ಕಿರುತೆರೆಗೆ ಬಾಲಿವುಡ್ ನಟ ರಣವೀರ್ ಸಿಂಗ್ ಎಂಟ್ರಿ ?

ಮುಂಬೈ:  ಬಾಲಿವುಡ್ ನಟ ರಣವೀರ್ ಸಿಂಗ್ ಬೆಳ್ಳಿ ತೆರೆಯ ಮೇಲೆ ಸೂಪರ್ ಸ್ಟಾರ್ ಆಗಿ ಮಿಂಚುತ್ತಿದ್ದಾರೆ. ತಮ್ಮ ಅದ್ಭುತ ನಟನೆಯ ಮೂಲಕ ಹಿಂದಿ ಚಿತ್ರರಂಗದಲ್ಲಿ ತಮ್ಮದೆಯಾದ ಛಾಪು ಮೂಡಿಸಿರುವ ಈ ನಟನ ಕುರಿತು ಹೊಸ ವಿಚಾರವೊಂದು ಕೇಳಿ ಬರುತ್ತಿದೆ.

ಬಿಟೌನ್ ನಲ್ಲಿ ಸಾಕಷ್ಟು ಸೂಪರ್ ಡೂಪರ್ ಸಿನಿಮಾಗಳಲ್ಲಿ ನಟಿಸಿರುವ ಈ ನಟ, ಇದೀಗ ಕಿರುತೆರೆಗೂ ಪದಾರ್ಪಣೆ ಮಾಡಲಿದ್ದಾರೆ ಎನ್ನುವ ರೂಮರ್ ಕೇಳಿ ಬರುತ್ತಿದೆ. ಹಿಂದಿಯ ರಿಯಾಲಿಟಿ ಶೋ ವೊಂದರ ಹೋಸ್ಟ್ ಮಾಡಲು ರಣವೀರ್ ಗೆ ಆಫರ್ ಮಾಡಲಾಗಿದೆಯಂತೆ. ಇದಕ್ಕಾಗಿ ಒಳ್ಳೆಯ ಸಂಭಾವನೆಯನ್ನು ನಿಗಧಿಪಡಿಸಲಾಗಿದೆಯಂತೆ.

ಹಿಂದಿಯಲ್ಲಿ ಪ್ರಶ್ನೋತ್ತರ ಮಾದರಿಯ ಕಾರ್ಯಕ್ರಮ ಶುರುವಾಗಲಿದೆಯಂತೆ. ಇದು ಕೂಡ ಕೌನ್ ಬನೇಗಾ ಕರೋಡಪತಿ ಮಾದರಿಯಲ್ಲಿ ನಡೆಯಲಿದೆಯಂತೆ. ಈ ಹೊಸ ಕಾರ್ಯಕ್ರಮದ ನಿರೂಪಣೆಗಾಗಿ ರಣವೀರ್ ಸಿಂಗ್ ಅವರನ್ನು ಸಂಪರ್ಕಿಸಲಾಗಿದೆಯಂತೆ. ಆದರೆ, ಈ ಬಗ್ಗೆ ರಣವೀರ್ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲವಂತೆ. ಸದ್ಯಕ್ಕೆ ಈ ಆಫರ್ ಪೆಂಡಿಂಗ್ ನಲ್ಲಿ ಇರಿಸಿಕೊಂಡಿರುವ ಅವರು ಮುಂದಿನ ದಿನಗಳಲ್ಲಿ ಒಪ್ಪಿಗೆ ಸೂಚಿಸಬಹುದೆನ್ನುವ ನಿರೀಕ್ಷೆ ಇದೆ.

ಇನ್ನು ಈಗಾಗಲೇ ಹಲವು ಬಾಲಿವುಡ್ ತಾರೆಯರು ಕಿರು ತೆರೆಗೆ ಆಗಮಿಸಿದ್ದಾರೆ.  ಬಿಗ್ ಬಿ ಅಮಿತಾಬ್ ಬಚ್ಚನ್ ಹಾಗೂ ಸಲ್ಮಾನ್ ಖಾನ್ ಅವರು ಕಿರುತೆರೆಯಲ್ಲಿ ದೊಡ್ಡ ಹೆಸರು ಮಾಡಿದ್ದಾರೆ. ಇದೀಗ ರಣವೀರ್ ಅವರ ಸರದಿ.