Rail; ಹಳಿಯಲ್ಲಿ 9 ಕಬ್ಬಿಣದ ರಾಡ್‌: ಹಳಿ ತಪ್ಪಿಸುವ 19ನೇ ಯತ್ನ!

ಚಂಡೀಗಢ: ರೈಲು ಹಳಿ ತಪ್ಪಿಸುವ ದುಷ್ಕರ್ಮಿಗಳ ಮತ್ತೂಂದು ಸಂಚು ವಿಫ‌ಲವಾಗಿದೆ. ಪಂಜಾಬ್‌ನ ಭಟಿಂಡಾ ಜಿಲ್ಲೆಯ ರೈಲ್ವೇ ಹಳಿಯ ಮೇಲೆ ರವಿವಾರ 9 ಕಬ್ಬಿಣದ ರಾಡ್‌ಗಳು ಪತ್ತೆಯಾಗಿದ್ದು, ಪರಿಣಾಮ ಕೆಲ ವು ಸಮಯದವರೆಗೆ ರೈಲ್ವೇ ಸಂಚಾರಕ್ಕೆ ಅಡಚಣೆಯುಂಟಾಗಿತ್ತು ಎಂದು ಅಧಿಕಾರಿಗಳು ಸೋಮವಾರ ತಿಳಿಸಿದ್ದಾರೆ.

ಕಳೆದ 4 ತಿಂಗಳಲ್ಲಿ ರೈಲುಗಳನ್ನು ಹಳಿ ತಪ್ಪಿಸಲು ದುಷ್ಕರ್ಮಿಗಳು ನಡೆಸಿರುವ 19ನೇ ಪ್ರಯತ್ನ ಇದಾಗಿದೆ!
ಭಟಿಂಡಾದಿಂದ ಬಿಡಬ್ಲ್ಯುಎಲ್‌ ಕೋರಿಗೆ ಸಂಚರಿಸುತ್ತಿದ್ದ ಸರಕು ಸಾಗಣೆ ರೈಲನ್ನು ಹಳಿ ತಪ್ಪಿಸಲು ಈ ಸಂಚು ರೂಪಿಸಲಾಗಿತ್ತು ಎಂಬ ಶಂಕೆ ವ್ಯಕ್ತವಾಗಿದೆ. ಅದೃಷ್ಟವಶಾತ್‌ ಅದೇ ರೈಲಿನ ಚಾಲಕ ರಾಡ್‌ಗಳನ್ನು ಗಮನಿಸಿ ಅಧಿಕಾರಿಗಳಿಗೆ ಮಾಹಿತಿ ನೀಡಿದ್ದಾರೆ. ಬಳಿಕ ಅವುಗಳನ್ನು ತೆರವು ಗೊಳಿಸು ವವರೆಗೂ ಅಂದರೆ ಸುಮಾರು 40 ನಿಮಿಷಗಳ ಕಾಲ ರೈಲುಗಳ ಸಂಚಾರಕ್ಕೆ ಅಡೆತಡೆಯಾಗಿದೆ.

ಈ ಘಟನೆ ಸಂಬಂಧ ರೈಲ್ವೆ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಆರಂಭಿಸಿದ್ದಾರೆ. ಸುತ್ತಮುತ್ತಲಿನ ಸಿಸಿಟಿವಿ ದೃಶ್ಯಗಳನ್ನೂ ಪರಿಶೀಲಿಸುತ್ತಿರುವುದಾಗಿ ತಿಳಿಸಿದ್ದಾರೆ.