ಖಾಸಗಿ ವೈದ್ಯರ ಹಲ್ಲೆ ಖಂಡಿಸಿ ಪ್ರತಿಭಟನೆ

ಧಾರವಾಡ: ಚಿಕಿತ್ಸೆಗೆ ದಾಖಲಾಗಿದ್ದ ನಿವೃತ್ತ ಯೋಧರ ಪತ್ನಿಯ ಮೇಲೆ ಹಲ್ಲೆ ಮಾಡಿರುವ ಡಾ| ವೈ.ಎನ್‌. ಇರಕಲ್‌ ವಿರುದ್ಧ ಕ್ರಮ ಕೈಗೊಳ್ಳುವಂತೆ  ಆಗ್ರಹಿಸಿ ಭಾರತೀಯ ಯುವ ಕಾಂಗ್ರೆಸ್‌ ಘಟಕ ವತಿಯಿಂದ ನಗರದ ಶ್ರೀಯಾ ಆಸ್ಪತ್ರೆ ಎದುರು ಗುರುವಾರ ಪ್ರತಿಭಟನೆ ನಡೆಸಲಾಯಿತು. 

ಚಿಕಿತ್ಸೆ  ನೀಡಬೇಕಾದ ವೈದ್ಯರೇ ಚಿಕಿತ್ಸೆಗೆ ದಾಖಲಾಗಿದ್ದ ರೋಗಿಯ ಪತ್ನಿಯ ಮೇಲೆ ಹಲ್ಲೆ ಮಾಡಿರುವುದು ಖಂಡನೀಯ. ಹೀಗಾಗಿ ಈ ಕೂಡಲೇ ಡಾ| ವೈ.ಎನ್‌. ಇರಕಲ್‌ ಅವರನ್ನು ಬಂಧಿಸಿ ಕಾನೂನು ಕ್ರಮ ಕೈಗೊಳ್ಳುವಂತೆ ಒತ್ತಾಯಿಸಲಾಯಿತು. 

ಬೆಳಗಾವಿ ಜಿಲ್ಲೆಯ ಬೈಲಹೊಂಗಲ ತಾಲೂಕಿನ  ಅಂಬಡಗಟ್ಟಿ ಗ್ರಾಮದ ನಿವೃತ್ತ ಯೋಧ ಬಸಯ್ಯ ಅಡಿವೆಪ್ಪನಮಠ ಅವರು ಮೂಲವ್ಯಾಧಿ  ಚಿಕಿತ್ಸೆಗಾಗಿ ಆಸ್ಪತ್ರೆಗೆ ದಾಖಲಾಗಿದ್ದರು. ಆಪರೇಷನ್‌ ಮಾಡಲು  ರಕ್ತ ಹಾಕಿದ್ದು, ಈ ವೇಳೆ ರಕ್ತಸಾವ್ರ ಉಂಟಾಗಿರುವ ಬಗ್ಗೆ ಅವರ ಧರ್ಮಪತ್ನಿ ಕಸ್ತೂರೆವ್ವ ವೈದ್ಯರ ಗಮನ ಸೆಳೆದಿದ್ದಾರೆ.

ಈ ನೆಪದಲ್ಲಿ ಡಾ| ವೈ.ಎನ್‌.  ಇರಕಲ್‌ ಹಲ್ಲೆ ಮಾಡಿದ್ದು, ಅವರನ್ನು ಬಂಧಿಸಿ ಕಾನೂನು ಕ್ರಮ ಕೈಗೊಳ್ಳುವ ಮೂಲಕ ಹಲ್ಲೆಗೊಳಗಾದ ಮಹಿಳೆಗೆ ನ್ಯಾಯ ದೊರಕಿಸಿಕೊಡಬೇಕು ಎಂದು  ಎಚ್ಚರಿಸಲಾಯಿತು. ಈ ವೇಳೆ ಇಮಾಮ್‌ ಯಲಿಗಾರ, ಅಬ್ದುಲ್‌ ದೇಸಾಯಿ, ಬಾಬು ಮಿಗಳಿ, ಮಂಜು ನೀಲಗುಂದ, ಮಂಜು ಮಂಗಳಗಟ್ಟಿ, ತಾಯಪ್ಪ ಪವಾರ, ಮೆಹಬೂಬ ರಾಮದುರ್ಗ, ರೋಹನ್‌ ಪವಾರ ಸೇರಿದಂತೆ ಹಲವರು ಇದ್ದರು.