ಸಂಜೀವನಿ 2 ವರ್ಷ ಅಮಾನತು

ಹೊಸದಿಲ್ಲಿ: ಉದ್ದೀಪನ ಸೇವನೆ ಪ್ರಕರಣದಲ್ಲಿ ಸಿಕ್ಕಿಬಿದ್ದಿರುವ ಭಾರತದ ಮ್ಯಾರಥಾನ್‌ ಓಟಗಾರ್ತಿ ಸಂಜೀವನಿ ಯಾದವ್‌ ಐಎಎಎಫ್ ಆ್ಯತ್ಲೆಟಿಕ್ಸ್‌ ಸಮಗ್ರತೆ ಘಟಕದಿಂದ (ಎಐಯು) 2 ವರ್ಷ ಅಮಾನತಿಗೆ ಒಳಗಾಗಿದ್ದಾರೆ.

23 ವರ್ಷದ ಸಂಜೀವನಿ 2019 ಏಶ್ಯನ್‌ ಚಾಂಪಿಯನ್‌ಶಿಪ್‌ನಲ್ಲಿ 10 ಸಾವಿರ ಮೀ. ಓಟದಲ್ಲಿ ಕಂಚು, 2017 ಏಶ್ಯನ್‌ ಚಾಂಪಿಯನ್‌ಶಿಪ್‌ನಲ್ಲಿ 10 ಸಾವಿರ ಮೀ. ಓಟದಲ್ಲಿ ಕಂಚಿನ ಪದಕ ಗೆದ್ದಿದ್ದರು. ಅಲ್ಲದೆ ದೇಶೀಯ ಮಟ್ಟದಲ್ಲಿ ಹಲವಾರು ಪದಕ ಗೆದ್ದಿದ್ದರು. ಇದೀಗ 29 ಜೂ. 2018ರ ಬಳಿಕ ಗೆದ್ದ ಎಲ್ಲ ಪದಕವನ್ನು ಸಂಜೀವನಿ ಕಳೆದುಕೊಳ್ಳಲಿದ್ದಾರೆ. ಈ ದಿನಾಂಕದಿಂದ ಮುಂದಿನ 2 ವರ್ಷ ಅವರು ಯಾವುದೇ ಕೂಟದಲ್ಲಿ ಪಾಲ್ಗೊಳ್ಳುವಂತಿಲ್ಲ ಎಂದು ಎಐಯು ತಿಳಿಸಿದೆ.