ಪ್ರೊ ವಾಲಿಬಾಲ್‌: ಕೊಚ್ಚಿಗೆ ಚೆನ್ನೈ ಆಘಾತ

ಚೆನ್ನೈ: ತವರಿನ ಅಂಗಳದ ಸಂಪೂರ್ಣ ಲಾಭವೆತ್ತಿದ ಚೆನ್ನೈ ಸ್ಪಾರ್ಟನ್ಸ್‌ ತಂಡ ಪ್ರೊ ವಾಲಿಬಾಲ್‌ ಕೂಟದ ದ್ವಿತೀಯ ಸೆಮಿಫೈನಲ್‌ನಲ್ಲಿ ಕೊಚ್ಚಿ ಬ್ಲೂ ಸ್ಪೈಕರ್ ತಂಡಕ್ಕೆ 3-2 ಸೆಟ್‌ಗಳ ಸೋಲುಣಿಸಿ ಪ್ರಶಸ್ತಿ ಸುತ್ತಿಗೆ ಲಗ್ಗೆ ಇರಿಸಿದೆ.

ಶುಕ್ರವಾರ ನಡೆಯುವ ಫೈನಲ್‌ನಲ್ಲಿ ಅದು ಇನ್ನೊಂದು ಬಲಿಷ್ಠ ತಂಡವಾದ ಕ್ಯಾಲಿಕಟ್‌ ಹೀರೋಸ್‌ ವಿರುದ್ಧ ಸೆಣಸಲಿದೆ.
ಲೀಗ್‌ ಹಂತದ ತೃತೀಯ ಸ್ಥಾನಿಯಾಗಿ ಸೆಮಿಫೈನಲ್‌ ಪ್ರವೇಶಿಸಿದ್ದ ಚೆನ್ನೈ, ಬುಧವಾರದ ಸೆಮಿಫೈನಲ್‌ನಲ್ಲಿ ತೀವ್ರ ಪೈಪೋಟಿಯ ಮೊದಲ ಸೆಟ್‌ ಗೆದ್ದು ಶುಭಾರಂಭ ಮಾಡಿತು (16-14). ಬಳಿಕ ಮುಂದಿನೆರಡು ಸೆಟ್‌ಗಳನ್ನು 9-15, 10-15 ಅಂತರದಿಂದ ಕಳೆದುಕೊಂಡಿತು. ಆಗ ಕೊಚ್ಚಿಯ ಫೈನಲ್‌ ಬಹುತೇಕ ಖಚಿತವಾಗಿತ್ತು. ಆದರೆ ಚೆನ್ನೈ ಕೊನೆಯ 2 ಸೆಟ್‌ಗಳಲ್ಲಿ ತಿರುಗಿ ಬಿದ್ದು 15-8, 15-13 ಅಂತರದ ಮೇಲುಗೈ ಸಾಧಿಸಿ ಕೊಚ್ಚಿಯನ್ನು ಹೊರದಬ್ಬಿಯೇ ಬಿಟ್ಟಿತು.

ಚೆನ್ನೈ ಪರ ರುಸ್ಲಾನ್‌ ಸೊರೊಕಿನ್ಸ್‌ (17 ಅಂಕ), ನವೀನ್‌ ರಾಜ ಜೇಕಬ್‌ (13 ಅಂಕ) ಉತ್ತಮ ಪ್ರದರ್ಶನ ನೀಡಿದರು. ಕೊಚ್ಚಿಯ ಮನು ಜೋಸೆಫ್ ಕೂಡ 17 ಅಂಕ ಗಳಿಸಿದರೂ ಪ್ರಯೋಜನವಾಗಲಿಲ್ಲ.