ಮಾ.31ರಿಂದ 3 ಬುಲೆಟ್‌ ಮಾದರಿ ಮಾರಾಟ ಸ್ಥಗಿತ

ಹೊಸದಿಲ್ಲಿ: ಬುಲೆಟ್‌ ಬೈಕ್‌ಗಳ ಉತ್ಪಾದಕ ಸಂಸ್ಥೆ ಮಾ.31ರ ಬಳಿಕ ಬುಲೆಟ್‌ 500, ಕ್ಲಾಸಿಕ್‌ 500, ಥಂಡರ್‌ಬರ್ಡ್‌ 500 (Thunderbird 500) ಮಾದರಿ ಬೈಕ್‌ಗಳ ಮಾರಾಟ ಮುಂದುವರಿಸದೇ ಇರಲು ನಿರ್ಧರಿಸಿದೆ. ಈ ಮೂರು ಬೈಕ್‌ಗಳು ಒಂದೇ ಮಾದರಿಯ ಎಂಜಿನ್‌ ಹೊಂದಿವೆ. ಆದರೆ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಅವುಗಳ ಮಾರಾಟ ಮುಂದುವರಿಯಲಿದೆ.

ಉತ್ಪಾದನೆ ಭಾರತದಲ್ಲಿ ಸ್ಥಗಿತಗೊಳ್ಳುವುದಿದ್ದರೂ, ದುರಸ್ತಿ ವ್ಯವಸ್ಥೆ ಮುಂದುವರಿಯಲಿದೆ. ಮಾ.31ರ ವರೆಗೆ ಮಾರಾಟವಾಗುವ ಬುಲೆಟ್‌ ಬೈಕ್‌ಗಳಿಗೆ ಅಗತ್ಯವಿರುವ ಬಿಡಿಭಾಗಗಳೂ ಸಿಗಲಿವೆ ಎಂದು ಕಂಪೆನಿ ಹೇಳಿಕೊಂಡಿದೆ.

ಕೆಲವು ದಿನಗಳ ಹಿಂದಷ್ಟೇ ಬಿಎಸ್‌-6 ಪರಿಸರ ಮಾಲಿನ್ಯ ನಿಯಂತ್ರಕ ವ್ಯವಸ್ಥೆ ಇರುವ ಹಿಮಾಲಯನ್‌ ಬಿಎಸ್‌-6 ಮತ್ತು ಕ್ಲಾಸಿಕ್‌ 350 ಬಿಎಸ್‌6 ಎಂಬ ಎರಡು ಮಾದರಿಗಳನ್ನು ಬಿಡುಗಡೆ ಮಾಡಿತ್ತು.