರು: ಸರಣಿ ರಜೆಯ ಹಿನ್ನೆಲೆಯಲ್ಲಿ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ, ಶ್ರೀ ಕ್ಷೇತ್ರ ಧರ್ಮಸ್ಥಳ, ಕೊಲ್ಲೂರು ಶ್ರೀ ಮೂಕಾಂಬಿಕಾ ದೇವಸ್ಥಾನ ಸೇರಿದಂತೆ ಕರಾವಳಿಯ ಪ್ರಮುಖ ದೇವಸ್ಥಾನಗಳಿಗೆ ಭಕ್ತರ ದಂಡು ಹರಿದು ಬರುತ್ತಿದೆ.

ಶುಕ್ರವಾರ, ಶನಿವಾರ, ರವಿವಾರ ಮೂರು ದಿನಗಳ ಸರಣಿ ರಜೆಗಳ ಹಿನ್ನೆಲೆಯಲ್ಲಿ ಗುರುವಾರ ರಾತ್ರಿಯಿಂದಲೇ ಅಧಿಕ ಸಂಖ್ಯೆಯ ಭಕ್ತರ ಆಗಮನ ಆರಂಭಗೊಂಡಿತ್ತು. ಶುಕ್ರವಾರವೂ ಅಧಿಕ ಸಂಖ್ಯೆಯ ಭಕ್ತರು ಕ್ಷೇತ್ರಕ್ಕೆ ಭೇಟಿ ನೀಡಿದ್ದರು. ಶನಿವಾರ ಮತ್ತೂ ಅಧಿಕ ಭಕ್ತರ ಆಗಮನವಾಗಿದೆ.

ಸುಬ್ರಹ್ಮಣ್ಯದ ಕುಮಾರಪರ್ವತ ಚಾರಣಕ್ಕೆ ಶನಿವಾರವೂ ಚಾರಣಿಗರ ದಂಡು ಹರಿದು ಬಂದಿದೆ.

ಕೊಲ್ಲೂರು ದೇಗುಲ
ಕೊಲ್ಲೂರಿನಲ್ಲಿ ಶನಿವಾರ ಶ್ರೀದೇವಿಯ ದರ್ಶನಕ್ಕೆ ನೂಕುನುಗ್ಗಲು ಕಂಡುಬಂತು. ಕರ್ನಾಟಕ ಸಹಿತ ವಿವಿಧ ರಾಜ್ಯಗಳಿಂದ ಆಗಮಿಸಿದ್ದ 30 ಸಾವಿರಕ್ಕೂ ಮಿಕ್ಕಿ ಭಕ್ತರು ವಾಸ್ತವ್ಯಕ್ಕಾಗಿ ಪರದಾಡಬೇಕಾಯಿತು. ಭಕ್ತರ ಅನಾಯಾಸ ದರ್ಶನಕ್ಕೆ ಸಿಬಂದಿ ಹರಸಾಹಪಡಬೇಕಾಯಿತು. ಎಲ್ಲ ವಸತಿಗೃಹಗಳು ಭರ್ತಿಯಾಗಿರುವುದರಿಂದ ಅನೇಕ ಭಕ್ತರು ವಾಸ್ತವ್ಯಕ್ಕಾಗಿ ಕುಂದಾಪುರವನ್ನು ಅವಲಂಬಿಸಬೇಕಾಯಿತು.