ಬೆಂಗಳೂರು: ಈ ಬಾರಿಯ ಐಪಿಎಲ್ ಗೆ ಎಲ್ಲಾ ಫ್ರಾಂಚೈಸಿಗಳು ಸಿದ್ದತೆ ನಡೆಸುತ್ತಿವೆ. ಗಾಯಗೊಂಡು ಕೂಟಕ್ಕೆ ಅಲಭ್ಯರಾಗುವ ಆಟಗಾರರ ಬದಲಿ ಆಯ್ಕೆ ಮಾಡುವ ಪ್ರಕ್ರಿಯೆಯೂ ನಡೆಯುತ್ತಿದೆ. ಬೆಂಗಳೂರು ಮೂಲದ ಫ್ರಾಂಚೈಸಿ ಆರ್ ಸಿಬಿಯೂ ಇಂತಹದ್ದೇ ಕೆಲಸದಲ್ಲಿ ತೊಡಗಿದೆ.
ಇಂಗ್ಲೆಂಡ್ ಬ್ಯಾಟರ್ ವಿಲ್ ಜಾಕ್ಸ್‌ ಅವರು ಗಾಯಗೊಂಡಿದ್ದು, ಈ ಬಾರಿಯ ಐಪಿಎಲ್ ನಲ್ಲಿ ಆರ್ ಸಿಬಿಗೆ ಲಭ್ಯವಾಗುತ್ತಿಲ್ಲ. ಹೀಗಾಗಿ ಆರ್‌ಸಿಬಿ ತಂಡವು ನ್ಯೂಜಿಲೆಂಡ್‌ನ ಮೈಕೆಲ್ ಬ್ರೇಸ್‌ವೆಲ್ ಅವರನ್ನು ಬದಲಿ ಆಟಗಾರನಾಗಿ ನೇಮಿಸಿಕೊಂಡಿದೆ.
ಜ್ಯಾಕ್ಸ್ ಅವರನ್ನು ಫ್ರಾಂಚೈಸಿ 3.2 ಕೋಟಿ ರೂ ಗೆ ಖರೀದಿಸಿತ್ತು. ಕಿವೀಸ್ ಬ್ಯಾಟರ್ ಬ್ರೇಸ್ ವೆಲ್ 16 ಟಿ20 ಗಳಲ್ಲಿ ಕಾಣಿಸಿ ಕೊಂಡಿದ್ದಾರೆ. 113 ರನ್ ಗಳಿಸಿರುವ ಅವರು 21 ವಿಕೆಟ್ ಗಳನ್ನು ಪಡೆದಿದ್ದಾರೆ.
ಕಳೆದ ತಿಂಗಳು ನಡೆದ ಏಕದಿನ ಸರಣಿಯಲ್ಲಿ ಬ್ರೇಸ್ ವೆಲ್ ಅದ್ಭುತ ಪ್ರದರ್ಶನ ನೀಡಿದ್ದರು. ಹೈದರಾಬಾದ್ ನಲ್ಲಿ ನಡೆದಿದ್ದ ಭಾರತ ಮತ್ತು ಕಿವೀಸ್ ನಡುವಿನ ಪಂದ್ಯದಲ್ಲಿ ಬ್ರೇಸ್ ವೆಲ್ ಕೇವಲ 78 ಎಸೆತಗಳಲ್ಲಿ 140 ರನ್ ಚಚ್ಚಿದ್ದರು.
