2022 ಸ್ಟಾರ್ ಧಮಾಕಾ! ಮುಂಚೂಣಿ ನಟರ ದರ್ಶನ ಭಾಗ್ಯ

ಒಂದು ಕಡೆ ಸ್ಟಾರ್‌ ಸಿನಿಮಾ, ಮತ್ತೂಂದು ಕಡೆ ಹೊಸಬರ ಸಿನಿಮಾ, ಸೋಲು -ಗೆಲುವು, ಲಾಭ-ನಷ್ಟ… ಈ ಲೆಕ್ಕಾಚಾರದಲ್ಲೇ 2022ರ ಏಳು ತಿಂಗಳು ಮುಗಿಯುತ್ತಾ ಬಂದಿದೆ. ಹಾಗಂತ ಬಿಡುಗಡೆಯಾಗುತ್ತಿರುವ ಸಿನಿಮಾಗಳ ಸಂಖ್ಯೆಯಲ್ಲೇನೂ ಕಡಿಮೆಯಾಗಿಲ್ಲ. ವಾರವಾರ ಐದಾರು ಸಿನಿಮಾಗಳು ಬಿಡುಗಡೆಯಾಗುತ್ತಲೇ ಇವೆ. ಇದು ಈ ವರ್ಷದ ವಿಶೇಷ ಕೂಡಾ. ಈ ವರ್ಷ ಸೂಕ್ಷ್ಮವಾಗಿ ಗಮನಿಸಬೇಕಾದ ಮತ್ತೂಂದು ಅಂಶವೆಂದರೆ ಸ್ಟಾರ್‌ಗಳ ಸಿನಿಮಾ.  ಈ ವರ್ಷ ಕನ್ನಡ ಚಿತ್ರರಂಗದ ಬಹುತೇಕ ಎಲ್ಲಾ ಸ್ಟಾರ್‌ಗಳು ಕೂಡಾ ತೆರೆಮೇಲೆ ದರ್ಶನ ಕೊಡುತ್ತಿದ್ದಾರೆ.

ಒಂದಷ್ಟು ಸ್ಟಾರ್‌ಗಳ ಈ ಸಿನಿಮಾ ಈ ಏಳು ತಿಂಗಳಲ್ಲಿ ಬಿಡುಗಡೆಯಾದರೆ ಇನ್ನು ಉಳಿದ ಸ್ಟಾರ್‌ ನಟರ ಚಿತ್ರಗಳು ಮುಂದಿನ ಐದು ತಿಂಗಳಲ್ಲಿ ಬಿಡುಗಡೆಯಾಗಲಿದೆ. ಇದು 2022ರ ಸಿನಿ ವಿಶೇಷಗಳಲ್ಲಿ ಒಂದು. ಈ ಹಿಂದಿನ ಕೆಲವು ವರ್ಷಗಳನ್ನು ಗಮನಿಸಿದರೆ ಅನೇಕ ಸ್ಟಾರ್‌ಗಳ ಸಿನಿಮಾ ಆ ವರ್ಷದಲ್ಲಿ ಬಿಡುಗಡೆಯಾಗಿಲ್ಲ. ಈ ಮೂಲಕ ಅವರ ಅಭಿಮಾನಿಗಳು ಕೂಡಾ “ನಮ್ಮ ಬಾಸ್‌ ಸಿನಿಮಾ ಈ ವರ್ಷ ಬರಲೇ ಇಲ್ಲ’ ಎಂದು ಬೇಸರ ಮಾಡಿಕೊಂಡಿದ್ದೂ ಇದೆ. ಆದರೆ, 2022ರಲ್ಲಿ ಆ ಬೇಸರಕ್ಕೆ ಅವಕಾಶವೇ ಇಲ್ಲ. ಎಲ್ಲಾ ಸ್ಟಾರ್‌ ನಟರ ಚಿತ್ರಗಳು ಈ ವರ್ಷ ತೆರೆಮೇಲೆ ಬರುತ್ತಿದೆ.

