ರಣಜಿಯತ್ತ ಎಸ್‌. ಶ್ರೀಶಾಂತ್‌

ತಿರುವನಂತಪುರ: ಭಾರತ ಕ್ರಿಕೆಟ್‌ ತಂಡದ ಮಾಜಿ ವೇಗದ ಬೌಲರ್‌, ಕೇರಳದ ಎಸ್‌. ಶ್ರೀಶಾಂತ್‌ ಈ ಬಾರಿಯೂ ಐಪಿಎಲ್‌ನಲ್ಲಿ ಆಡುವ ಅವಕಾಶ ಪಡೆದಿಲ್ಲ.

ಮೆಗಾ ಹರಾಜು ಪಟ್ಟಿಯಲ್ಲಿ ಶ್ರೀಶಾಂತ್‌ ಹೆಸರಿದ್ದರೂ ಅವರ ಹೆಸರನ್ನು ಕೂಗಲು ಸಮಯವೇ ಸಿಗಲಿಲ್ಲ. ಇದರಿಂದ ಶ್ರೀಶಾಂತ್‌ ತೀವ್ರ ನಿರಾಸೆ ಗೊಂಡಿದ್ದಾರೆ. ಹಾಗಂತ ಅವರು ಕೊರಗುತ್ತ ಕುಳಿತಿಲ್ಲ. ಬದಲಿಗೆ ಕೇರಳ ಪರ ರಣಜಿ ಆಡಲು ಸಿದ್ಧವಾಗುತ್ತಿದ್ದಾರೆ.

ಸಯ್ಯದ್‌ ಮುಷ್ತಾಕ್‌ ಅಲಿ ಟಿ20ಯಲ್ಲಿ ಅದ್ಭುತವಾಗಿಯೇ ಬೌಲಿಂಗ್‌ ನಡೆಸಿ ಶ್ರೀಶಾಂತ್‌ ಸುದ್ದಿಯಾಗಿದ್ದರು. ಈ ಹಿನ್ನೆಲೆಯಲ್ಲಿ ಅವರು ಐಪಿಎಲ್‌ಗೆ ಆಯ್ಕೆಯಾಗುವ ನಿರೀಕ್ಷೆಯಿತ್ತು. ಅದೀಗ ಹುಸಿಯಾಗಿದೆ. ಆದರೆ ಶ್ರೀಶಾಂತ್‌ ಪಾಲಿಗೆ ಐಪಿಎಲ್‌ ಮುಗಿದೇ ಹೋಯಿತು ಎನ್ನುವಂತಿಲ್ಲ.

ಯಾವುದಾದರೂ ಒಂದು ತಂಡ ನೇರವಾಗಿ ಅವರನ್ನು ಖರೀದಿಸುವ ಅವಕಾಶವಂತೂ ಇದೆ.