ತೇಲಿ ತೇಲಿ ಹೋಗುತಿದೆ ನೋಡಾ!

ಜೋರಾಗಿ ಗಾಳಿ ಬೀಸಿದಾಗ ತರಗಲೆಗಳೆಲ್ಲ ಭೂಮಿಯಿಂದ ಮೇಲಕ್ಕೆ ಹಾರೋದನ್ನು ನೋಡಿದ್ದೇವೆ. ಹಾಗೆ ಹಾರುವಾಗ ಒಂದೊಂದು ಎಲೆಗಳು ಒಂದೊಂದು ದಿಕ್ಕಿನಲ್ಲಿ ಹಾರಿಹೋಗುತ್ತವೆ. ಆದರೆ, ನಿಯಂತ್ರಿತವಾಗಿ ಕೈಯಲ್ಲಿ ಹಿಡಿದ ಇಸ್ಪೀಟ್‌ ಎಲೆಯನ್ನು ಮೇಲಕ್ಕೇರಿಸೋದು ಹೇಗೆಂದು ಗೊತ್ತಾ? ಯಾರದೇ ಸಹಾಯವಿಲ್ಲದೆ ನಿಧಾನವಾಗಿ ಮೇಲಕ್ಕೆ ಏರಿಸುವ ವಿದ್ಯೆ ನಿಮಗೂ ತಿಳಿಯಬೇಕೆಂದರೆ ಈ ಮ್ಯಾಜಿಕ್‌ ತಂತ್ರವನ್ನು ಓದಿ.  

ಬೇಕಾಗುವ ವಸ್ತುಗಳು: 
ಇಸ್ಪೀಟ್‌ ಕಾರ್ಡ್‌, ಅಂಟು ಹಾಗೂ ಸುಲಭವಾಗಿ ಮಡಚಿಕೊಳ್ಳುವಂಥ ಪಾರದರ್ಶಕ ಪ್ಲಾಸ್ಟಿಕ್‌ ತುಣುಕು. 

ಪ್ರದರ್ಶನ: 
ಜಾದೂಗಾರ ಕೈಯಲ್ಲಿ ಒಂದು ಇಸ್ಪೀಟ್‌ ಕಾರ್ಡ್‌ ಹಿಡಿದಿರುತ್ತಾನೆ. ಅದನ್ನು ಎಲ್ಲರಿಗೂ ಎತ್ತಿ ತೋರಿಸುತ್ತಾನೆ. ನಂತರ ಅದನ್ನು ಅಂಗೈ ಮೇಲೆ ಇಟ್ಟುಕೊಂಡು, ಜಾದೂಮಂತ್ರ ಪಠಿಸುತ್ತಾನೆ. ಆಗ ಆ ಇಸ್ಪೀಟ್‌ ಕಾರ್ಡ್‌ ನಿಧಾನಕ್ಕೆ ಮೇಲೆ ಎದ್ದು ಬರುತ್ತದೆ. 

ತಯಾರಿ: 
ಈ ಜಾದೂವಿನ ರಹಸ್ಯ ಅಡಗಿರುವುದು ಇಸ್ಪೀಟ್‌ ಕಾರ್ಡ್‌ನ ಹಿಂಭಾಗದಲ್ಲಿ. ಅದೇನೆಂದರೆ, ಜಾದೂ ಪ್ರದರ್ಶನಕ್ಕಿಂತ ಮೊದಲು ಇಸ್ಪೀಟ್‌ ಕಾರ್ಡ್‌ನ ಹಿಂದೆ ಗ್ಲೂ ಡಾಟ್‌ ಅಥವಾ ಅಂಟು ಬಳಸಿ ಒಂದು ಪಾರದರ್ಶಕ ಪ್ಲಾಸ್ಟಿಕ್‌ ಪೀಸ್‌(ರಟ್‌ನಷ್ಟು ಗಾತ್ರದ್ದು) ಅನ್ನು ಅಂಟಿಸಿ. ಕಾರ್ಡ್‌ಅನ್ನು ಕೈಯಲ್ಲಿ ಹಿಡಿದಾಗ, ಆ ಪ್ಲಾಸ್ಟಿಕ್‌ ತುಣುಕು ನಿಮ್ಮ ಹೆಬ್ಬೆರಳು ಹಾಗೂ ಉಳಿದ ಬೆರಳುಗಳಿಗೆ ತಾಗುವಂತಿರಬೇಕು ಹಾಗೂ ಸುಲಭವಾಗಿ ಮಡಚಿಕೊಳ್ಳುವಂತಿರಬೇಕು. ನೀವು ಆ ಪ್ಲಾಸ್ಟಿಕ್‌ ಅನ್ನು ನಿಧಾನವಾಗಿ ಒಳಗೆ ತಳ್ಳಿದಾಗ, ಇಸ್ಪೀಟ್‌ ಕಾರ್ಡ್‌ ತನ್ನಿಂತಾನೇ ಮೇಲೆದ್ದು ಬರುತ್ತದೆ. ಅದು ನೋಡುಗರಿಗೆ ಕಾರ್ಡ್‌ ಗಾಳಿಯಲ್ಲಿ ಚಲಿಸುತ್ತಿದೆ ಎಂದೆನಿಸುತ್ತದೆ. 
ಈ ಜಾದೂ ಪ್ರದರ್ಶನಕ್ಕೆ ಮುನ್ನ ಹತ್ತಾರು ಬಾರಿ ನಿಮ್ಮಷ್ಟಕ್ಕೆ ನೀವು ಪ್ರಯೋಗ ಮಾಡಿ ಕೈ ಚಳಕವನ್ನು ಕರಗತ ಮಾಡಿಕೊಳ್ಳಿ. 

ವಿನ್ಸೆಂಟ್‌ ಲೋಬೋ