ನೀರಜ್‌ ಚೋಪ್ರಾ ಎದುರು ಅಸಭ್ಯ ನೃತ್ಯ!

ಮುಂಬಯಿ: ಟೋಕಿಯೊ ಒಲಿಂಪಿಕ್ಸ್‌ನಲ್ಲಿ ಚಿನ್ನದ ಪದ ಗೆದ್ದ ನೀರಜ್‌ ಚೋಪ್ರಾ ಮುಂದೆ ಯುವತಿಯರು ನಡೆಸಿರುವ ನೃತ್ಯವೊಂದು ವಿವಾದಕ್ಕೆ ಕಾರಣವಾಗಿದೆ.

ದೇಶಕ್ಕೆ ಬಂಗಾರ ಗೆದ್ದು ತಂದ ಕ್ರೀಡಾಪಟುವೊಬ್ಬರ ಮುಂದೆ ಈ ರೀತಿಯ ವರ್ತನೆ ತೋರುವುದು ಸರಿಯಲ್ಲ ಎಂದು ಸಾಮಾಜಿಕ ಜಾಲತಾಣದಲ್ಲಿ ತೀವ್ರ ಟೀಕೆ ಹಾಗೂ ವಿರೋಧ ವ್ಯಕ್ತವಾಗಿದೆ.

ಒಲಂಪಿಕ್ಸ್‌ ಚಿನ್ನದ ಹುಡುಗ ನೀರಜ್‌ ಚೋಪ್ರಾ ಅವರನ್ನು ಜೂಮ್‌ ಆ್ಯಪ್‌ನಲ್ಲಿ ರೇಡಿಯೋ ಜಾಕಿ ಮಲಿಷ್ಕಾ ಮೆಂಡೊನ್ಸಾ ಸಂದರ್ಶಿಸಿದ್ದರು. ಇದರ ಭಾಗವಾಗಿ ಮಲಿಷ್ಕಾ ಅವರೊಂದಿಗೆ ಕೆಲವು ಯುವತಿಯರು ಲ್ಯಾಪ್‌ಟಾಪ್‌ನಲ್ಲಿ ನೀರಜ್‌ ಚೋಪ್ರಾ ಅವರನ್ನು ನೋಡಿ 1957ರ ಬಾಲಿವುಡ್‌ ಹಾಡೊಂದಕ್ಕೆ ಅಶ್ಲೀಲವಾಗಿ ನೃತ್ಯ ಮಾಡಿದರು. ಅನಂತರ ಮಲಿಷ್ಕಾ, ನೀರಜ್‌ಗೆ ಕೆಲವು ಪ್ರಶ್ನೆ ಕೇಳಿದರು. ಇದಕ್ಕೆ ಸಂಬಂಧಿಸಿದ ವೀಡಿಯೋವನ್ನು ಮಲಿಷ್ಕಾ ತಮ್ಮ ಟ್ವಿಟರ್‌ನಲ್ಲಿ ಹಂಚಿಕೊಂಡಿದ್ದಾರೆ.

ಇದನ್ನು ವೀಕ್ಷಿಸಿದ ನೆಟ್ಟಿಗರು, ಯುವತಿಯರ ನಡವಳಿಕೆಗೆ ಬೇಸರ ವ್ಯಕ್ತಪಡಿಸಿದ್ದಾರೆ. ದೇಶಕ್ಕೆ ಪದಕ ಗೆದ್ದು ತಂದ ಕ್ರೀಡಾಪಟುವೊಂದಿಗೆ ವರ್ತಿಸುವ ರೀತಿ ಇದಲ್ಲ, ನಿಮ್ಮ ನಡವಳಿಕೆ ತಲೆ ತಗ್ಗಿಸುವಂತಿದೆ. ನೀವು ಅವರಿಗೆ ನೀಡುವ ಗೌರವ ಇದೇನಾ ಎಂದು ಕಿಡಿಕಾರಿದ್ದಾರೆ.