ವೊಸ್ಟೊಕ್‌ 2022: ರಷ್ಯಾದಲ್ಲಿ 50,000 ಯೋಧರ ಸಮರಾಭ್ಯಾಸ

ಮಾಸ್ಕೋ: ರಷ್ಯಾದಲ್ಲಿ ಸೆ.1ರಿಂದ 7ರವರೆಗೆ “ವೊಸ್ಟೊಕ್‌ 2022′ ಸಮರಾಭ್ಯಾಸ ನಡೆಯಲಿದೆ. ಇದರಲ್ಲಿ ಭಾರತ, ಚೀನ ಸೇರಿ ಹಲವು ರಾಷ್ಟ್ರಗಳ ಒಟ್ಟು 50 ಸಾವಿರಕ್ಕೂ ಅಧಿಕ ಯೋಧರು ಭಾಗವಹಿಸಲಿದ್ದಾರೆ ಎಂದು ರಷ್ಯಾ ಸೋಮವಾರ ತಿಳಿಸಿದೆ.

ಈ ಸಮರಾಭ್ಯಾಸದಲ್ಲಿ 5000ಕ್ಕೂ ಅಧಿಕ ಯುದ್ಧ ಸಾಮಾಗ್ರಿ, ವಾಹನಗಳು ಪಾಲ್ಗೊಳ್ಳಲಿವೆ. 140 ಯುದ್ಧ ವಿಮಾನಗಳು, 60 ಯುದ್ಧ ನೌಕೆಗಳೂ ಇದರಲ್ಲಿರಲಿವೆ.

ಭಾರತ, ಚೀನ, ಲಾವೋಸ್‌, ಮಂಗೋಲಿಯಾ, ಸಿರಿಯಾ ಸೇರಿ ಹಲವು ರಾಷ್ಟ್ರಗಳು ಸಮರಾಭ್ಯಾಸದಲ್ಲಿ ಪಾಲ್ಗೊಳ್ಳಲಿವೆ ಎಂದು ತಿಳಿಸಲಾಗಿದೆ. ಭಾರತವು ಈ ಬಗ್ಗೆ ಯಾವುದೇ ಮಾಹಿತಿ ಬಿಟ್ಟುಕೊಟ್ಟಿಲ್ಲ.

ಭಾರತವು ಈ ಹಿಂದೆ 2021ರಲ್ಲಿ ರಷ್ಯಾದಲ್ಲಿ ನಡೆದ ಜಪಾಡ್‌ ಸಮರಾಭ್ಯಾಸದಲ್ಲಿ ಭಾಗವಹಿಸಿತ್ತು. ಅದರಲ್ಲಿ ಪಾಕಿಸ್ತಾನ, ಚೀನ ಸೇರಿ ಒಟ್ಟು 17 ರಾಷ್ಟ್ರಗಳು ಭಾಗಿಯಾಗಿದ್ದವು.