ಸೈನಾ ನೆಹ್ವಾಲ್‌ ಫೈನಲಿಗೆ

ಸರವಾಕ್‌ (ಮಲೇಶ್ಯ): ಉತ್ತಮ ಫಾರ್ಮ್ನಲ್ಲಿರುವ ಭಾರತದ ಸೈನಾ ನೆಹ್ವಾಲ್‌ ಹಾಂಕಾಂಗ್‌ನ ಯಿಪ್‌ ಪುಯಿಯಿನ್‌ ಅವರನ್ನು ಸೋಲಿಸಿ ಮಲೇಶ್ಯ ಮಾಸ್ಟರ್ ಗ್ರ್ಯಾನ್‌ ಪ್ರಿ ಗೋಲ್ಡ್‌ ಬ್ಯಾಡ್ಮಿಂಟನ್‌ ಕೂಟದ ಫೈನಲ್‌ ಹಂತಕ್ಕೇರಿದ್ದಾರೆ.

ಮಂಡಿ ನೋವಿಗೆ ಶಸ್ತ್ರಚಿಕಿತ್ಸೆ ಮಾಡಿಕೊಂಡ ಬಳಿಕ ಚೇತರಿಸಿಕೊಂಡಿರುವ ಸೈನಾ ಇಲ್ಲಿ ಪ್ರಶಸ್ತಿ ಗೆಲ್ಲುವ ಭರವಸೆ ಮೂಡಿಸಿದ್ದಾರೆ. ಏಕಮುಖವಾಗಿ ಸಾಗಿದ ಸೆಮಿಫೈನಲ್‌ ಹೋರಾಟದಲ್ಲಿ ಸೈನಾ ಐದನೇ ಶ್ರೇಯಾಂಕದ ಯಿನ್‌ ಅವರನ್ನು 21-13, 21-10 ಗೇಮ್‌ಗಳಿಂದ ಸೋಲಿಸಿ ಪ್ರಶಸ್ತಿ ಸುತ್ತಿಗೇರಿದರು.

ಕಳೆದ ವರ್ಷ ಆಸ್ಟ್ರೇಲಿಯನ್‌ ಓಪನ್‌ ಗೆದ್ದಿರುವ 26ರ ಹರೆಯದ ಸೈನಾ ಪ್ರಶಸ್ತಿಗಾಗಿ ಥಾçಲಂಡಿನ ಪೋರ್ನ್ಪಾವಿ ಚೊಚುವಾಂಗ್‌ ಅವರನ್ನು ಎದುರಿಸಲಿದ್ದಾರೆ. ವಿಶ್ವದ 67ನೇ ರ್‍ಯಾಂಕಿನ ಚೊಚುವಾಂಗ್‌ ಅವರು ಇನ್ನೊಂದು ಸೆಮಿಫೈನಲ್‌ನಲ್ಲಿ ವಿಶ್ವದ 19ನೇ ರ್‍ಯಾಂಕಿನ ಚಿಯುಂಗ್‌ ನಗನ್‌ ಯಿ ಅವರನ್ನು ಕಠಿನ ಹೋರಾಟದಲ್ಲಿ 21-19, 20-22, 21-18 ಗೇಮ್‌ಗಳಿಂದ ಉರುಳಿಸಿದ್ದರು. ಈ ಪಂದ್ಯ ಒಂದು ತಾಸು ಮತ್ತು 16 ನಿಮಿಷಗಳವರೆಗೆ ಸಾಗಿತ್ತು.