ಬೆಂಗಳೂರು: ಮಫ್ತಿಯಲ್ಲಿ ಕಾರ್ಯಾಚರಣೆಯಲ್ಲಿದ್ದ ಎಸ್‌ಐ ಮೇಲೆ ಮಚ್ಚಿನಿಂದ ಹಲ್ಲೆ ನಡೆಸಿ ತಲೆ ಮರೆಸಿಕೊಂಡಿದ್ದ ಪುಡಿ ರೌಡಿ ನದೀಮ್‌ ಟಿವಿ 9 ಕಚೇರಿಗೆ ಬಂದು ಹೈಡ್ರಾಮಾ ಮಾಡಿದ ಘಟನೆ ಸೋಮವಾರ ತಡರಾತ್ರಿ ನಡೆದಿದೆ.
ಟಿವಿ 9 ಕಚೇರಿಯ ಎದುರು ಕತ್ತನ್ನು ಬ್ಲೇಡ್‌ನಿಂದ ಕೊಯ್ದುಕೊಂಡು ಪೊಲೀಸರು ನನ್ನ ಮಾವ ಮತ್ತು ಅಣ್ಣ ನನ್ನು ಕರೆದೊಯ್ದಿದ್ದಾರೆ ಅವರನ್ನು ಬಿಡಿಸಿಕೊಡಿ ಎಂದು ಕೂಗಾಡಿದ್ದಾನೆ.
ರೌಡಿ ನದೀಮ್‌ ಟಿವಿ 9 ಕಚೇರಿ ಬಳಿ ಇರುವುದು ತಿಳಿದು 10 ನಿಮಷಗಳ ಒಳಗೆ ಆಗಮಿಸಿದ ಪೊಲೀಸರು ಆತನನ್ನು ಬಂಧಿಸಿ ಕರೆದೊಯ್ದಿದ್ದಾರೆ.
ಅಗಸ್ಟ್‌ 24 ರ ಸಂಜೆ ಉಮರ್‌ ಎಂಬ ರೌಡಿ ಶೀಟರ್‌ನ ಹತ್ಯೆಗೆ ಸ್ಕೆಚ್‌ ಹಾಕಿದ್ದ ರೌಡಿ ನದೀಮ್‌ ಗ್ಯಾಂಗನ್ನು ಡಿಜೆ ಹಳ್ಳಿ ಠಾಣೆಯ ಎಸ್‌ಐ ನಯಾಝ್ ಅಹಮದ್‌ ತಡೆಯಲು ಕಾರ್ಯಾಚರಣೆಗಿಳಿದಿದ್ದರು. ಈ ವೇಳೆ ರೌಡಿಗಳು ಎಸ್‌ಐ ನಯಾಜ್‌ ಹಣೆಗೆ ಮಚ್ಚಿನಿಂದ ಇರಿದು ಪರಾರಿಯಾಗಿದ್ದರು.
ಎಸ್‌ಐ ನಯಾಜ್‌ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದುಕೊಂಡು ಇದೀಗ ಚೇತರಿಸಿಕೊಂಡಿದ್ದಾರೆ.
ಕೃತ್ಯದಲ್ಲಿ ಇನ್ನೂ ಕೆಲ ರೌಡಿಗಳು ಭಾಗಿಯಾಗಿದ್ದು ಅವರ ಬಂಧನಕ್ಕಾಗಿ ಕಾರ್ಯಾಚರಣೆ ಮುಂದುವರೆದಿದೆ.
