ಯುವಕನಿಂದ ಮಹಿಳೆಯ ರಕ್ಷಣೆ

ಬಂಟ್ವಾಳ: ಆಕಸ್ಮಿಕವಾಗಿ ಕೆರೆಗೆ ಬಿದ್ದ ಮಹಿಳೆಯೊಬ್ಬರನ್ನು ಸ್ಥಳೀಯ ಯುವಕನೊಬ್ಬ ರಕ್ಷಿಸಿದ ಘಟನೆ ಜು. 17ರಂದು ಸಜೀಪಮೂಡ ಗ್ರಾಮದ ಕೊಳಕೆಯಲ್ಲಿ ನಡೆದಿದೆ.

ಕೊಳಕೆ ನಿವಾಸಿ ದಿವಾಕರ ಅವರ ತಾಯಿ ಪಾರ್ವತಿ (62) ಕೆರೆಗೆ ಬಿದ್ದಿದ್ದು, ಈ ಸಂದರ್ಭ ಮನೆಮಂದಿ ಇರಲಿಲ್ಲ ಎನ್ನಲಾಗಿದೆ. ಮಹಿಳೆ ಕೆರೆಗೆ ಬಿದ್ದುದನ್ನು ಕಂಡ ಕೆಲವರು ಬೊಬ್ಬೆ ಹೊಡೆದಿದ್ದು, ಆಗ ಸಮೀಪ ಅಂಗಡಿಯಲ್ಲಿದ್ದ ಸಿದ್ದಿಕ್‌ ಕೊಳಕೆ ಅವರು ಧಾವಿಸಿ ಬಂದು ಕೆರೆಗೆ ಧುಮುಕಿ ಪಾರ್ವತಿಯನ್ನು ಮೇಲಕ್ಕೆತ್ತಿ ಬಂಟ್ವಾಳ ಸರಕಾರಿ ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಸಿದ್ದಿಕ್‌ ಸಮಯ ಪ್ರಜ್ಞೆಗೆ ಸಾರ್ವಜನಿಕ ವಲಯದಿಂದ ಪ್ರಶಂಸೆ ವ್ಯಕ್ತವಾಗಿದೆ.