ರಾಘವೇಂದ್ರ ರಾಜ್‌ಕುಮಾರ್‌ ಮುಖ್ಯಭೂಮಿಕೆಯಲ್ಲಿರುವ “13′ ಚಿತ್ರದ ಟೀಸರ್ ಬಿಡುಗಡೆಯಾಗಿದೆ. 32 ಜಿಲ್ಲೆಯ ಪುನೀತ್‌ ರಾಜ್‌ಕುಮಾರ್‌ ಅಭಿಮಾನಿ ಸಂಘದ ಪದಾಧಿಕಾರಿಗಳು ಸದಸ್ಯರು ಸೇರಿ ಈ ಟೀಸರ್ ಬಿಡುಗಡೆ ಮಾಡಿದ್ದಾರೆ. ಕೆ. ನರೇಂದ್ರ ಬಾಬು ಕಥೆ, ಚಿತ್ರಕಥೆ ಬರೆದು ನಿರ್ದೇಶನ ಮಾಡಿದ್ದಾರೆ.
ಚಿತ್ರತಂಡ ಸರ್ಕಾರಿ ಶಾಲೆಗಳನ್ನು ಅಭಿವೃದ್ಧಿಪಡಿಸುವ ಹಾಗೂ ನಿರ್ಗತಿಕ ಮಕ್ಕಳಿಗೆ ಶಾಲಾ ಪುಸ್ತಕ, ಬ್ಯಾಗ್‌ ನೀಡುವ ಮೂಲಕ ತಮ್ಮ ಸಿನಿಮಾವನ್ನು ವಿಭಿನ್ನವಾಗಿ ಪ್ರಚಾರ ಮಾಡುತ್ತಿದೆ.
“ಯಾವುದೇ ಕಾರ್ಯಕ್ರಮಕ್ಕೆ ನಾನು ಬಂದರೂ ನನಗೆ ಹಾರ- ಶಾಲು ಹಾಕಬೇಡಿ. ಆ ದುಡ್ಡಲ್ಲಿ ಶಾಲಾ ಮಕ್ಕಳಿಗೆ ಸಹಾಯ ಮಾಡೋಣ. ಈ ಮೂಲಕ ಅಪ್ಪು ಕನಸನ್ನು ಈಡೇರಿಸೋಣ. ಇದು ನನ್ನ ಆಸೆ’ ಎನ್ನುವುದು ರಾಘಣ್ಣ ಮಾತು.
ಸಿನಿಮಾ ಬಗ್ಗೆ ಮಾತನಾಡುವ ರಾಘಣ್ಣ, ಆರಂಭದಲ್ಲಿ ನಿರ್ದೇಶಕರು ಬಂದು ಟೈಟಲ್‌ ಹೇಳಿದಾಗ, “13′ ಅಂದ್ರೆ ಏನಿರಬಹುದು ಅನಿಸಿತು. ಕಥೆ ಕೇಳಿದ ನಂತರ ಸಿನಿಮಾಕ್ಕೆ ಇದೇ ತಕ್ಕ ಟೈಟಲ್‌ ಅನಿಸಿತು. “13′ ಎಂಬುದಕ್ಕೆ ನಿರ್ದೇ ಶಕರು ಸಿನಿಮಾದಲ್ಲಿ ಹೊಸ ಅರ್ಥ ಕೊಡಲು ಪ್ರಯತ್ನಿಸಿ ದ್ದಾರೆ. ನನ್ನ ಸಿನಿಮಾ ಕೆರಿಯರ್‌ನಲ್ಲಿ ಮೊದಲ ಬಾರಿಗೆ ಇಂಥದ್ದೊಂದು ವಿಭಿನ್ನ ಕಥೆ ಮತ್ತು ಪಾತ್ರದಲ್ಲಿ ಕಾಣಿಸಿಕೊಂಡಿರುವುದಕ್ಕೆ ಖುಷಿಯಾಗುತ್ತಿದೆ. ಕಂಟೆಂಟ್‌ ಸಿನಿಮಾಗಳನ್ನು ಇಷ್ಟಪಡುವವರಿಗೆ ಖಂಡಿತವಾಗಿಯೂ “13′ ಸಿನಿಮಾ ಇಷ್ಟವಾಗುತ್ತದೆ ಎನ್ನುತ್ತಾರೆ ರಾಘಣ್ಣ.
“13′ ಸಿನಿಮಾದಲ್ಲಿ ರಾಘವೇಂದ್ರ ರಾಜಕುಮಾರ್‌ ಮತ್ತು ಶ್ರುತಿ ಇದೇ ಮೊದಲು ಅಂತರ್‌ ಧರ್ಮೀಯ ಜೋಡಿಯಾಗಿ ತೆರೆಮೇಲೆ ಬರುತ್ತಿದ್ದಾರೆ.
ರವಿ ರೈ 