Mumbai-Goa: ಮುಂಬೈ-ಗೋವಾ ಹೆದ್ದಾರಿಯಲ್ಲಿ ಭಾರೀ ವಾಹನಗಳಿಗೆ ನಿರ್ಬಂಧ

ಥಾಣೆ: ಆಗಸ್ಟ್‌ 27ರಿಂದ ಮುಂದಿನ ತಿಂಗಳು ಗಣೇಶ ಹಬ್ಬ ಮುಗಿಯುವವರೆಗೆ ಮುಂಬೈ-ಗೋವಾ ಹೆದ್ದಾರಿಯಲ್ಲಿ ಬೃಹತ್‌ಗಾತ್ರದ ವಾಹನಗಳು ಸಂಚರಿಸದಂತೆ ನವಿ ಮುಂಬೈ ಟ್ರಾಫಿಕ್‌ ಪೊಲೀಸರು ನಿರ್ಬಂಧ ಹೇರಿದ್ದಾರೆ. ಈ ಸಂಬಂಧಿಸಿದಂತೆ ಪೊಲೀಸ್‌ ಉಪ ಆಯುಕ್ತರಾದ ತಿರುಪತಿ ಕಾಕಡೆ ಪ್ರಕಟಣೆ ಹೊರಡಿಸಿ, ಭಾನುವಾರದಿಂದಲೇ ನಿರ್ಬಂಧ ಜಾರಿಯಾಗಲಿದೆ ಎಂದಿದ್ದಾರೆ.

ಮಹಾರಾಷ್ಟ್ರ ಪಿಡಬ್ಲೂéಡಿ ಸಚಿವ ರವೀಂದ್ರ ಚಾವನ್‌ ಶನಿವಾರ ಮುಂಬೈ-ಗೋವಾ ಹೆದ್ದಾರಿ ಮಾರ್ಗದಲ್ಲಿ ನಡೆಯುತ್ತಿರುವ ಕೆಲ ಕಾಮಗಾರಿ ಪರಿಶೀಲಿಸಿದ್ದರು. ಈ ವೇಳೆ ಬೃಹತ್‌ಗಾತ್ರದ ವಾಹನಗಳ ಸಂಚಾರದಿಂದಾಗಿ 2 ಗಂಟೆಗಳ ವೆರೆಗೆ ಸಾರಿಗೆ ದಟ್ಟಣೆ ಏರ್ಪಟ್ಟಿದ್ದನ್ನು ಗಮನಿಸಿದ್ದಾರೆ. ಈ ಹಿನ್ನೆಲೆಯಲ್ಲಿ ಕೊಂಕಣ ಮಾರ್ಗಕ್ಕೆ ಜನರ ಸುಲಭ ಸಂಚಾರ ಖಚಿತಪಡಿಸಿಕೊಳ್ಳಲು ಕ್ರಮ ಕೈಗೊಳ್ಳುವಂತೆ ಆದೇಶಿಸಿದ್ದರ ಹಿನ್ನೆಲೆ ಈ ನಿರ್ಬಂಧ ಹೇರಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.