ಬೆಂಗಳೂರು: ಭಾರತ ಕ್ರಿಕೆಟ್‌ ತಂಡದ ಮಾಜಿ ನಾಯಕ ರಾಹುಲ್ ದ್ರಾವಿಡ್‌ ಬೆಂಗಳೂರು ವಿಶ್ವವಿದ್ಯಾಲಯದ 2017ನೇ ಸಾಲಿನ ಗೌರವ ಡಾಕ್ಟರೇಟ್ ಸ್ವೀಕರಿಸಲು ನಿರಾಕರಿಸಿದ್ದಾರೆ. ಬೆಂಗಳೂರು ವಿಶ್ವವಿದ್ಯಾಲಯ ಮಂಗಳವಾರವಷ್ಟೇ ಈ ಬಾರಿಯ ಗೌರವ
ಡಾಕ್ಟರೇಟ್‌ಗೆ ರಾಹುಲ್ ದ್ರಾವಿಡ್‌ ಅವರ ಹೆಸರನ್ನು ರಾಜ್ಯಪಾಲರು ಅನುಮೋದಿಸಿದ್ದಾರೆ ಎಂದು ಘೋಷಿಸಿತ್ತು. ಇದೀಗ ದ್ರಾವಿಡ್‌ ಗೌರವ ಡಾಕ್ಟರೇಟ್ ಸ್ವೀಕರಿಸಲು ನಿರಾಕರಿಸಿದ್ದು, ವಿವಿಗೆ ಮುಖಭಂಗವಾಗಿದೆ.
ಗೌರವ ಡಾಕ್ಟರೇಟ್‌ಗೆ ತಮ್ಮನ್ನು ಆಯ್ಕೆ ಮಾಡಿರುವ ಬಗ್ಗೆ ಮಾಹಿತಿ ನೀಡಲು ದ್ರಾವಿಡ್‌ ಅವರು ದೂರವಾಣಿ ಮೂಲಕ
ಸಂಪರ್ಕಕ್ಕೆ ಸಿಗದ ಹಿನ್ನೆಲೆಯಲ್ಲಿ ವಿಶ್ವವಿದ್ಯಾಲಯ ಬುಧವಾರ ಬೆಳಗ್ಗೆ ಇ-ಮೇಲ್‌ ಮೂಲಕ ಸಂದೇಶ ಕಳುಹಿಸಿದೆ. ಇದಕ್ಕೆ ದ್ರಾವಿಡ್‌ ಇ-ಮೇಲ್‌ ಮೂಲಕವೇ ಪ್ರತಿಕ್ರಿಯೆ ಕಳುಹಿಸಿದ್ದು, ಸ್ವತಃ ಕ್ರೀಡಾ ರಂಗದಲ್ಲಿ ಶೈಕ್ಷಣಿಕವಾಗಿ ಸಂಶೋಧನೆ ನಡೆಸುವ ಮೂಲಕವೇ ಡಾಕ್ಟರೇಟ್ ಪಡೆಯುವ ಇಚ್ಛೆ ತಮ್ಮದು ಎಂದು ಹೇಳುವ ಮೂಲಕ ಗೌರವ ಡಾಕ್ಟರೇಟ್ ನಿರಾಕರಿಸಿದ್ದಾರೆ.
ಇದರಿಂದಾಗಿ ಜ.27ರಂದು ನಡೆಯಲಿರುವ ಬೆಂ.ವಿವಿಯ 52ನೇ ಘಟಿಕೋತ್ಸವದಲ್ಲಿ ಗೌರವ ಡಾಕ್ಟರೇಟ್ ಪ್ರದಾನ ಕೈಬಿಡಲು ವಿಶ್ವವಿದ್ಯಾಲಯ ನಿರ್ಧರಿಸಿದೆ ಎಂದು ತಿಳಿದು ಬಂದಿದೆ.
ದ್ರಾವಿಡ್‌ ಈ ಹಿಂದೆ 2014ರಲ್ಲಿ ಗುಲ್ಬರ್ಗಾ ವಿವಿ ನೀಡಲು ಮುಂದಾಗಿದ್ದ ಗೌರವ ಡಾಕ್ಟರೇಟ್ ಅನ್ನೂ ನಿರಾಕರಿಸಿದ್ದರು. ವಿವಿಯ 32ನೇ ಘಟಿಕೋತ್ಸವದಲ್ಲಿ ಸುಮಾರು 12 ಮಂದಿಯನ್ನು ಆಯ್ಕೆ ಮಾಡಲಾಯಿತ್ತು. ಇದರಲ್ಲಿ ದ್ರಾವಿಡ್‌ ಅವರ ಹೆಸರೂ ಇತ್ತು. ಅಂದೂ ಕೂಡ ದ್ರಾವಿಡ್‌ ಗೌರವ ಡಾಕ್ಟರೇಟ್ ಅನ್ನು ನಯವಾಗಿಯೇ ನಿರಾಕರಿಸಿದ್ದರು.
