Nursing Exam; ರಾಜೀವ್‌ ಗಾಂಧಿ ವಿವಿಯಲ್ಲಿ 300ಕ್ಕೆ 315 ಅಂಕ!

ಬೆಂಗಳೂರು: ರಾಜೀವ್‌ ಗಾಂಧಿ ಆರೋಗ್ಯ ವಿಜ್ಞಾನಗಳ ವಿವಿಯ ಎರಡನೇ ಸೆಮಿಸ್ಟರ್‌ನ ನರ್ಸಿಂಗ್‌ ವಿದ್ಯಾರ್ಥಿಗಳಿಗೆ 300ಕ್ಕೆ 310, 315 ಅಂಕಗಳನ್ನು ನೀಡಲಾಗಿದೆ. ಈ ಎಡವಟ್ಟು ಬಹಿರಂಗವಾಗುತ್ತಿದ್ದಂತೆ ಲೋಪವನ್ನು ಸರಿಪಡಿಸಿಕೊಳ್ಳಲು ಮುಂದಾಗಿದೆ.

ಜನವರಿಯಲ್ಲಿ ನಡೆದಿದ್ದ ನರ್ಸಿಂಗ್‌ನ ಎರಡನೇ ಸೆಮಿಸ್ಟರ್‌ನ ಫ‌ಲಿತಾಂಶ ಪ್ರಕಟಗೊಂಡಾಗ ವಿದ್ಯಾರ್ಥಿಗಳು ಅಚ್ಚರಿಗೊಂಡಿದ್ದರು. ಗರಿಷ್ಠ 300 ಅಂಕಗಳಿಗಿಂತ ಹೆಚ್ಚು ಅಂಕ ಪಡೆದಿದ್ದರು. ಲೋಪ ಗಮನಕ್ಕೆ ಬರುತ್ತಿದ್ದಂತೆ ವಿವಿಯ ಅಧಿಕಾರಿಗಳು ಅಂಥ ಫ‌ಲಿತಾಂಶಗಳನ್ನು ಸರಿಪಡಿಸಿದರು.

ವಿಶ್ವವಿದ್ಯಾನಿಲಯದ ಮೌಲ್ಯಮಾಪನ ವಿಭಾಗದಿಂದ, ಮೌಲ್ಯಮಾಪನದ ಬಳಿಕ ಅಂಕಗಳ ಲೆಕ್ಕಾಚಾರ ಮಾಡುವಾಗ ಪರೀಕ್ಷೆಯ ಅಂಕಗಳಿಗೆ ಆಂತರಿಕ ಮೌಲ್ಯಮಾಪನ ಅಂಕಗಳನ್ನು ಆಕಸ್ಮಿಕವಾಗಿ ಸೇರಿಸಿರುವುದಾಗಿನಿಂದ ದೋಷ ಉಂಟಾಗಿದೆ ಎಂಬ ಸ್ಪಷ್ಟನೆ ಬಂದಿದೆ.