ರಚನ್‌ ಕೌಶಲ್ಯ

ರಚನ್‌ಗೆ ಸಿನಿಮಾ ಮಾಡಬೇಕೆಂಬ ದೊಡ್ಡ ಆಸೆಯೇನೂ ಇರಲಿಲ್ಲ. ಆದರೆ, ರಚನ್‌ ಅವರನ್ನು ನೋಡಿದ ನಿರ್ಮಾಪಕರು ಹಾಗೂ ಸ್ನೇಹಿತರು ನೀವ್ಯಾಕೆ ಹೀರೋ ಆಗಬಾರದು ಎಂದು ಹೇಳುವ ಮೂಲಕ ಅವರ ಮನಸ್ಸಲ್ಲೂ ಹೀರೋ ಆಗುವ ಆಸೆ ಚಿಗುರಿದೆ. ಅದರಂತೆ ಅವರು ಹೀರೋ ಆಗಿದ್ದಾರೆ. ಈಗ ಆ ಚಿತ್ರ ಸಂಪೂರ್ಣ ಮುಗಿದು ಬಿಡುಗಡೆಯ ಹಂತಕ್ಕೆ ಬಂದಿದೆ. ಅಷ್ಟಕ್ಕೂ ಯಾವ ಸಿನಿಮಾ ಮೂಲಕ ರಚನ್‌ ಹೀರೋ ಆಗಿದ್ದಾರೆಂದು ನೀವು ಕೇಳಬಹುದು. ಅದು “ಗೌಡ್ರು ಹೋಟೆಲ್‌’ ಚಿತ್ರದ ಮೂಲಕ. “ಗೌಡ್ರು ಹೋಟೆಲ್‌’ ಎಂಬ ಚಿತ್ರವೊಂದು ಆರಂಭವಾಗಿರೋದು ನಿಮಗೆ ಗೊತ್ತೆ ಇದೆ. ಆ ಚಿತ್ರದಲ್ಲಿ ಹೀರೋ ಆಗಿರುವವರು ರಚನ್‌. 

ಪಿ.ಕುಮಾರ್‌ ಈ ಸಿನಿಮಾದ ನಿರ್ದೇಶಕರು. ರಚನ್‌ಗೆ ಸಿನಿಮಾ ಕ್ಷೇತ್ರ ಹೊಸದು. ಏಕಾಏಕಿ ಬಂದು ಕ್ಯಾಮರಾ ಮುಂದೆ ನಿಂತರೆ ಪಾತ್ರಕ್ಕೆ ನ್ಯಾಯ ಒದಗಿಸಲು ಕಷ್ಟವಾಗಬಹುದೆಂಬ ಕಾರಣಕ್ಕೆ ರಚನ್‌ ಸಿನಿಮಾ ಆರಂಭವಾಗುವ ಮುನ್ನ ವರ್ಕ್‌ಶಾಪ್‌ನಲ್ಲೂ ಪಾಲ್ಗೊಂಡಿದ್ದಾರೆ. ಸಿನಿಮಾದಲ್ಲಿ ಬರುವ ದೃಶ್ಯಗಳಿಗೆ ತಕ್ಕಂತೆ ತಯಾರಿ ನಡೆಸಿದ್ದರಿಂದ ಅವರಿಗೆ ನಟನೆ ಸುಲಭವಾಯಿತಂತೆ. ರಚನ್‌ ಮೊದಲ ಸಿನಿಮಾದಲ್ಲೇ ಖುಷಿಯಾಗಿರಲು ಮತ್ತೂಂದು ಕಾರಣವೆಂದರೆ ಖ್ಯಾತ ನಟರಾದ ಪ್ರಕಾಶ್‌ ರೈ ಹಾಗೂ ಅನಂತ್‌ನಾಗ್‌.  ಯಾವುದೇ ನಟನಿಗಾದರೂ ಮೊದಲ ಸಿನಿಮಾದಲ್ಲೇ ದೊಡ್ಡ ನಟರ ಜೊತೆ ತೆರೆಹಂಚಿಕೊಳ್ಳುವ ಅವಕಾಶ ಸಿಕ್ಕರೆ ಖುಷಿಯಾಗುತ್ತಾರೆ. ಈಗ ಅವಕಾಶ ರಚನ್‌ಗೂ ಸಿಕ್ಕಿದೆ.

 “ಗೌಡ್ರು ಹೋಟೆಲ್‌’ ಚಿತ್ರದಲ್ಲಿ ಪ್ರಕಾಶ್‌ ರೈ ಹಾಗೂ ಅನಂತ್‌ನಾಗ್‌ ನಟಿಸಿದ್ದಾರೆ. “ನಾನು ಚಿಕ್ಕಂದಿನಲ್ಲಿ ಹೆಚ್ಚು ಸಿನಿಮಾ ನೋಡಿಲ್ಲ. ನೋಡಿರುವ ಕೆಲವೇ ಕೆಲವು ಸಿನಿಮಾಗಳಲ್ಲಿ ಅನಂತ್‌ನಾಗ್‌ ಹೀರೋ ಆಗಿದ್ದರು. ಈಗ ಅವರ ಜೊತೆ ನಟಿಸುವ ಅವಕಾಶ ಸಿಕ್ಕಿರೋದು ನನ್ನ ಅದೃಷ್ಟ’ ಎಂದು ಖುಷಿಯಿಂದ ಹೇಳುತ್ತಾರೆ ರಚನ್‌.

ರವಿ ರೈ