ಮುಂಬೈ: ಪ್ರಸಕ್ತ ಐಪಿಎಲ್‌ನಲ್ಲಿ ಹೆಚ್ಚು ಸ್ಥಿರ ಪ್ರದರ್ಶನ ನೀಡುತ್ತಿರುವ ರಾಜಸ್ಥಾನ ರಾಯಲ್ಸ್ ತಂಡ, ಲಕ್ನೋ ಸೂಪರ್‌ ಜೈಂಟ್ಸ್‌ ತಂಡವನ್ನು 3 ರನ್ನುಗಳಿಂದ ಸೋಲಿಸಿದೆ.
ಮೊದಲು ಬ್ಯಾಟಿಂಗ್‌ ಮಾಡಿದ್ದ ರಾಜಸ್ಥಾನ 20 ಓವರ್‌ಗಳಲ್ಲಿ 6 ವಿಕೆಟ್ ನಷ್ಟಕ್ಕೆ 165 ರನ್‌ಗಳ ಭಾರೀ ಮೊತ್ತ ಪೇರಿಸಿತ್ತು. ಇದನ್ನು ಬೆನ್ನಟ್ಟಿದ ಲಕ್ನೋ ತಂಡ ಕೇವಲ 8 ವಿಕೆಟ್‌ಗೆ 162 ರನ್ ಗಳಿಸಿ ಸೋತಿತು. ಭಾನುವಾರದ ಎರಡನೇ ಪಂದ್ಯದಲ್ಲಿ ರಾಜಸ್ಥಾನದ್ದು ಆಲ್‌ರೌಂಡ್‌ ಪ್ರದರ್ಶನ. ಬ್ಯಾಟಿಂಗ್‌ನಲ್ಲಿ ಶಿಮ್ರಾನ್‌ ಹೆಟ್‌ಮೈರ್‌ ಮಿಂಚಿದರೆ, ಬೌಲಿಂಗ್‌ನಲ್ಲಿ ಚಹಲ್‌ ಆರ್ಭಟಿಸಿದರು.
ಗೆಲುವಿಗೆ 166 ರನ್‌ಗಳ ಗುರಿ ಬೆನ್ನಟ್ಟಿದ ಲಕ್ನೋಗೆ ಆರಂಭದಲ್ಲೇ ಶಾಕ್‌ ಕಾದಿತ್ತು. ಮೊದಲ ಓವರ್‌ನಲ್ಲೇ ಮೊದಲ ಮತ್ತು ಎರಡನೇ ಎಸೆತದಲ್ಲೇ ಲಕ್ನೋದ ಕೆ.ಎಲ್‌.ರಾಹುಲ್ ಮತ್ತು ಕೃಷ್ಣಪ್ಪ ಗೌತಮ್‌ ಟ್ರೆಂಟ್‌ ಬೌಲ್ಟ್ಗೆ ವಿಕೆಟ್ ಒಪ್ಪಿಸಿದರು. ಬಳಿಕ ಹೋಲ್ಡರ್‌ ಬಂದರಾದರೂ, ಹೆಚ್ಚು ಹೊತ್ತು ನಿಲ್ಲಲಿಲ್ಲ. ತಂಡದ ಮೊತ್ತ 14 ರನ್‌ಗಳಾಗಿದ್ದಾಗ ಅವರೂ 8 ರನ್ ಗಳಿಸಿ ಔಟಾದರು. ಇನ್ನೊಂದು ಬದಿಯಲ್ಲಿದ್ದ ಕ್ವಿಂಟನ್‌ ಡಿಕಾಕ್‌ ವಿಕೆಟ್‌ಗಳು ಉರುಳುತ್ತಿದ್ದರೂ, ಕ್ರೀಸ್‌ನಲ್ಲಿ ಗಟ್ಟಿಯಾಗಿ ನಿಂತಿದ್ದರು. ಆದರೆ, ಅವರೂ 39 ರನ್ ಗಳಿಸಿ ಔಟಾದರು. ದೀಪಕ್‌ ಹೂಡ ಮತ್ತು ಕೃಣಾಲ್‌ ಪಾಂಡ್ಯ ಕೊಂಚ ಪ್ರತಿರೋಧ ತೋರಿದರು. ಕಡೆ ಎಸೆತದ ವರೆಗೂ ಮಾರ್ಕ್‌ ಅವರು ತಂಡವನ್ನು ಗೆಲುವಿನ ದಡ ಹತ್ತಿಸಲು ಯತ್ನಿಸಿದರು. ಆದರೆ, ರಾಜಸ್ಥಾನ ಪರ ಕಡೇ ಓವರ್‌ ಎಸೆದ ಕುಲ್ದೀಪ್‌ ಸೇನ್‌ ಮೊದಲ ನಾಲ್ಕು ಎಸೆತಗಳಲ್ಲಿ ಕೇವಲ 1 ರನ್ ಮತ್ತು ಕಡೆ 2 ಎಸೆತಗಳಲ್ಲಿ 10 ರನ್ ಕೊಟ್ಟರು. ಅಂದರೆ, ಕಡೇ ಓವರ್‌ನಲ್ಲಿ ಒಟ್ಟು 15 ರನ್ ಬೇಕಾಗಿತ್ತು. ಆದರೆ, ಲಕ್ನೋ 11 ರನ್ ಗಳಿಸಲಷ್ಟೇ ಯಶಸ್ವಿಯಾಯಿತು.
