ಸಿಂಧು ಡೆಪ್ಯೂಟಿ ಕಲೆಕ್ಟರ್‌

ಅಮರಾವತಿ: ಖ್ಯಾತ ಶಟ್ಲರ್‌ ಮತ್ತು ಒಲಿಂಪಿಕ್‌ ಬೆಳ್ಳಿ ವಿಜೇತೆ ಪಿವಿ ಸಿಂಧು ಅವರನ್ನು ಆಂಧ್ರ ಪ್ರದೇಶ ಸರಕಾರವು ಗ್ರೂಪ್‌-1 ಸೇವೆ ಹುದ್ದೆಯಾಗಿರುವ ಡೆಪ್ಯೂಟಿ ಕಲೆಕ್ಟರ್‌ ಆಗಿ ನೇಮಕ ಮಾಡಲಾಗಿದೆ.

ಮುಖ್ಯ ಮಂತ್ರಿ ಎನ್‌. ಚಂದ್ರಬಾಬು ನಾಯ್ಡು ವೈಯಕ್ತಿಕವಾಗಿ ಸರಕಾರದ ಆದೇಶದ ಪ್ರತಿಯನ್ನು ಸಿಂಧು ಅವರಿಗೆ ಹಸ್ತಾಂತರಿಸಿದರು. ಸರಕಾರದ ಕೊಡುಗೆಗೆ ಹರ್ಷ ವ್ಯಕ್ತಪಡಿಸಿದ ಸಿಂಧು ಅವರು ನನ್ನ ಮೊದಲ ಆದ್ಯತೆ ಬ್ಯಾಡ್ಮಿಂಟನ್‌ ಕ್ಷೇತ್ರದಲ್ಲಿ ಉನ್ನತ ಸಾಧನೆ ಮಾಡುವುದನ್ನು ಮುಂದುವರಿಸುವುದು ಆಗಿದೆ ಎಂದರು.

ನನ್ನ ಗಮನ ಕ್ರೀಡೆಯ ಮೇಲೆ ಇರಲಿದೆ ಮತ್ತು ಹುದ್ದೆ ನೀಡಿರುವುದಕ್ಕೆ ಮುಖ್ಯಮಂತ್ರಿಗಳಿಗೆ ಕೃತಜ್ಞತೆ ಸಲ್ಲಿಸುತ್ತೇನೆ ಎಂದು ಸಿಂಧು ತಿಳಿಸಿದರು.