ಹ್ಯಾಕ್‌ ಆರೋಪ ನಿರಾಕರಿಸಿದ ರಷ್ಯಾ

ಲಂಡನ್‌: ಕೋವಿಡ್ ವೈರಸ್‌ಗೆ ಔಷಧ ಕಂಡುಹಿಡಿಯಲು ಯತ್ನಿಸುತ್ತಿರುವ ಪ್ರಯೋಗಾಲಯಗಳಲ್ಲಿರುವ ಕಂಪ್ಯೂಟರ್‌ ಹ್ಯಾಕ್‌ ಮಾಡಲು, ರಷ್ಯಾದ ಹ್ಯಾಕರ್‌ಗಳು ಯತ್ನಿಸುತ್ತಿದ್ದಾರೆ ಎಂಬ ಆರೋಪವನ್ನು ಇಂಗ್ಲೆಂಡ್‌ನ‌ಲ್ಲಿರುವ ರಷ್ಯಾದ ರಾಯಭಾರಿ ಆಂಡ್ರೆ ಕೆಲಿನ್‌ ತಿರಸ್ಕರಿಸಿದ್ದಾರೆ.

“”ಇಂತಹ ವರದಿಗಳು ನಿರಾಧಾರ, ನನಗೆ ಹೀಗೊಂದು ಹ್ಯಾಕಿಂಗ್‌ ಪ್ರಯತ್ನ ನಡೆಯುತ್ತಿರುವುದು ಗೊತ್ತಾಗಿದ್ದೇ ಬ್ರಿಟನ್‌ ಮಾಧ್ಯಮಗಳಿಂದ ಎಂದು ಕೆಲಿನ್‌ ಹೇಳಿದ್ದಾರೆ. ಕಳೆದ ಗುರುವಾರ ಇಂಗ್ಲೆಂಡ್‌, ಅಮೆರಿಕ, ಕೆನಡಾಗಳು, ಎಪಿಟಿ29 ಎಂಬ ಹ್ಯಾಕರ್‌ಗಳ ಗುಂಪಿನ ವಿರುದ್ಧ ವಾಗ್ಧಾಳಿ ನಡೆಸಿದ್ದವು. ಈ ಗುಂಪಿನಿಂದ ಹ್ಯಾಕ್‌ ನಡೆಯುತ್ತಿದೆ. ಇದು ಬಹುತೇಕ ರಷ್ಯಾ ಗುಪ್ತಚರ ಇಲಾಖೆಯೊಂದಿಗೆ ಸಂಬಂಧ ಹೊಂದಿರುವುದು ಖಚಿತ ಎನ್ನುವುದು ಅವುಗಳ ಆರೋಪ. ಇದನ್ನು ನಿರಾಕರಿಸಿರುವ ಕೆಲಿನ್‌, ಈ ಕಥೆಗಳನ್ನು ನಾನು ನಂಬುವುದಿಲ್ಲ. ಈಗಿನ ಕಾಲದಲ್ಲಿ ಹ್ಯಾಕರ್‌ಗಳನ್ನು ಯಾವುದೋ ಒಂದು ದೇಶಕ್ಕೆ ಸೀಮಿತಗೊಳಿಸಲಿಕ್ಕೆ ಸಾಧ್ಯವೂ ಇಲ್ಲ” ಎಂದಿದ್ದಾರೆ.