ಆಕ್ಸಿಸ್‌ ಮೇಲೆ ಅನುಮಾನ

ನವದೆಹಲಿ: ಖಾಸಗಿ ವಲಯದ ಆಕ್ಸಿಸ್‌ ಬ್ಯಾಂಕ್‌ನ ಸಿಇಒ ಆಗಿ ನಾಲ್ಕನೇ ಬಾರಿಗೆ ಶಿಖಾ ಶರ್ಮಾರನ್ನು ಆಯ್ಕೆ ಮಾಡಿರುವುದನ್ನು ಮರುಪರಿಶೀಲಿಸುವಂತೆ ಬ್ಯಾಂಕ್‌ ಆಡಳಿತ ಮಂಡಳಿಗೆ ಭಾರತೀಯ ರಿಸರ್ವ್‌ ಬ್ಯಾಂಕ್‌ ಸೂಚನೆ ನೀಡಿದೆ. 

ಬ್ಯಾಂಕ್‌ ಸಿಇಒ ನೇಮಕದ ವಿಧಾನಗಳನ್ನು ಬಿಗಿಗೊಳಿಸಲು ಆರ್‌ಬಿಐ ನಿರ್ಧರಿಸಿದೆ. ಈಗಾಗಲೇ ಬ್ಯಾಂಕ್‌ ಚೇರ್‌ಮನ್‌ ಸಂಜೀವ್‌ ಮಿಶ್ರಾಗೆ ಈ ಸಂಬಂಧ ಬರೆದಿರುವ ಪತ್ರದಲ್ಲಿ, ಶಿಖಾರನ್ನು ನಾಲ್ಕನೇ ಬಾರಿಗೆ ಆಯ್ಕೆ ಮಾಡಿರುವುದಕ್ಕೆ ಕಾರಣ ನೀಡುವಂತೆ ಸೂಚಿಸಿದೆ. ಬ್ಯಾಂಕ್‌ನ ಸ್ವತ್ತು ಗುಣಮಟ್ಟ ಇಳಿಕೆಯಾಗಿದ್ದು, ಸಾಧನೆಯೂ ಕಳಪೆ ಯಾಗಿದೆ ಎಂದು ಆರ್‌ಬಿಐ ಅಭಿಪ್ರಾಯ ಪಟ್ಟಿದೆ. ಈ ಹಿನ್ನೆಲೆಯಲ್ಲಿ ಶಿಖಾ ಶರ್ಮಾರನ್ನು ಕೇವಲ ಒಂದು ವರ್ಷದ ಅವಧಿಗೆ ಮುಂದುವರಿಸಿ, ಈ  ಅವಧಿಯಲ್ಲಿ ಹೊಸ ಸಿಇಒ ನೇಮಕ ಮಾಡುವ ಬಗ್ಗೆ ಮಂಡಳಿ ಚಿಂತನೆ ನಡೆಸಿದೆ ಎನ್ನಲಾಗಿದೆ. 2009ರಲ್ಲಿ ಮೊದಲ ಬಾರಿಗೆ ಸಿಇಒ ಆಗಿ ನೇಮಕವಾಗಿದ್ದ ಶಿಖಾ, 
ಸದ್ಯ ಮೂರನೇ ಅವಧಿಗೆ ಕಾರ್ಯನಿರ್ವಹಿಸುತ್ತಿದ್ದಾರೆ. ಜೂನ್‌ನಲ್ಲಿ ಅವರ ನಾಲ್ಕನೇ ಅವಧಿ ಆರಂಭವಾಗಲಿದೆ. 

ಇತ್ತೀಚೆಗಷ್ಟೇ, ಐಸಿಐಸಿಐ ಬ್ಯಾಂಕ್‌ ಸಿಇಒ ಚಂದಾ ಕೊಚ್ಚಾರ್‌ ತನ್ನ ಪತಿಗೆ ಅನುಕೂಲ ಮಾಡಿಕೊಡುವುದಕ್ಕಾಗಿ ವೀಡಿಯೋಕಾನ್‌ ಗ್ರೂಪ್‌ಗೆ ಸಾಲ ನೀಡಿದ್ದಾರೆ ಎಂದು ಆರೋಪಿಸಿದ ಹಿನ್ನೆಲೆಯಲ್ಲಿ, ಈ ವಿಚಾರ ಮಹತ್ವ ಪಡೆದಿದೆ. ಕಳೆದ ಮೂರು ವರ್ಷಗ ಳಿಂದಲೂ ಆಕ್ಸಿಸ್‌ ಬ್ಯಾಂಕ್‌ ಮರುಪಾವತಿ ಯಾಗದ ಸಾಲ ಪ್ರಮಾಣವು ಶೇ.336ಕ್ಕೆ ಏರಿದೆ. 2009 ಡಿಸೆಂಬರ್‌ ಹೊತ್ತಿಗೆ 1173 ಕೋಟಿ ರೂ. ಇದ್ದ ಮರುಪಾವತಿಯಾಗದ ಸಾಲ 2017 ಡಿಸೆಂಬರ್‌ ವೇಳೆಗೆ 25,001 ಕೋಟಿ ರೂ.ಗೆ ಏರಿದೆ.