ಹೈದರಾಬಾದ್: ವರ್ಷದ ಬಿಗೆಸ್ಟ್‌ ಪ್ಯಾನ್‌ ಇಂಡಿಯಾ ಚಿತ್ರವೆಂದೇ ಹೇಳಲಾಗುತ್ತಿರುವ ʼಪುಷ್ಪ-2ʼ ಸಿನಿಮಾದ ಟ್ರೇಲರ್ (Pushpa The Rule) ಭಾನುವಾರ (ನ.17ರಂದು) ರಿಲೀಸ್‌ ಆಗಿದೆ.
ಪಾಟ್ನಾದ ಗಾಂಧಿ ಮೈದಾನದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಅಪಾರ ಜನ ಸಮೂಹದ ಮಧ್ಯೆ ʼಪುಷ್ಪ-2ʼ ಟ್ರೇಲರ್ ನ್ನು ಚಿತ್ರತಂಡ ರಿಲೀಸ್‌ ಮಾಡಿದೆ.
ಅಲ್ಲು ಅರ್ಜುನ್ (Allu Arjun), ರಶ್ಮಿಕಾ ಮಂದಣ್ಣ (Rashmika Mandanna) ಸೇರಿದಂತೆ ಚಿತ್ರದ ನಿರ್ದೇಶಕ ಸುಕುಮಾರ್‌ (Director Sukumar) ಹಾಗೂ ಇತರೆ ಪ್ರಮುಖರು ಟ್ರೇಲರ್ ರಿಲೀಸ್‌ ಸಮಾರಂಭದಲ್ಲಿ ಉಪಸ್ಥಿತರಿದ್ದರು.
ರಿಲೀಸ್‌ಗೂ ಮುನ್ನ ಸಿನಿಮಾ ಸ್ಯಾಟ್‌ಲೈಟ್‌ ಸೇಲ್‌, ಓಟಿಟಿ ರೈಟ್ಸ್‌ ವಿಚಾರದಲ್ಲಿ ಭರ್ಜರಿ ಕಮಾಯಿ ಮಾಡಿದೆ ಎನ್ನಲಾಗಿದೆ. ಟೀಸರ್‌, ಪೋಸ್ಟರ್‌ ಹಾಗೂ ಹಾಡುಗಳಿಂದ ಸದ್ದು ಮಾಡಿದ ಬಳಿಕ ಇದೀಗ ʼಪುಷ್ಪ-2ʼ ಟ್ರೇಲರ್ ರಿಲೀಸ್‌ ಮಾಡಿದ್ದು, ಪ್ರೇಕ್ಷಕರ ಕುತೂಹಲವನ್ನು ಹೆಚ್ಚಾಗಿಸಿದೆ.
ಇತ್ತೀಚೆಗೆ ಸಿನಿಮಾದ ಡಬ್ಬಿಂಗ್‌ ಪ್ರಕ್ರಿಯೆಯ ಫೋಟೋವನ್ನು ರಶ್ಮಿಕಾ ಮಂದಣ್ಣ ಅವರು ಹಂಚಿಕೊಂಡಿದ್ದರು. ಈ ಫೋಟೋ ವೈರಲ್ ಆಗಿತ್ತು.
ಹೇಗಿದೆ ಟ್ರೇಲರ್?:
ದಟ್ಟ ಕಾಡಿನಲ್ಲಿ ರಕ್ತಚಂದನ ಮರಗಳ ಸಾಗಾಣೆಯನ್ನು ಮಾಡುವ ದೃಶ್ಯವನ್ನು ಮೊದಲಿಗೆ ತೋರಿಸಲಾಗಿದೆ. ಈ ವ್ಯಕ್ತಿ ಯಾರು ಈತನಿಗೆ ಹಣದ ಆಸೆಯಿಲ್ಲ ಅಥವಾ ಅಧಿಕಾರದ ಮೋಹವಿಲ್ಲವೆಂದು ʼಪುಷ್ಪರಾಜ್‌ʼ (ಅಲ್ಲು ಅರ್ಜುನ್) ಎಂಟ್ರಿಯನ್ನು ಪರಿಚಯಿಸುವ ದೃಶ್ಯವನ್ನು ಟ್ರೇಲರ್‌ನಲ್ಲೊ ತೋರಿಸಲಾಗಿದೆ. ತನ್ನ ಊರಿನಲ್ಲಿ ಪುಷ್ಪ ದೊಡ್ಡ ಹೆಸರನ್ನೇ ಮಾಡಿರುತ್ತಾನೆ. ತನ್ನ ಕೆಲಸಕ್ಕೆ ಹಣ ಸಿಗದೆ ಇದ್ದಾಗ ʼಪುಷ್ಪʼ ಫೈಯರ್‌ ಆಗಿ ವಿರೋಧಿಗಳಿಗೆ ಕಾಣಿಸುತ್ತಾನೆ. ʼಪುಷ್ಪʼ ಎಂದರೆ ಒಂದು ಹೆಸರು ಮಾತ್ರವಲ್ಲ ಅದೊಂದು ಬ್ರ್ಯಾಂಡ್‌ ಎನ್ನುವ ಹಿನ್ನೆಲೆ ಡೈಲಾಗ್ಸ್‌ ನಲ್ಲಿ ʼಪುಷ್ಪರಾಜ್‌ʼ ಮಾಸ್‌ ಅವತಾರವನ್ನು ತೋರಿಸಲಾಗಿದೆ. ʼಪುಷ್ಪರಾಜ್‌ʼ ಅಕ್ರಮಗಳನ್ನು ತಡೆಯಲು ಊರಿಗೆ ಬರುವ ಎಸ್‌ ಪಿ ಭನ್ವರ್ ಸಿಂಗ್ (ಫಾಹದ್‌ ಫಾಸಿಲ್‌) ನಾನಾ ನೀನಾ ಎಂದು ಕಾದಾಡುವುದನ್ನು ಟ್ರೇಲರ್‌ನಲ್ಲಿ ತೋರಿಸಲಾಗಿದೆ. ʼಪಾರ್ಟಿ ಅಗುತ್ತದೆʼ ಪುಷ್ಪ ಎಂದು ಹೇಳುತ್ತಾ ʼಪುಷ್ಪರಾಜ್‌ʼ ಗುಂಪಿನ ಸದಸ್ಯರನ್ನು ಸೆರೆ ಹಿಡಿಯುವ ದೃಶ್ಯವನ್ನು ತೋರಿಸಲಾಗಿದೆ.
ತನ್ನ ಹಕ್ಕಿನ ಹಣ ಅದು ಪೈಸೆ ಆಗಿರಲಿ ಅಥವಾ ರೂಪಾಯಿ ಆಗಿರಲಿ, ಅದು ಏಳು ಆಕಾಶದಲ್ಲಿರಲಿ ಅಥವಾ ಸಮುದ್ರದ ಆಚೆ ಇರಲಿ ಅದನ್ನು ವಸೂಲಿ ಮಾಡುವುದು ʼಪುಷ್ಪರಾಜ್‌ʼ ಯಾವುದೇ ಹಂತಕ್ಕೆ ಬೇಕಾದರೂ ಹೋಗುತ್ತಾನೆ ಎನ್ನುವ ಡೈಲಾಗ್ಸ್‌ಗಳಿಗೆ ತಕ್ಕಂತೆ ಪವರ್‌ ಫುಲ್‌ ಆ್ಯಕ್ಷನ್ ದೃಶ್ಯಗಳನು ತೋರಿಸಲಾಗಿದೆ. ʼಪುಷ್ಪ ನ್ಯಾಷನಲ್‌ ಆಟಗಾರನಲ್ಲ, ಇಂಟರ್‌ ನ್ಯಾಷನಲ್‌ ಆಟಗಾರʼ ಎನ್ನುವ ಬೆಂಕಿ ಡೈಲಾಗ್‌ ಕೇಳಿ ಫ್ಯಾನ್ಸ್‌ ಜೈಕಾರ ಹಾಕಿದ್ದಾರೆ.
ರಶ್ಮಿಕಾ ಮಂದಣ್ಣ ಅವರೊಂದಿಗಿನ ರೊಮ್ಯಾಂಟಿಕ ದೃಶ್ಯಗಳು ಟ್ರೇಲರ್‌ನಲ್ಲಿದೆ. ಶ್ರೀಲೀಲಾ ಅವರ ಐಟಂ ಸಾಂಗ್‌ ಝಲಕ್‌ ಟ್ರೇಲರ್‌ನಲ್ಲಿ ತೋರಿಸಲಾಗಿದೆ.
ಅಲ್ಲು ಅರ್ಜುನ್, ರಶ್ಮಿಕಾ ಮಂದಣ್ಣ, ಫಾಹದ್‌ ಫಾಸಿಲ್‌, ಸುನೀಲ್‌, ಜಗದೀಶ್ ಪ್ರತಾಪ್ ಭಂಡಾರಿ, ಜಗಪತಿ ಬಾಬು ಮತ್ತು ಪ್ರಕಾಶ್ ರಾಜ್ ಮುಂತಾದವರು ನಟಿಸಿದ್ದಾರೆ.
ಡಿಸೆಂಬರ್‌ 5 ರಂದು ʼಪುಷ್ಪ-2ʼ ರಿಲೀಸ್‌ ಆಗಲಿದೆ.
