Singham Again: ನವರಾತ್ರಿ ಹಬ್ಬಕ್ಕೆ ʼಲೇಡಿ ಸಿಂಗಂʼ ಆಗಿ ಬಂದ ದೀಪಿಕಾ; ಫಸ್ಟ್‌ ಲುಕ್‌ ಔಟ್

ಮುಂಬಯಿ: ಬಾಲಿವುಡ್‌ ನಲ್ಲಿ ಖಾಕಿ ಖದರ್‌ ಕಥೆಯನ್ನು ಮಾಸ್‌ ಆಗಿ ಹೇಳುವ ನಿರ್ದೇಶಕ ರೋಹಿತ್‌ ಶೆಟ್ಟಿ ಅವರ ʼಸಿಂಗಂ ಎಗೈನ್‌ʼ ಸಿನಿಮಾದ ‘ಲೇಡಿ ಸಿಂಗಂʼ ಫಸ್ಟ್‌ ಲುಕ್‌ ರಿಲೀಸ್‌ ಆಗಿದೆ.

ರೋಹಿತ್‌ ಶೆಟ್ಟಿ ಹಾಗೂ ಅಜಯ್‌ ದೇವಗನ್‌ ಕಾಂಬಿನೇಷನ್‌ ನಲ್ಲಿ ಮೂಡಿಬರುತ್ತಿರುವ ʼಸಿಂಗಂ ಎಗೈನ್‌ʼ ಈ ಹಿಂದೆ ಬಂದ ʼಸಿಂಗಂʼ ದಂತೆಯೇ ಹಿಟ್‌ ಆಗುತ್ತದೆನ್ನುವ ನಿರೀಕ್ಷೆ ಪ್ರೇಕ್ಷಕರಲ್ಲಿದೆ. ಅಜಯ್‌ – ರೋಹಿತ್‌ ಸೂಪರ್‌ ಹಿಟ್‌ ಜೋಡಿ ಮತ್ತೆ ʼಸಿಂಗಂ ಎಗೈನ್‌ʼ ಮೂಲಕ ಜೊತೆಯಾಗುತ್ತಿರುವುದು ಮಾತ್ರವಲ್ಲದೆ ಸಿನಿಮಾದಲ್ಲಿ ಸ್ಟಾರ್‌ ನಟಿ ದೀಪಿಕಾ ಪಡುಕೋಣೆ ಸಿನಿಮಾದಲ್ಲಿ ಕಾಣಿಸಿಕೊಳ್ಳುತ್ತಿರುವುದು ಪ್ರೇಕ್ಷಕರಿಗೆ ಡಬಲ್‌ ಖುಷಿ ನೀಡಿದೆ.

ಇತ್ತೀಚೆಗೆ ಸಿನಿಮಾದ ಪೂಜಾ ಕಾರ್ಯ ನೆರವೇರಿತ್ತು. ಇದೀಗ ಸಿನಿಮಾ ತಂಡ ಚಿತ್ರದಲ್ಲಿನ  ದೀಪಿಕಾ ಪಡುಕೋಣೆ ಅವರ ಕ್ಯಾರೆಕ್ಟರ್‌ ಲುಕ್‌ ನ್ನು ರಿವೀಲ್‌ ಮಾಡಿದೆ.

ದೀಪಿಕಾ ಪಡುಕೋಣೆ ಈ ಸಿನಿಮಾದಲ್ಲಿ ʼಶಕ್ತಿ ಶೆಟ್ಟಿʼ ಯಾಗಿ ಪೊಲೀಸ್‌ ಅವತಾರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.  “ನಾರಿ ಸೀತಾಳ ರೂಪವೂ ಹೌದು, ದುರ್ಗೆಯ ರೂಪವೂ ಹೌದು” ಎಂದು ನಿರ್ದೇಶಕ ರೋಹಿತ್‌ ದೀಪಿಕಾ ಅವರ ಖಾಕಿ ಲುಕ್‌ ನ್ನು ರಿವೀಲ್‌ ಮಾಡಿದೆ.

ದೀಪಿಕಾ ಇದುವರೆಗೆ ಕಾಣಿಸಿಕೊಳ್ಳದ ರಗಡ್‌ ಲುಕ್‌ ನಲ್ಲಿ ಕಾಣಿಸಿಕೊಂಡಿದ್ದಾರೆ. ಸಿನಿಮಾದಲ್ಲಿ ಅವರು ಅಜಯ್‌ ದೇವಗನ್‌ ಅವರ ತಂಗಿಯ ಪಾತ್ರವನ್ನು ಮಾಡಲಿದ್ದಾರೆ ಎನ್ನಲಾಗಿದೆ.

ದೀಪಿಕಾ ಪಡುಕೋಣೆ ʼಸಿಂಗಂ ಎಗೈನ್‌ʼ ನಲ್ಲಿ ʼಲೇಡಿ ಸಿಂಗಂʼ ಆಗಿ ಕಾಣಿಸಿಕೊಳ್ಳಲಿದ್ದಾರೆ ಎಂದು ನಿರ್ದೇಶಕ ರೋಹಿತ್‌ ಶೆಟ್ಟಿ ಅವರು,ʼಸರ್ಕಸ್‌ʼ ಸಿನಿಮಾದ ಕಾರ್ಯಕ್ರಮವೊಂದರಲ್ಲಿ ಹೇಳಿದ್ದರು.