ಫೇಸ್ಬುಕ್ ನಿಂದ 3 ಲಕ್ಷ ರೂ.!

ಇಂಫಾಲ್‌: ವ್ಯಾಟ್ಸ್‌ಆ್ಯಪ್‌ನಲ್ಲಿದ್ದ ಗುರುತರ ದೋಷವೊಂದನ್ನು ಪತ್ತೆಹಚ್ಚಿದ್ದ ಮಣಿಪುರದ ಯುವಕ ಝೊನೆಲ್‌ ಸೌಗೈಜಮ್‌ (22) ಎಂಬವರಿಗೆ ವಾಟ್ಸ್‌ಆ್ಯಪ್‌ ಸಂಸ್ಥೆಯ ಮಾತೃಸಂಸ್ಥೆ ಫೇಸ್‌ಬುಕ್‌, 3.47 ಲಕ್ಷ ರೂ.(5 ಸಾವಿರ ಡಾಲರ್‌) ಬಹುಮಾನ ನೀಡಿ, ಅವರನ್ನು “2019ನೇ ಸಾಲಿನ ಫೇಸ್‌ಬುಕ್‌ ಹಾಲ್‌ ಆಫ್ ಫೇಮ್‌’ನಲ್ಲಿ ಸೇರ್ಪಡೆಗೊಳಿಸಿಕೊಂಡಿದೆ.

ವಾಟ್ಸ್‌ಆ್ಯಪ್‌ ಪ್ರೋಗ್ರಾಂನಲ್ಲೇ ಒಂದು ದೋಷ (ಸಾಫ್ಟ್ವೇರ್‌ ಭಾಷೆಯಲ್ಲಿ ಇದನ್ನು “ಬಗ್‌’ ಎಂದು ಕರೆಯುತ್ತಾರೆ) ಇದ್ದಿದ್ದನ್ನು ಝೊನೆಲ್‌ ಪತ್ತೆ ಹಚ್ಚಿದ್ದರು. ಈ ದೋಷದಿಂದಾಗಿ, ವಾಟ್ಸ್‌ಆ್ಯಪ್‌ ವಿಡಿಯೋ ಕಾಲ್‌ ಸೌಲಭ್ಯದಡಿ ಒಬ್ಬ ವ್ಯಕ್ತಿ ವಿಡಿಯೋ ಕಾಲ್‌ ಮಾಡಿದಾಗ, ಆತ ಯಾರಿಗೆ ಕರೆ ಮಾಡಿದ್ದನೋ ಆತನ ಬಳಿಯಿದ್ದ ಮೊಬೈಲ್‌ನಲ್ಲಿ ಕರೆ ರಿಂಗಣಿಸುತ್ತಿದ್ದುದರ ಜತೆಗೆ, ಆತನ ಮೊಬೈಲಿನಲ್ಲಿದ್ದ ಸೆಲ್ಫಿà ಕೆಮರಾ ಚಾಲನೆಗೊಂಡು ಆತ ಆ ಹೊತ್ತಿನಲ್ಲಿ ಮಾಡುತ್ತಿದ್ದ ಚಟುವಟಿಕೆಯೆಲ್ಲವನ್ನು ಆತನ ಅರಿವಿಗೆ ಬಾರದಂತೆ ಕರೆ ಮಾಡಿದ ವ್ಯಕ್ತಿಯ ಫೋನಿನ ಪರದೆ ಮೇಲೆ ಬಿತ್ತರವಾಗುತ್ತಿತ್ತು.

ಈ ದೋಷವು ತನ್ನ ಅರಿವಿಗೆ ಬರುತ್ತಿದ್ದಂತೆ, 22 ವರ್ಷದ ಸಿವಿಲ್‌ ಎಂಜಿನಿಯರ್‌ ಝೊನೆಲ್‌, ಕೂಡಲೇ ಫೇಸ್‌ಬುಕ್‌ನ “ಬಗ್‌ ಬೌಂಟಿ ಪ್ರೋಗ್ರಾಂ’ ವಿಭಾಗದ ಗಮನಕ್ಕೆ ತಂದಿದ್ದರು. ತತ್‌ಕ್ಷಣ ಫೇಸ್‌ಬುಕ್‌ ಭದ್ರತಾ ತಂಡವು ಕಾರ್ಯ ಪ್ರವೃತ್ತವಾಗಿ, 15-20 ದಿನಗಳ ಒಳಗಾಗಿ ಸಮಸ್ಯೆಯನ್ನು ಪರಿಹರಿಸಿತು. ಜತೆಗೆ, ಬಗ್‌ ಕುರಿತು ಸರಿಯಾದ ಸಮಯಕ್ಕೆ ಮಾಹಿತಿ ಕೊಟ್ಟಿದ್ದಕ್ಕಾಗಿ ಝೊನೆಲ್‌ಗೆ ಸೂಕ್ತ ಗೌರವವನ್ನೂ ಸಲ್ಲಿಸಿತು. ಫೇಸ್‌ಬುಕ್‌ ಹಾಲ್‌ ಆಫ್ ಫೇಮ್‌ನಲ್ಲಿ ಈ ವರ್ಷ ಸೇರ್ಪಡೆಯಾದ 94 ಹೆಸರು ಗಳ ಪೈಕಿ ಝೊನೆಲ್‌ಗೆ 16ನೇ ಸ್ಥಾನ ಲಭಿಸಿದೆ.