10 ವರ್ಷಗಳ ಅಭಿವೃದ್ಧಿ ಕಾರ್ಯಗಳಿಗೆ ಮನ್ನಣೆ

ಬೆಂಗಳೂರು: ನಗರದ ಸರ್‌ ಸಿ.ವಿ.ರಾಮನ್‌ನಗರ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ಎಸ್‌.ರಘು ಅವರು ಶನಿವಾರ ಕ್ಷೇತ್ರದ ಬಿ.ಚನ್ನಸಂದ್ರ ಮತ್ತು ಸುತ್ತಲ ಬಡಾವಣೆಗಳಲ್ಲಿ ಮತಯಾಚನೆ ಮಾಡಿದರು. ಬಡಾವಣೆಯ ದೇವಾಲಯಗಳಲ್ಲಿ ಪೂಜೆ ಸಲ್ಲಿಸಿ ಮನೆ, ಮನೆಗೆ ತೆರಳಿ ಮತಯಾಚನೆ ಕಾರ್ಯ ಆರಂಭಿಸಿದ ಶಾಸಕ ರಘು ಅವರಿಗೆ ಮಹಿಳೆಯರು ತಿಲಕವಿಟ್ಟು ಆರತಿ ಎತ್ತಿ ಶುಭಾಶಯ ಕೋರಿದರು.

ಕಳೆದ 10 ವರ್ಷಗಳಿಂದ ಕ್ಷೇತ್ರದಲ್ಲಿ ಉದ್ಯಾನವನ, ಆಟದ ಮೈದಾನ, ಕುಡಿಯುವ ನೀರಿನ ಸೌಲಭ್ಯ, ಮಹಿಳೆ ಮತ್ತು ಅಬಲೆಯರಿಗೆ ಪಿಂಚಣಿ ವ್ಯವಸ್ಥೆ, ಯುವಜನತೆ ಉದ್ಯೋಗ ಒದಗಿಸುವ ಕಾರ್ಯ, ರಸ್ತೆಗಳ ನಿರ್ಮಾಣ ಮತ್ತು ಅಭಿವೃದ್ಧಿ ಕಾರ್ಯಗಳನ್ನು ಮಾಡಿರುವುದನ್ನು ಜನತೆ ಪ್ರತ್ಯಕ್ಷವಾಗಿ ಕಂಡಿದ್ದಾರೆ. ನನ್ನ ಕರ್ತವ್ಯನಿಷ್ಠೆ ಮತ್ತು ಜನಪರ ಕಾರ್ಯಗಳನ್ನು ಗುರುತಿಸಿ ಮತ್ತೂಮ್ಮೆ ಗೆಲ್ಲಿಸುವ ಮೂಲಕ ಆಶೀರ್ವದಿಸುತ್ತಾರೆ ಎಂಬ ಆಶಾಭಾವನೆ ನನಗಿದೆ ಎಂದು ಅವರು ತಿಳಿಸಿದರು.

ಶಾಸಕರೊಡನೆ ಮಾಜಿ ಉಪಮೇಯರ್‌ ದಯಾನಂದ, ಬಿಜೆಪಿ ಅಧ್ಯಕ್ಷ ರಾಜಾರೆಡ್ಡಿ, ನಿಕಟಪೂರ್ವ ಬಿಬಿಎಂಪಿ ಸದಸ್ಯ ಎಂ.ಕೃಷ್ಣ ಅವರು ಜತೆಯಲ್ಲಿದ್ದರು. ಬಿಜೆಪಿ ಹಿರಿಯ ಮುಖಂಡರು ಹಾಗೂ ಕಾರ್ಯಕರ್ತರು ಎಸ್‌.ರಘು ಪರ ಮತಯಾಚಿಸಿದರು.