2022ರಲ್ಲಿ ತೆರೆಗೆ ಬಂದ ಹಾಗೂ ಬರುತ್ತಿರುವ ಸ್ಟಾರ್‌ ಸಿನಿಮಾಗಳ ಕುರಿತು ಲೆಕ್ಕ ಹಾಕುತ್ತಾ ಹೋದರೆ ನಿಮಗೆ ಅಲ್ಲಿ “ಸ್ಟಾರ್‌ ಜಾತ್ರೆ’ ಕಣ್ಮುಂದೆ ಬರುತ್ತದೆ. ಪುನೀತ್‌ ರಾಜ್‌ಕುಮಾರ್‌, ಶಿವರಾಜ್‌ಕುಮಾರ್‌, ಸುದೀಪ್‌, ದರ್ಶನ್‌, ವಿಜಯ್‌, ಧ್ರುವ, ಗಣೇಶ್‌, ರಕ್ಷಿತ್‌ ಶೆಟ್ಟಿ, ಉಪೇಂದ್ರ, ರವಿಚಂದ್ರನ್‌, ಜಗ್ಗೇಶ್‌, ರಿಷಭ್‌, ಧನಂಜಯ್‌, ಕೃಷ್ಣ … ಇವರೆಲ್ಲರೂ ಈ ವರ್ಷ ತೆರೆಮೇಲೆ ದರ್ಶನ ನೀಡಿದ್ದಾರೆ, ನೀಡಲಿದ್ದಾರೆ.

ಅವರ ಸಿನಿಮಾಗಳ ಬಗ್ಗೆ ಹೇಳುವುದಾದರೆ, ಪುನೀತ್‌ರಾಜ್‌ಕುಮಾರ್‌ ನಟನೆಯ “ಜೇಮ್ಸ್‌’ ಚಿತ್ರ ಮಾರ್ಚ್‌ನಲ್ಲಿ ತೆರೆಕಂಡಿದ್ದು, ಈಗ ಅವರ ಕನಸಿನ “ಗಂಧದ ಗುಡಿ’ ಅಕ್ಟೋಬರ್‌ನಲ್ಲಿ ತೆರೆಗೆ ಬರಲಿದೆ. ಇದರ ಜೊತೆಗೆ ಅತಿಥಿ ಪಾತ್ರದಲ್ಲಿ ಕಾಣಿಸಿಕೊಂಡಿರುವ “ಲಕ್ಕಿಮ್ಯಾನ್‌’ ಆಗಸ್ಟ್‌ನಲ್ಲಿ ತೆರೆಕಾಣಲಿದೆ.

ಶಿವರಾಜ್‌ಕುಮಾರ್‌ ಅವರ “ಬೈರಾಗಿ’ ಚಿತ್ರ ಈಗಾಗಲೇ ತೆರೆಕಂಡಿದ್ದು, ಅವರದ್ದೇ ನಿರ್ಮಾಣದ “ವೇದಾ’ ಡಿಸೆಂಬರ್‌ನಲ್ಲಿ ತೆರೆಗೆ ಬರಲಿದೆ. ಅಲ್ಲಿಗೆ ಈ ವರ್ಷ ಶಿವಣ್ಣ ನಟನೆಯ ಎರಡು ಸಿನಿಮಾ ತೆರೆಕಂಡಂತಾಗುತ್ತದೆ. ಇನ್ನು, ಸುದೀಪ್‌ ಅವರ “ವಿಕ್ರಾಂತ್‌ ರೋಣ’ ಜು.28ಕ್ಕೆ ತೆರೆಕಂಡರೆ, ದರ್ಶನ್‌ ನಟನೆಯ “ಕ್ರಾಂತಿ’ ಕೂಡಾ ಈ ವರ್ಷವೇ ತೆರೆಗೆ ಬರಲಿದ್ದ, ಪೋಸ್ಟ್‌ ಪ್ರೊಡಕ್ಷನ್‌ ಕೆಲಸಗಳು ಭರದಿಂದ ಸಾಗುತ್ತಿವೆ.

