ಮಾನವಕಳ್ಳಸಾಗಣೆ, ವೇಶ್ಯೆವಾಟಿಕೆ ಕಿಂಗ್ ಪಿನ್ ಸೋನು ತಿಹಾರ್ ಜೈಲಿನಲ್ಲಿ ಆತ್ಮಹತ್ಯೆಗೆ ಯತ್ನ!

ನವದೆಹಲಿ:ಮಾನವ ಕಳ್ಳಸಾಗಣೆ, ಕಿಡ್ನಾಪ್ ಪ್ರಕರಣ, ಸೆಕ್ಸ್ ರಾಕೆಟ್ ರೂವಾರಿ ಪ್ರಕರಣದಲ್ಲಿ ದೋಷಿಯಾಗಿರುವ ಸೋನು ಪಂಜಾಬನ್ ಅಲಿಯಾಸ್ ಗೀತಾ ಆರೋರಾ ಶನಿವಾರ ತಿಹಾರ್ ಜೈಲಿನಲ್ಲಿ ವಿಷ ಸೇವಿಸಿ ಆತ್ಮಹತ್ಯೆಗೆ ಯತ್ನಿಸಿದ ಘಟನೆ ನಡೆದಿರುವುದಾಗಿ ವರದಿ ತಿಳಿಸಿದೆ.

ಪ್ರಕರಣದಲ್ಲಿ ಜೈಲುಶಿಕ್ಷೆಗೆ ಗುರಿಯಾಗಿರುವ ಸೋನು ದೆಹಲಿಯ ತಿಹಾರ್ ಜೈಲಿನಲ್ಲಿದ್ದು, ಘಟನೆ ಬಳಿಕ ತಕ್ಷಣವೇ ದೀನ್ ದಯಾಳ್ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಆಕೆಯ ಆರೋಗ್ಯ ತೀರಾ ಹದಗೆಟ್ಟಿದ್ದು, ಇದೀಗ ಪ್ರಾಣಾಪಾಯದಿಂದ ಪಾರಾಗಿರುವುದಾಗಿ ವೈದ್ಯರು ತಿಳಿಸಿದ್ದಾರೆ.

ಸೋನು ಪಂಜಾಬನ್ ದೇಶದ ರಾಜಧಾನಿ ದೆಹಲಿಯಲ್ಲಿ ಮಾಂಸ ದಂಧೆ(ವೇಶ್ಯೆವಾಟಿಕೆ) ನಡೆಸುತ್ತಿದ್ದ ನಟೋರಿಯಸ್ ಕಿಂಗ್ ಪಿನ್ ಪ್ರಕರಣದಲ್ಲಿ ದೋಷಿಯಾಗಿದ್ದಳು. ಅಲ್ಲದೇ ವೇಶ್ಯೆವಾಟಿಕೆ, ಮಾನವಕಳ್ಳಸಾಗಣೆ, ಅಪಹರಣ ಪ್ರಕರಣದಲ್ಲಿ ಈಕೆಯ ಸಹವರ್ತಿ ಸಂದೀಪ್ ಬೆಡ್ವಾಲ್ ಕೂಡಾ ದೋಷಿ ಎಂದು ಕೋರ್ಟ್ ತೀರ್ಪು ನೀಡಿದ್ದು, ಆದರೆ ಶಿಕ್ಷೆಯ ಪ್ರಮಾಣವನ್ನು ಕೋರ್ಟ್ ಘೋಷಿಸಲು ಬಾಕಿ ಇದೆ.

ಗೀತಾ ಆರೋರಾ ಅಲಿಯಾಸ್ ಸೋನು ಮೇಲೆ ಭಾರತೀಯ ದಂಡ ಸಂಹಿತೆ(ಐಪಿಸಿ), ಮಾನವಕಳ್ಳಸಾಗಣೆ, ವೇಶ್ಯೆವಾಟಿಕೆ ಕಾಯ್ದೆಯಡಿ ಪ್ರಕರಣ ದಾಖಲಾಗಿತ್ತು. ಅದೇ ರೀತಿ ಸಂದೀಪ್ ಬೆಡ್ವಾಲ್ ವಿರುದ್ಧವೂ ಹಲವಾರು ಕಾಯ್ದೆಗಳಡಿ ಪ್ರಕರಣ ದಾಖಲಾಗಿತ್ತು ಎಂದು ವರದಿ ವಿವರಿಸಿದೆ.