ಸಿಡ್ನಿ: ಮೆಲ್ಬರ್ನ್ ನಗರದ ರಾಕ್‌ಬ್ಯಾಂಕ್‌ ಉಪ ನಗರದಲ್ಲಿ ಅಭಿವೃದ್ಧಿಪಡಿಸುತ್ತಿರುವ ಹೊಸ ಹೌಸಿಂಗ್‌ ಎಸ್ಟೇಟ್‌ನ ಪ್ರಮುಖ ಬೀದಿಗಳಿಗೆ ಭಾರತ ಕ್ರಿಕೆಟ್‌ ತಂಡದ ದಿಗ್ಗಜರಾದ ಸಚಿನ್ ತೆಂಡುಲ್ಕರ್‌, ಕಪಿಲ್‌ ದೇವ್‌ ಹಾಗೂ ವಿರಾಟ್‌ ಕೊಹ್ಲಿಯ ಹೆಸರನ್ನು ಇಡಲಾಗಿದೆ. ಆ್ಯಕೋಲೇಡ್‌ ಎಸ್ಟೇಟ್‌ ಸಂಸ್ಥೆಯು ಇದನ್ನು ನಿರ್ಮಿಸುತ್ತಿದೆ. ಮೂಲಗಳ ಪ್ರಕಾರ ಆಸ್ಟ್ರೇಲಿಯದಲ್ಲಿ ನೆಲೆಸಿರುವ ಭಾರತೀಯ ಮೂಲದವರನ್ನು ಸೆಳೆಯಲು ಪ್ರಮುಖ ಬೀದಿಗಳಿಗೆ ಭಾರತ ಕ್ರಿಕೆಟ್‌ ಮಾಂತ್ರಿಕರ ಹೆಸರನ್ನು ಇಡಲಾಗಿದೆ ಎನ್ನಲಾಗಿದೆ. “ತೆಂಡೂಲ್ಕರ್‌ ಡ್ರೈವ್‌’, ‘ಕೊಹ್ಲಿ ಕ್ರೆಸೆಂಟ್‌’, ‘ದೇವ್‌ ಟೆರೆಸ್‌’ ಎಂದು ಬೀದಿಗಳಿಗೆ ಹೆಸರಿಡಲಾಗಿದೆ. ಇವರ ಜತೆಗೆ ಆಸೀಸ್‌ ಮಾಜಿ ಕ್ರಿಕೆಟಿಗ ಸ್ಟೀವ್‌ ವಾ, ಪಾಕಿಸ್ತಾನ ಕ್ರಿಕೆಟ್‌ ದಿಗ್ಗಜ ಮಿಯಾಂದಾದ್‌, ವಿಂಡೀಸ್‌ನ ದೈತ್ಯ ತಾರೆ ಗ್ಯಾರಿ ಸೋಬರ್ಸ್‌, ಆಫ್ರಿಕಾ ಮಾಜಿ ಕ್ರಿಕೆಟಿಗ ಜಾಕ್‌ ಕಾಲೀಸ್‌ ಸೇರಿದಂತೆ ಹಲವು ಆಟಗಾರರ ಹೆಸರನ್ನು ಬೀದಿಗಳಿಗೆ ನಾಮಕರಣ ಮಾಡಲಾಗಿದೆ ಎಂದು ವರದಿಯಾಗಿದೆ.