ಇದನ್ನೂ ಓದಿ:ಗುಮ್ಮ ಬಂದ ಗುಮ್ಮ! ‘ವಿಕ್ರಾಂತ್‌ ರೋಣ’ ಮತ್ತೊಂದು ಹಾಡು ಬಂತು

ದುನಿಯಾ ವಿಜಯ್‌ ನಟನೆಯ “ಭೀಮ’ ಚಿತ್ರದ ಚಿತ್ರೀಕರಣ ಜೋರಾಗಿ ಸಾಗುತ್ತಿದ್ದು, ಈ ವರ್ಷಾಂತ್ಯಕ್ಕೆ ತೆರೆಗೆ ಬಂದರೆ, ಧ್ರುವ ನಟನೆಯ “ಮಾರ್ಟಿನ್‌’, ಗಣೇಶ್‌ ನಟನೆಯ “ಗಾಳಿಪಟ-2′, ರಕ್ಷಿತ್‌ ಶೆಟ್ಟಿ “ಸಪ್ತಸಾಗರದಾಚೆ ಎಲ್ಲೋ’ ಚಿತ್ರಗಳು ಈಗಾಗಲೇ ಬಿಡುಗಡೆಯ ತಯಾರಿ ಮಾಡಿಕೊಂಡಿವೆ. ಇನ್ನು, ಉಪೇಂದ್ರ ನಟನೆಯ “ಕಬ್ಜ’ ಚಿತ್ರ ಪೋಸ್ಟ್‌ ಪ್ರೊಡಕ್ಷನ್‌ನಲ್ಲಿ ತೊಡಗಿದ್ದು, ಈ ವರ್ಷವೇ ತೆರೆಗೆ ಬರಲಿದೆ. ಇದರ ಜೊತೆಗೆ ರವಿಚಂದ್ರನ್‌ ನಟನೆ, ನಿರ್ದೇಶನದ “ರವಿ ಬೋಪಣ್ಣ’, ಜಗ್ಗೇಶ್‌ ನಾಯಕರಾಗಿರುವ “ತೋತಾಪುರಿ’, “ರಾಘವೇಂದ್ರ ಸ್ಟೋರ್’, ರಿಷಭ್‌ “ಕಾಂತಾರ’, ಧನಂಜಯ್‌ “ಮಾನ್ಸೂನ್‌ ರಾಗ’, “ಜಮಾಲಿಗುಡ್ಡ’ ಚಿತ್ರಗಳು ತೆರೆಕಾಣಲಿವೆ.

ಇದು ಈ ವರ್ಷದ ಲೆಕ್ಕಾಚಾರವಾದರೆ ಮುಂದಿನ ವರ್ಷ ಅಂದರೆ 2023ರಲ್ಲಿ ಇದೇ ರೀತಿ ಎಲ್ಲಾ ಸ್ಟಾರ್‌ಗಳ ಸಿನಿಮಾಗಳು ತೆರೆಕಾಣುತ್ತವೆ ಎಂದು ಹೇಳುವಂತಿಲ್ಲ. ಏಕೆಂದರೆ ಅನೇಕ ಸ್ಟಾರ್‌ ನಟರ ಹೊಸ ಸಿನಿಮಾಗಳು ಇನ್ನೂ ಸೆಟ್ಟೇರಿಯೇ ಇಲ್ಲ.ಆದರೆ, ಈ ವರ್ಷ ಮಾತ್ರ ಕನ್ನಡ ಚಿತ್ರರಂಗ ಕಲರ್‌ಫ‌ುಲ್‌ ಆಗಿ ಸಾಗಲಿರುವುದರಲ್ಲಿ ಯಾವುದೇ ಅನುಮಾನವಿಲ್ಲ.

 ರವಿಪ್ರಕಾಶ್‌ ರೈ