T20 World Cup ಇತಿಹಾಸದಲ್ಲೇ ದಾಖಲೆ ಮೊತ್ತ ; ಗೆದ್ದವರಿಗೆ ಸಿಗುವ ಹಣವೆಷ್ಟು ಗೊತ್ತೇ?

ದುಬಾೖ: ಈ ಬಾರಿಯ ಟಿ20 ವಿಶ್ವಕಪ್‌ ಕ್ರಿಕೆಟ್‌ ಪಂದ್ಯಾವಳಿಯ ಬಹುಮಾನ ಮೊತ್ತವನ್ನು ಐಸಿಸಿ ಘೋಷಿಸಿದೆ. ಇದು 11.25 ಮಿಲಿ ಯನ್‌ ಡಾಲರ್‌ ಆಗಿದ್ದು, ರೂಪಾಯಿ ಯಲ್ಲಿ ಸುಮಾರು 93.50 ಕೋಟಿಗಳ ಷ್ಟಾಗುತ್ತದೆ. ಇದರಲ್ಲಿ ಚಾಂಪಿಯನ್‌ ತಂಡ ಸುಮಾರು 20.36 ಕೋಟಿ ರೂ. ಮೊತ್ತವನ್ನು ತನ್ನದಾಗಿಸಿಕೊಳ್ಳಲಿದೆ (2.45 ಮಿ. ಡಾಲರ್‌).

ಇದು ಕಳೆದ ಬಾರಿಯ ಬಹುಮಾನ ಮೊತ್ತಕ್ಕಿಂತ ಭಾರೀ ಹೆಚ್ಚಳವಾಗಿದೆ. ಜತೆಗೆ ಇದೊಂದು ದಾಖಲೆಯೂ ಹೌದು. ಕಳೆದ ಸಲದ ಚಾಂಪಿಯನ್‌ ಇಂಗ್ಲೆಂಡ್‌ ತಂಡಕ್ಕೆ ಸಿಕ್ಕಿದ್ದು 13 ಕೋಟಿ ರೂ. ರನ್ನರ್ ಅಪ್‌ ಪಾಕಿಸ್ಥಾನ ಪಡೆದದ್ದು 6.44 ಕೋಟಿ ರೂ.

ಈ ಬಾರಿ ರನ್ನರ್ ಅಪ್‌ ತಂಡಕ್ಕೆ 10.64 ಕೋಟಿ ರೂ. ಬಹುಮಾನ ಸಿಗಲಿದೆ. ಸೆಮಿಫೈನಲ್‌ನಲ್ಲಿ ಸೋತ ತಂಡಗಳಿಗೆ ತಲಾ 6.54 ಕೋಟಿ ರೂ., ಪ್ರತೀ ಗುಂಪಿನಲ್ಲಿ 3ನೇ ಸ್ಥಾನ ಪಡೆಯುವ ತಂಡಗಳಿಗೆ 2.06 ಕೋಟಿ ರೂ., ಉಳಿದ ತಂಡಗಳಿಗೆ 1.87 ಕೋಟಿ ರೂ. ಸಿಗಲಿದೆ. ಸೂಪರ್‌-8 ಹಂತದ ತನಕ ಪ್ರತೀ ಪಂದ್ಯವನ್ನು ಗೆಲ್ಲುವ ತಂಡಗಳಿಗೆ ತಲಾ 25.9 ಲಕ್ಷ ರೂ. ಲಭಿಸಲಿದೆ ಎಂದು ಐಸಿಸಿ ತಿಳಿಸಿದೆ.