ರಾಜಸ್ಥಾನ ಉತ್ತಮ ಮೊತ್ತ
ಇನ್ನು ರಾಜಸ್ಥಾನದ ಪರ ಅಗ್ರ ಕ್ರಮಾಂಕದ ಆಟಗಾರರು ಬ್ಯಾಟಿಂಗ್‌ನಲ್ಲಿ ವೈಫ‌ಲ್ಯ ಕಂಡರೂ ಹೆಟ್‌ಮೈರ್‌ ಅಮೋಘವಾಗಿ ಆಡಿ ತಂಡವನ್ನು ಆಧರಿಸುವ ಪ್ರಯತ್ನ ಮಾಡಿದರು. ಅವರು ರವಿಚಂದ್ರನ್‌ ಅಶ್ವಿ‌ನ್‌ ಜತೆಗೂಡಿ ಐದನೇ ವಿಕೆಟಿಗೆ 68 ರನ್ನುಗಳ ಜತೆಯಾಟದಲ್ಲಿ ಭಾಗಿಯಾಗಿ ತಂಡವನ್ನು ಆರಂಭದ ಕುಸಿತದಿಂದ ಪಾರು ಮಾಡಿದರು.
ಲಕ್ನೋ ದಾಳಿಯನ್ನು ದಿಟ್ಟವಾಗಿ ಎದುರಿಸಿದ ಹೆಟ್‌ಮೈರ್‌ ಆರು ಭರ್ಜರಿ ಸಹಿತ 36 ಎಸೆತಗಳಿಂದ 59 ರನ್ ಗಳಿಸಿ ಅಜೇಯರಾಗಿ ಉಳಿದರು. ಲಕ್ನೋದ ಬೌಲಿಂಗ್‌ ಉತ್ತಮ ಮಟ್ಟದಲ್ಲಿತ್ತು. ದುಷ್ಮಂತ ಚಮೀರ ಮತ್ತು ರವಿ ಬಿಷ್ಣೋಯಿ ವಿಕೆಟ್ ಪಡೆಯದೇ ಇದ್ದರೂ ಎದುರಾಳಿ ಆಟಗಾರರಿಗೆ ಹೆಚ್ಚಿನ ರನ್ ನೀಡಲು ಬಿಡಲಿಲ್ಲ. ಕೃಷ್ಣಪ್ಪ ಗೌತಮ್‌ ಅವರ ಬೌಲಿಂಗ್‌ ಉತೃಷ್ಟವಾಗಿತ್ತು. ತನ್ನ 4 ಓವರ್‌ಗಳ ದಾಳಿಯಲ್ಲಿ ಅವರು 30 ರನ್ ನೀಡಿ ಎರಡು ಅಮೂಲ್ಯ ವಿಕೆಟ್ ಹಾರಿಸಿದ್ದರು. ಇನ್ನೆರಡು ವಿಕೆಟನ್ನು ಹೋಲ್ಡರ್‌ ಕಿತ್ತರು.
ಸದ್ಯ ತಾನಾಡಿದ ನಾಲ್ಕು ಪಂದ್ಯಗಳಿಂದ ಮೂರು ಜಯದೊಂದಿಗೆ ಆರಂಕ ಪಡೆದು ಅಂಕಪಟ್ಟಿಯಲ್ಲಿ ನಾಲ್ಕನೇ ಸ್ಥಾನದಲ್ಲಿರುವ ಲಕ್ನೋ ಒಂದು ವೇಳೆ ಈ ಪಂದ್ಯದಲ್ಲಿ ಗೆದ್ದರೆ ಅಗ್ರಸ್ಥಾನಕ್ಕೇರುವ ಸಾಧ್ಯತೆಯಿದೆ. ಒಂದು ವೇಳೆ ರಾಜಸ್ಥಾನ ಗೆದ್ದರೆ ಉತ್ತಮ ರನ್‌ಧಾರಣೆಯ ಆಧಾರದಲ್ಲಿ ಅದು ಅಗ್ರಸ್ಥಾನಕ್ಕೇರಲಿದೆ. ಒಂದು ಸ್ಥಾನದಲ್ಲಿ ಗೆದ್ದಿರುವ ಹೈದರಾಬಾದ್‌ 2 ಅಂಕದೊಂದಿಗೆ 8ನೇ ಸ್ಥಾನದಲ್ಲಿದೆ.
ಸಂಕ್ಷಿಪ್ತ ಸ್ಕೋರ್‌
ರಾಜಸ್ಥಾನ್ ರಾಯಲ್ಸ್- 165/6(20 ಓವರ್‌) ಶಿಮ್ರಾನ್‌ ಹೆಟ್‌ಮೈರ್‌ 59, ದೇವದತ್ತ ಪಡಿಕ್ಕಲ್‌ 29, ಆರ್‌. ಅಶ್ವಿ‌ನ್‌ 28. ಕೃಷ್ಣಪ್ಪ ಗೌತಮ್‌ 30/2. ಲಕ್ನೋ ಸೂಪರ್‌ ಜೈಂಟ್ಸ್‌- 162/8(20ಓವರ್‌) ಕ್ವಿಂಟನ್‌ ಡಿಕಾಕ್‌ 39, ಸ್ಟೋಯಿ°ಸ್‌ 38, ಹೂಡಾ 25. ಚಹಲ್‌ 41/4, ಬೌಲ್ಟ್ 30/2.
