ಮದುವೆಗೆ ಬಂದ ಯೋಧ ಕ್ವಾರಂಟೈನ್!

ಮುಂಡರಗಿ: ಮದುವೆ ಆಗಲು ಬಂದಿರುವ ಯೋಧನೊಬ್ಬ ತಾಲೂಕಿನ ಜಂತ್ಲಿ-ಶಿರೂರು ಗ್ರಾಮದಲ್ಲಿ ತೋಟದ ಮನೆಯಲ್ಲಿ ಹೋಂ ಕ್ವಾರಂಟೈನ್‌ ಆಗಿದ್ದಾರೆ. ಯೋಧ ಕೋವಿಡ್‌ ಪರೀಕ್ಷೆಗೆ ಒಳಪಟ್ಟಿದ್ದು, ಆರೋಗ್ಯ ಇಲಾಖೆ ಸೂಚನೆ ಮೇರೆಗೆ ಹೋಂ ಕ್ವಾರಂಟೈನ್‌ ಆಗಿ ಕುಟುಂಬ ಹಾಗೂ ಗ್ರಾಮಸ್ಥರ ಆರೋಗ್ಯ ದೃಷ್ಟಿಯಿಂದ ಇತರರಿಗೆ ಮಾದರಿಯಾಗಿದ್ದಾರೆ.

ತಾಲೂಕಿನ ಜಂತ್ಲಿ-ಶಿರೂರು ಗ್ರಾಮದ ಯೋಧನ ಮದುವೆ ಆಗಸ್ಟ್‌ 13ರಂದು ನಿಗದಿಯಾಗಿದೆ. ಜಮ್ಮುವಿನ ರಾಜೋರಿ ಜಿಲ್ಲೆಯ ಮಾಲಾದಲ್ಲಿ ಮದ್ರಾಸ್‌ -17 ರೆಜಿಮೆಂಟಿನ್‌ ಸೇನೆ ಕರ್ತವ್ಯದಲ್ಲಿದ್ದ ಯೋಧ 47 ದಿನಗಳ ರಜೆ ಪಡೆದು ಮದುವೆ ಮಾಡಿಕೊಳ್ಳಲು ಸ್ವಗ್ರಾಮಕ್ಕೆ ಮರಳಿದ್ದಾರೆ. ಹೀಗಾಗಿ ಈಗಾಗಲೇ ಆರೋಗ್ಯ ಇಲಾಖೆ ಕೋವೀಡ್‌ ಪರೀಕ್ಷೆಗೆ ಒಳಪಟ್ಟಿದ್ದು, ವರದಿ ಬರುವುದು ಬಾಕಿ ಇದೆ. ಗ್ರಾಮದ ಹೊರವಲಯದ 2 ಕಿ.ಮೀ ಅಂತರದಲ್ಲಿರುವ ತಮ್ಮ ತೋಟದ ಮನೆಯಲ್ಲಿ 14 ದಿನಗಳ ಹೋಂ ಕ್ವಾರಂಟೈನ್‌ ಒಳಪಟ್ಟಿರುವ ಯೋಧ ಈಗಾಗಲೇ 8 ದಿನ ಪೂರೈಸಿದ್ದು, ಮನೆಯವರು ತಂದು ಕೊಡುವ ಬುತ್ತಿಯನ್ನು ಸಾಮಾಜಿಕ ಅಂತರ ಕಾಯ್ದುಕೊಂಡು ಊಟ ಮಾಡಿ ಜೀವನ ಸಾಗಿಸುತ್ತಿದ್ದಾರೆ.