ಪಿಎಂಸಿ ಬ್ಯಾಂಕ್‌ ವಿತ್‌ಡ್ರಾವಲ್‌ ಮಿತಿ 50 ಸಾವಿರಕ್ಕೆ ಏರಿಕೆ

ಮುಂಬಯಿ: ಬ್ಯಾಂಕಿಂಗ್‌ ನಿಯಮಾವಳಿಗಳನ್ನು ಉಲ್ಲಂಘಿಸಿದ್ದಕ್ಕಾಗಿ ಪಂಜಾಬ್‌ ಮತ್ತು ಮಹಾರಾಷ್ಟ್ರ ಕೋ. ಆಪರೇಟಿವ್‌ ಬ್ಯಾಂಕ್‌ ಮೇಲೆ ರಿಸರ್ವ್‌ ಬ್ಯಾಂಕ್‌ ಆಫ್ ಇಂಡಿಯಾ ನಿರ್ಬಂಧ ಹೇರಿದ್ದು, ಅದನ್ನೀಗ ತುಸು ಸಡಿಲಗೊಳಿಸಿದೆ.

ಆರ್‌ಬಿಐ ಕ್ರಮದ ಅಂಗವಾಗಿ ಇನ್ನು ಗ್ರಾಹಕರು 50 ಸಾವಿರ ರೂ.ವರೆಗೆ ಹಣ ವಿತ್‌ಡ್ರಾವಲ್‌ ಮಾಡಿಕೊಳ್ಳಬಹುದು.

ಅವ್ಯವಹಾರದ ವಾಸನೆ ಬಡಿದ ಹಿನ್ನೆಲೆಯಲ್ಲಿ ಆರ್‌ಬಿಐ ಬ್ಯಾಂಕಿನ ಆಡಳಿತವನ್ನು ನೇರ ತನ್ನ ನಿರ್ದೇಶನದಡಿಗೆ ತೆಗೆದುಕೊಂಡಿತ್ತು. ಜತೆಗೆ ಗ್ರಾಹಕರಿಗೆ ವಿತ್‌ಡ್ರಾವಲ್‌ ಮಿತಿಗಳನ್ನು ಹೇರಲಾಗಿತ್ತು. ಬಳಿಕ ಅದನ್ನು ತುಸು ಸಡಿಲಿಸುತ್ತ ಬಂದಿದ್ದು, ಅ.14ರಂದು ಈ ಮಿತಿಯನ್ನು 40 ಸಾವಿರ ರೂ.ಗಳಿಗೆ ಏರಿಸಿತ್ತು.

ಸದ್ಯ 50 ಸಾವಿರ ರೂ. ವಿತ್‌ಡ್ರಾವಲ್‌ ಮಿತಿ ಏರಿಸಿದ್ದರಿಂದ ಶೇ.78ರಷ್ಟು ಮಂದಿ ಗ್ರಾಹಕರು ತಮ್ಮ ಸಂಪೂರ್ಣ ಹಣವನ್ನು ಖಾತೆಯಿಂದ ಪಡೆದುಕೊಳ್ಳಬಹುದಾಗಿದೆ ಎಂದು ಆರ್‌ಬಿಐ ಹೇಳಿದೆ. ಇದರೊಂದಿಗೆ ಹೊಸ ಠೇವಣಿ ಇಡಲು ಇರುವ ನಿರ್ಬಂಧ ಹಾಗೆಯೇ ಮುಂದುವರಿದಿದೆ. ಈ ಮೊದಲು ಕಡಿಮೆ ವಿತ್‌ಡ್ರಾವಲ್‌ ಮಿತಿ ಇಟ್ಟಿದ್ದಕ್ಕಾಗಿ ಗ್ರಾಹಕರಿಂದ ತೀವ್ರ ಆಕ್ಷೇಪ ಕೇಳಿಬಂದಿತ್ತು.