ರವಿಚಂದ್ರನ್‌ ಪುತ್ರ ಮನೋರಂಜನ್‌ “ಸಾಹೇಬ’ ಚಿತ್ರದಲ್ಲಿ ನಟಿಸುತ್ತಿರೋದು ಎಲ್ಲರಿಗೂ ಗೊತ್ತು. ಆದರೆ, ಅವರ ಗೆಟಪ್‌ ಏನು, ಯಾವ ಪಾತ್ರ ನಿರ್ವಹಿಸುತ್ತಿದ್ದಾರೆ ಅನ್ನೋದು ಬಹುಶಃ ಯಾರಿಗೂ ಗೊತ್ತಿರಲಿಕ್ಕಿಲ್ಲ. ಈಗ “ಸಾಹೇಬ’ ಚಿತ್ರದ ಕೆಲ ಫೋಟೋಗಳು
“ಉದಯವಾಣಿ’ಗೆ ಲಭ್ಯವಾಗಿವೆ.
ಈ ಫೋಟೋಗಳನ್ನು ಗಮನಿಸಿದರೆ, ಮನೋರಂಜನ್‌ ದನ, ಹಸು, ಕುರಿಗಳನ್ನು ಕಾಯುತ್ತಿರುವಂತಿದೆಯಲ್ಲಾ? ಅನ್ನೋದೇನು ಕಾಯುತ್ತಿದ್ದಾರೆ ಎಂಬುದಕ್ಕೆ ಈ ಫೋಟೋಗಳಿಗಿಂತ ಸಾಕ್ಷಿ ಬೇಕಾ? ಇರಲಿ, ಇದು ಸಿನಿಮಾರಂಗ. ಹಾಗಾಗಿ, ಇಲ್ಲಿ ನಟ ಯಾವ ಪಾತ್ರವೇ ಇರಲಿ. ಅದನ್ನು ಕಣ್ಣಿಗೊತ್ತಿ ಮಾಡಲೇಬೇಕು.
ಅಂದಹಾಗೆ, ಈ ದೃಶ್ಯ ಒಂದು ಸಂದರ್ಭದಲ್ಲಿ ಬರುವಂಥದ್ದಂತೆ. ಮೊದಲ ಸಿನಿಮಾದಲ್ಲೇ ಮನೋರಂಜನ್‌ ತುಂಬ ಪ್ರೀತಿಯಿಂದ ಒಂದು ಸನ್ನಿವೇಶದಲ್ಲಿ ಬರುವ ಈ ಪಾತ್ರದಲ್ಲಿ ಕಾಣಿಸಿಕೊಂಡಿರುವುದನ್ನು ನೋಡಿದರೆ, ಅವರಲ್ಲಿರುವ ಆಳವಾದ ಸಿನಿಮಾ ಪ್ರೀತಿ ತೋರುತ್ತದೆ. ಸದ್ಯಕ್ಕೆ ಈ ಫೋಟೋ ನೋಡಿ, ಪಾತ್ರ ಏನಿರಬಹುದು ಎಂದು ಊಹಿಸುತ್ತಿರಿ.
ಇಷ್ಟರಲ್ಲೇ ಸಿನಿಮಾ ಕೂಡ ತೆರೆಗೆ ಬರಲು ಎಲ್ಲಾ ತಯಾರಿ ಮಾಡಿಕೊಳ್ಳುತ್ತಿದೆ. ನಿಮ್ಮ ಆ ಊಹೆ ನಿಜವಾಗಿರಲೂಬಹುದೇನೋ? ರವಿಚಂದ್ರನ್‌ ಅವರ ಪುತ್ರ ಮನೋರಂಜನ್‌ “ಸಾಹೇಬ’ ಎಂಬ ಚಿತ್ರಕ್ಕೆ ಹೀರೋ ಅಂತ ಯಾವಾಗ ಅನೌನ್ಸ್‌ ಮಾಡಲಾಯಿತೋ, ಆಗಿನಿಂದಲೇ “ಸಾಹೇಬ’ನ ಮೇಲೆ ಸಿಕ್ಕಾಪಟ್ಟೆ ನಿರೀಕ್ಷೆಗಳು ಹೆಚ್ಚಾಗಿವೆ.
ಆ ನಿರೀಕ್ಷೆಯನ್ನು ನಮಗೆ ಸಿಕ್ಕಿರುವ ಫೋಟೋಗಳು ಹೆಚ್ಚಿಸಿವೆ. ಭರತ್‌ “ಸಾಹೇಬ’ ಚಿತ್ರವನ್ನು ನಿರ್ದೇಶಿಸುತ್ತಿದ್ದಾರೆ. ಜಯಣ್ಣ, ಭೋಗೇಂದ್ರ ನಿರ್ಮಾಪಕರು. ಸೀತಾರಾಮ್‌ ಈ ಚಿತ್ರದ ಛಾಯಾಗ್ರಾಯಕರು ಮಾರ್ಚ್‌ 24 ರಂದು ಬಿಡುಗಡೆಯಾಗುತ್ತಿರುವ “ರಾಜಕುಮಾರ’ ಚಿತ್ರದ ಜತೆಯಲ್ಲಿ “ಸಾಹೇಬ’ ಚಿತ್ರದ ಟ್ರೇಲರ್‌ ಬಿಡುಗಡೆಯಾಗುತ್ತಿದೆ ಎಂಬುದು ವಿಶೇಷ.
