ರಣಜಿ ಟ್ರೋಫಿ ಕ್ರಿಕೆಟ್‌: ವೇಳಾಪಟ್ಟಿ ಅಂತಿಮ

ಹೊಸದಿಲ್ಲಿ: ಪ್ರಸಕ್ತ ರಣಜಿ ಟ್ರೋಫಿ ಕ್ರಿಕೆಟ್‌ ಪಂದ್ಯಾವಳಿಯ ವೇಳಾಪಟ್ಟಿಯನ್ನು ಅಧಿಕೃತವಾಗಿ ಪ್ರಕಟಿಸಲಾಗಿದೆ. ಅದರಂತೆ ಫೆ. 10ರಿಂದ ಮಾ. 15ರ ತನಕ ಮೊದಲ ಹಂತ, ಮೇ 30ರಿಂದ ಜೂ. 26ರ ತನಕ ದ್ವಿತೀಯ ಹಂತದ ಸ್ಪರ್ಧೆಗಳು ನಡೆಯಲಿವೆ ಎಂದು ಬಿಸಿಸಿಐ ಕಾರ್ಯದರ್ಶಿ ಜಯ್‌ ಶಾ ಪ್ರಕಟಿಸಿದರು.

ಕೂಟದಲ್ಲಿ ಒಟ್ಟು 38 ತಂಡಗಳು ಪಾಲ್ಗೊಳ್ಳಲಿದ್ದು, ಇವುಗಳನ್ನು 9 ಗುಂಪುಗಳಾಗಿ ವಿಂಗಡಿಸಲಾಗಿದೆ. ತಲಾ 4 ತಂಡಗಳ 8 ಎಲೈಟ್‌ ಗ್ರೂಪ್‌ ಹಾಗೂ 6 ತಂಡಗಳನ್ನೊಳಗೊಂಡ ಒಂದು ಪ್ಲೇಟ್‌ ವಿಭಾಗವನ್ನು ರಚಿಸಲಾಗುವುದು.

ಕೂಟದ ಒಟ್ಟು 64 ಪಂದ್ಯಗಳನ್ನು 62 ದಿನಗಳ ಅವಧಿಯಲ್ಲಿ ಆಡಲಾಗುವುದು. ಮೊದಲ ಹಂತ ದಲ್ಲಿ 57 ಪಂದ್ಯಗಳು ನಡೆಯಲಿವೆ. ದ್ವಿತೀಯ ಹಂತ 7 ನಾಕೌಟ್‌ ಪಂದ್ಯಗಳಿಗೆ ಮೀಸಲು.

ಎಲೈಟ್‌ ಗ್ರೂಪ್‌ ಪಂದ್ಯಗಳ ತಾಣ ರಾಜ್‌ಕೋಟ್‌, ಕಟಕ್‌, ಚೆನ್ನೈ, ಅಹ್ಮದಾಬಾದ್‌, ತಿರುವನಂತಪುರ, ಹೊಸದಿಲ್ಲಿ, ಹರ್ಯಾಣ ಮತ್ತು ಗುವಾಹಟಿ. ಪ್ಲೇಟ್‌ ಲೀಗ್‌ ಪಂದ್ಯಗಳನ್ನು ಕೋಲ್ಕತಾದಲ್ಲಿ ಆಡಲಾಗುವುದು.