ಅರಣ್ಯ ಇಲಾಖೆಯಿಂದ ಕಾಡುಬೆಕ್ಕಿನ ಮರಿ ರಕ್ಷಣೆ

ಬಂಟ್ವಾಳ: ಬಿ.ಸಿ. ರೋಡ್‌ ಸಮೀಪದ ಮೊಡಂಕಾಪುನಲ್ಲಿ ತೋಟ ದಲ್ಲಿ ಅನಾಥವಾಗಿದ್ದ ಕಾಡು ಬೆಕ್ಕಿನ ಮರಿಯೊಂದನ್ನು ಫೆ. 1ರಂದು ಬಂಟ್ವಾಳ ಅರಣ್ಯ ಇಲಾಖೆಯವರು ರಕ್ಷಿಸಿ ಪಿಲಿಕುಳ ನಿಸರ್ಗಧಾಮಕ್ಕೆ ಹಸ್ತಾಂತರಿಸಿದ್ದಾರೆ.

ಮೊಡಂಕಾಪು ನಿವಾಸಿ ಸತೀಶ್‌ ಶೆಟ್ಟಿ ಅವರ ತೋಟದಲ್ಲಿ ಕಾಡು ಬೆಕ್ಕಿನ ಮರಿ ಕಂಡುಬಂದಿದ್ದು, ಅವರು ಬಂಟ್ವಾಳ ಅರಣ್ಯ ಇಲಾಖೆಗೆ ಮಾಹಿತಿ ನೀಡಿದ್ದಾರೆ. ಅರಣ್ಯಾಧಿಕಾರಿಗಳ ತಂಡ ತೋಟಕ್ಕೆ ತೆರಳಿ ಕಾಡು ಬೆಕ್ಕಿನ ಮರಿಯನ್ನು ರಕ್ಷಿಸಿ ಪಿಲಿಕುಳಕ್ಕೆ ನೀಡಿದೆ.

ತೋಟದಲ್ಲಿ ಕಾಡು ಬೆಕ್ಕು ಸಹಿತ ಅದರ ಇತರ ಮರಿಗಳು ಇರುವ ಸಾಧ್ಯತೆ ಇದ್ದು, ಅದರ ಕುರಿತು ಗಮನ ಹರಿಸಲಾಗುವುದು ಎಂದು ಅರಣ್ಯಾಧಿಕಾರಿ ಬಿ. ಸುರೇಶ್‌ ಅವರು ತಿಳಿಸಿದ್ದಾರೆ.

ಕಾರ್ಯಾಚರಣೆಯಲ್ಲಿ ಅರಣ್ಯಾಧಿ ಕಾರಿಗಳು ಸಹಿತ ಸಿಬಂದಿ ವಿನಯ್‌, ಪ್ರೀತಂ, ಜಿತೇಶ್‌ ಪಾಲ್ಗೊಂಡಿದ್ದರು.