ಕಲಾವಿದರೊಂದಿಗೆ ರಂಗಾಯಣ ನಿರ್ದೇಶಕರ ಸಮಾಲೋಚನೆ

ಧಾರವಾಡ: ಇಲ್ಲಿಯ ರಂಗಾಯಣದಲ್ಲಿ ನೂತನ ನಿರ್ದೇಶಕ ರಮೇಶ ಪರವಿನಾಯ್ಕರ್‌ ಅವರು ರೆಪರ್ಟರಿ ಕಲಾವಿದರೊಂದಿಗೆ ಸಮಾಲೋಚನೆ ಸಭೆ ಕೈಗೊಂಡರು.

ಕಲಾವಿದರ ಸಮಸ್ಯೆಗಳನ್ನು ಆಲಿಸಿ, ರಂಗ ಚಟುವಟಿಕೆಗಳ ಅಭಿವೃದ್ಧಿಗೆ ಪೂರಕ ಸಲಹೆ-ಸೂಚನೆ ಪಡೆದರು. ರಂಗ ಚಟುವಟಿಕೆಗಳನ್ನು ವಿಸ್ತರಿಸಲು ಕ್ರಿಯಾ ಯೋಜನೆ ಸಿದ್ಧಪಡಿಸಿದರು. ಇನ್ನು ಮುಂದೆ ಪ್ರತಿ ಶನಿವಾರ ವಾರಾಂತ್ಯ ನಾಟಕ ಪ್ರದರ್ಶನ ಮತ್ತು ಕಲಾವಿದರೊಂದಿಗೆ ರಂಗದ ಕುರಿತು ಚರ್ಚೆ ಕೈಗೊಳ್ಳಲು ನಿರ್ಧರಿಸಲಾಯಿತು.

ರಂಗಾಯಣದ ವ್ಯಾಪ್ತಿಗೆ ಒಳಪಡುವ ಹಾವೇರಿ, ಗದಗ, ಬಾಗಲಕೋಟೆ, ವಿಜಯಪುರ, ಬೆಳಗಾವಿ, ಉತ್ತರ ಕನ್ನಡ ಹಾಗೂ ಧಾರವಾಡದ ಹಿರಿ-ಕಿರಿಯ ರಂಗಭೂಮಿ ಕಲಾವಿದರು, ಸಾಹಿತಿಗಳು, ಗಣ್ಯರು ಮತ್ತು ರಂಗಾಸಕ್ತರನ್ನು ಒಳಗೊಂಡಂತೆ ಸಮಾಲೋಚನೆ ಸಭೆಯನ್ನು ಆದಷ್ಟು ಬೇಗ ನಡೆಸಲು ತೀರ್ಮಾನಿಸಲಾಯಿತು. ರಂಗಾಯಣದ ಆಡಳಿತಾಧಿ ಕಾರಿ ಮಂಜುಳಾ ಯಲಿಗಾರ, ಹಿರಿಯ ಕಲಾವಿದರಾದ ವಿಠಲ ಕೊಪ್ಪದ, ಚಂದ್ರಶೇಖರ ಜಿಗಜಿನ್ನಗಿ, ಕೆ.ಎಚ್‌ .ನಾಯಕ ಉಪಸ್ಥಿತರಿದ್ದರು.